Gonagasskiippa geavaheapmi

Oassi skiippa doaimmain lea čadnon Gonagasa borjjastangilvvohallamiid oassálastimii. Stuora internašunála borjjastemiin geavaha Gonagas skiippa básan. Maŋemus jagiid lea Gonagas Harald leamaš mielde ollu borjjasgilvvuin eurohpalaš áhpeguovlluin.

Majestehta Gonagas ja Majestehta Dronnet geavaheaba maid Gonagasskiippa almmolaš dilálašvuođain Norggas ja olgoriikkain.

Govva: Håkon Mosvold Larsen, NTB scanpix

Earenoamáš dilálašvuođat

Gonagasbearaš geavahii Gonagasskiippa sihke Gonagas Harald ja Dronnet Sonja sivdnádallanmátkkis Lulli-Norggas 1991:s, ja Gonagasmátkkis Davvi-Norggas maŋit jagi. Go Gonagasbárra ávvudii iežaska 60-jagi beivviid 1997 geasi, serve ávvudeapmái gonagaslaš guossit miehtá Eurohpa. Guossit bovdejuvvo borjjasmátkkái Troandimis Lofotenii, ja sii orro Norge Gonagasskiippas, dánska gonagasskiippas Dannebrog ja KNM Horten mearrasuodjalusfatnasis.

Gonagasskiippa geavahuvvui maid Gonagas Olav V sivdnádallanmátkkiin 1958:s ja 1959:s.

Bearráigeahččan

”Norge” skiippa bearráigeahččan lea stuora bargu, sihke deahkka ja mašiidna galget gozihuvvot, dan bargá skiippa bargoveahka dálvvi áigge. Skiippa gullá Veritas’ bearráigeahču vuollái.

Bargoveahka

1947 Gonagaslaš resolušuvdna dadjá ahte skiippa bargoveahka, jođiheapmi ja bearráigeahčču gullá Suodjalussii.

Govva: Vidar Ruud, NTB scanpix

Geasi áiggi barget skiippas sullii 50 olbmo. Dálvvi áiggi geahpeduvvo bargoveahka gitta sullii 25 olbmui. Bargun dalle lea eanas fákten ja bearráigeahččan. Guovvamánus oažžu skiipa ođđa vearjogeatnegasaid geat čađahit teorehtalaš ja praktihkalaš oahpu ovdal go geasseáigi álggahuvvo.