Hopp til hovedinnhold

Statsrådsalen

Stáhtaráđđi čoaggana Šlohttii dábálaččat juohke bearjadaga diibmu 11.00. Čoahkkimis čohkkeda stáhtaministtar Majestehta Gonagasa olgeš beallái. Dat eará stáhtaráđit biddjojuvvojit čohkkát árvoortnega mielde birra Gonagasa beavddi.

Gonagas Haakon VII áiggi sirdojuvvui stáhtaráđđesála vulos vuosttaš etášii. Arkiteaktavieljašguovttos Carl ja Jørgen Berner oaččuiga bargun heivehit dan boares váktasála Dronnetásodagas ođđa doibmii nugo stáhtaráđđesála. Ovdal dien de lei stáhtaráđđesála Gonagasásodaga almmolaš bealis nuppi etášas, dan lanjas mii dál lea Majestehta Gonagasa bargo- ja audiensalatnja.

Hábmen

Álgoálggus lei Linstow sárgon váktasála mas lei ruvttuiguin ráhkaduvvon ja hervejuvvon rohpi. Go rievdadišgohte lanja stáhtaráđđesálan, de ollašuhtte viimmat robi nugo arkiteakta dan lei álggos jurddašan ráhkadit.

1990-logus mearriduvvui ahte stáhtaráđđesála fertejedje stuoridit go dan lanjas ii lean doarvái sadji. Dan hástalusa čovde dan láhkái ahte njeide seainni mii lei ovdasála vuostá das bálddas. Dálá stáhtaráđđesála lea ge dasto ráhkaduvvon nu ahte guokte lanja leat biddjojuvvon oktii. Go lanjaid bidje oktii, de válljejedje ahte eai viiddit ruvttuiguin ráhkaduvvon robi nu ahte gokčá olles dan stuoriduvvon lanja. Boares ovdasála doalahii ge dasto iežas násttiiguin hervejuvvon robi mii das juo lei ovdalaččas, maid arkiteakta Arnstein Arneberg lei herven 1950-logus. Nu oaidnit ge čielgasit ahte dien guovtti lanjas álgoálggus leat leamaš goabbatlágan funkšuvnnat.

Gonagas Olav ráđđenáiggi lei latnja fiskat, láseliinnit ruoksadat ja stuoluin lei rukses olggoš. Sála divodanbargguid oktavuođas 1990-logus málejuvvo seainnit, láseliinnit lonuhuvvo ja stuoluide molso olggožiid, ja de šadde latnjii dat ivnnit mat das dál leat; alit, vielgat ja golli. Ivnnit deattuhit lanja formálalašvuođa.

Gonagasa beavddis

Majestehta Gonagasa truvdnostuolu lea tevdnen šloahttaarkiteakta Linstow 1840-jagiin. Stuollu ráhkaduvvui Ruoŧas arkiteavtta tevnnegiid mielde, ja das leat ođđabarohkka stiilaelemeanttat.

Ruvdnaprinssa stuollu lea ođđaseabbo. Dat geavahuvvo dušše de go Majestehta Gonagas ja Gonagaslaš Allavuohta Ruvdnaprinsa goappešagat leaba stáhtaráđi čoahkkimis mielde. Go Ruvdnaprinsa jođiha stáhtaráđi Gonagasa ovddas, de son čohkká Gonagasstuolus.

Dat eará originála stuolut ráhkaduvvojedje 1880:s, ja lei snihkkármeasttir Schrøder gii ráhkadii daid Gonagas Oscar II stáhtaráđđelatnjii 2. etášas. Stuolut leat dál divoduvvon seamma dološ málle mielde, ja daidda leat gorrojuvvon heastašuovkkas olggožat alit ivnnis. Maŋemus jagiid leat ollu ođđa stuolut boahtán latnjii, dat leat ráhkaduvvon juste seammaláganin go dat boares stuolut. Sivvan manne lea leamaš dárbu eanet stuoluide, lea go stáhtaráđiid lohku lea lassánan ráđđehusas.

Beavdi lea ráhkaduvvon cubamahognys, ja maiddái dan lea snihkkármeasttir Schrøder ráhkadan. Dađimielde go stáhtaráđiid lohku lea lassánan, de lea beavdi maid guhkiduvvon. Boarraseamos oassi beavddis lea Gonagasa truvdnostuolu bealde. Dan oasis beavddis leat lođát main stáhtaráđit álggos lávejedje vurkkodit báhpiriid ja čállinbiergasiid.

Lágain galgá riika huksejuvvot

Stuora jugendstiila čuovgaruvnno lea tevdnen arkiteakta Jørgen Berner. Dasa lea čállojuvvon ”Med lov skal land bygges” gollehuvvon bustávaiguin. Dat sániid leat váldojuvvon Frostatinglágas, mii čállojuvvui sullii 1260:s.

Guđege čiegas heaŋgájit goaikkanashámát lámppát maid Høvik Lyls ja Hadeland Glassverk lea vásetin dan atnui ráhkadan. Čuovggaid hápmi čuovvu dan boares čuovgaruvnno hámi.

Dáiddalaš čiŋaheapmi

Stáhtaráđđesála máleriijat čalmmustahttet dehálaš dáhpáhusaid monárkiija historjjás maŋŋá uniuvdnabieđganeami:

  • Kong Haakon på norsk grunn 25. november 1905
    Gova lea málen Halvdan Strøm ja dat lei skeaŋkan Norges Industriforbundas ja Norges Rederiforbundas Gonagas Haakonii skábmamánu 25. beaivvi 1930.
     
  • Kong Haakon avlegger ed i Stortinget 27. november 1905
    Gova lea málen Harald Dal ja dat diŋgojuvvui Gonagas Haakon VII 50-jagi regeanta ávvudeapmái 1955:s.
     
  • Kongefamiliens hjemkomst 7. juni 1945

Gova lea málen Axel Revold ja dat addojuvvui skeaŋkan Norgga ráđđehusas 40-jagi ávvudeapmái skábmamánu 25. beaivvi 1945. Uvssa guovttebealde mii manná vilges saloŋgii, leat Gonagas Haakon VII ja Gonagas Olav V portreahtat, ja daid leat ráhkadan Karl Steffensen Kjær ja Ottar Espeland. Go Gonagas Harald V doallá stáhtaráđi Šloahtas, de sus leat iežas áhči ja ádjá portreahtat goabbat bealde.

09.11.2012

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas
Gonagas Harald muitala mánáide Stáhtaráđđečoahkkinsála birra (Govva: NRK)