Njuike váldosisdollui

Prinsehytta

Prinsehytta lea Gonagasbára priváhta opmodat Sikkilsdálas Jotunheimenis, mii lea oalgevággi Gudbrandsdálenii Vinstras bajás.

Ruoŧa gonagasain ledje ollu ustibat Norggas geat áinnas dáhtto buoridit norgga-ruoŧa Gonagasviesu ja Norgga gaskavuođa. Danin álggahuvvui ruhtačoaggin dan várás ahte hukset bartta norggabeale duottarguovlluide. Šloahttahálddašeaddji Hjalmar Welhaven – diktačálli bárdni – tevdnii Prinsehytta, ja bargu álggahuvvui 1900:s. Guokte jagi maŋŋá lei barta gárvvis ja addojuvvui skeaŋkan Prinssaide Gustaf Adolf, Wilhelm ja Erik.

Prinsehytta adnojuvvui viššalit bivdima ja olggustallan oktavuođain gitta 1905 uniuvdnaloahpaheami rádjái. Maŋŋá eretluovvaneami Ruoŧas, de ii lean báiki šat anus, muhto go Ruvdnaprinsa Olav šattai válddálaš suoidnemánu 2. beaivvi 1924, de son oaččui dán báikki skeaŋkan ruoŧa Ruvdnaprinssas, Gustaf Adolfas.

Álgoálggus lei dát Prinsabarta stuora dimbbarbarta mas ledje gávcci lanja ja leapmafeaskkir olggobealde. Go Ruvdnaprinsa Olav válddii dan háldosis, de huksejuvvojedje eanet viesut ja dálá Gongasbára ráđđenáiggis leat vel eanet visttit huksejuvvon. Dál leat dán báikkis guokte šilju main leat čoahkkálaga viesut – bures heivehuvvon eatnamii ja lundui. Gonagasbearaš lea dán báikkis beassážiid ja bivdináiggi čakčat.

Arkitektuvra

Go Prinsehytta huksejuvvui, de lei Sikkilsdal juo dovddus heasttaid luoitinbáiki. Dát árbevierru lea doalahuvvon gitta min dálá áigái. Dán historjjálaš guovllus lea Prinsehytta viiddis eatnamiin várevuolde, jávri vel vuolábealde.

Barta nu go dat lei álgoálggus, ja barttat mat dađistaga leat huksejuvvon, leat ráhkaduvvon dimbaris ja muhtumat meahccemuorain. Seainnit leat darvaduvvon bihkain ja barttain leat árbevirolaš lásenoarvvit málejuvvon vielgadin. Dáhkiin leat ráktogeađggit dahje darffit.

Olles dán báikái gosa Prinssabarttat leat huksejuvvon, leat huksejuvvon viesut main lea iešguđetlágan doaibma, ja dat leat čohkkejuvvon šiljuide. Dát viessohuksen, sihke nu movt dat leat lágiduvvon, hábmejuvvon ja huksenvuohki, ovddastit árbevirolaš sajáiduvvan norgalaš huksenmálle.

 

09.02.2015

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas