Carl Johan ja Gonagas Šloahtta

Gonagas Carl Johan lei álgoálggus hui áŋgir bargat dan badjelii ahte galggai huksejuvvot Gonagaslaš Šloahtta, ja son lei maid ollu mielde huksendoaimmaid smiehttamušain. Son válljii báikki gosa Šloahtta galggai huksejuvvot, ja lei Carl Johan gii bijai vuođđogeađggi 1825:s.

Ii lean daddjon gosa Šloahtta galggai huksejuvvot. Muitalemiid mielde, de lei Gonagas ieš gii válljii viessosaji muhtun beaivvi go lei riidemen Bellevuealážis oarjjabealde dalá gávpotguovddáža. "Dákko galgá Šloahtta ceggejuvvot", galgá Gonagas Carl Johan lohkan. Jagi maŋŋá álggahuvvo huksenbarggut, ja golggotmánu 1. beaivvi 1825 beasai Gonagas Carl Johan bidjat vuođđogeađggi. Dat biddjojuvvui boahttevaš Šloahttakapealla áltára sadjái.

Riiddut

Álggos lei Gonagas Carl Johan hui áŋgir oažžut johtui šloahttaášši. Muhto go Stuoradiggi 1827:s ii dáhtton juolludit dárbbašlaš ruhtadeami nu ahte livčče sáhttán joatkit huksenbargguiguin, de dulkui gonagas dan persuvnnalaš falleheapmin iežas vuostá. Huksenášši šattai ge dasto mearkan ”dan bieđganeapmái mii ráđđe dan guovtti stáhtafámu gaskka”, ja buvttii čielgasit ovdan riidduid mat ledje Gonagasa ja Stuoradikki gaskkas.

Liikká lei Gonagas Carl Johanis dehálaš rolla barggaheaddjin ja maiddái eavttuid hábmejeaddjin Christiania Šloahta huksemis. Linstow plánii Šloahta viessogálvvuid ja dávviriid Šloahta váldoetášii nu movt Gonagas Carl Johan hálidii, vaikko son ieš ii beassan goassege oaidnit Norgga gonagasviesu gárvvisin.

Monográmma

Son jámii 1844:s, jagi maŋŋá go sihke Norggas ja Ruoŧas ledje ávvudan ahte son lei čohkkán 25 jagi truvnnos. Oinnolaš duođaštus dasa gávdno Šloahttakapeallas. Doppe lea Gonagas Carl Johana monográmma ja jahkelohku 1843 lea čállojuvvon gollebustávaiguin Gonagasčohkkánsaji bajábeallái. Dát lea áidna báiki olles dan visttis gos gonagasa monográmma ain lea oassin bissovaš, historjjálaš seaidnehervemiin.