Hopp til hovedinnhold

Loahpaheigga Sel suohkanis

Sel suohkan lei maŋemus bisánanbáiki Ruvdnaprinsabára dán jagi fylkkamátkkis. Dáppe ledje sudnos somás deaivvadeamit sihke smávváiguin ja stuorráiguin – ja njealjejuolggagiiguin – Glittersjå báikkis Heidalas.

19.09.2019

Glittersjå nammasaš báikkis besset guossit hui lahka elliid. Muhtun eallit leat dábálaš eallit norgga váriid oapmedoaluin, muhto doppe leat maid eksohtalaš eallit – ja maiddái dakkárat maid ii oba ipmirdivčče ge dáppe beassat oaidnit.

Glittersjå Hege Thorson Nordskar viežžá gussiid ponnivovnnain. Govva: Marius Gulliksrud, Stella Pictures

Oapmedálu visttiid birra vázzet ollu eallit, eanas dakkár šibitnálit mat leat leamaš dábálaččat norgga oapmedáluin. Dáppe leat ponnit ja dološnálát heasttat, dološ nálát sávzzat ja Gotlanda sávzzat, gusat ja vildaspiinnit. Dáppe beassá kaniinnaide buorranaddat ja fitnat njoammelvuovddis. Dáppe lea maid guovžavuovdi, muhto doppe gal leat dušše muoras ávnnastuvvon guovžžat, maidda ii leat várálaš lahkonit.

Ruvdnaprinsa Haakon ja Ruvdnaprinseassa Mette-Marit beasaiga dearvvahit muhtun elliid.

Ruvdnaprinsabárra dearvvaheaba muhtun beatnagiid. Govva: Stian Lysberg Solum / NTB scanpix

Ruvdnaprinseassa Mette-Marit dearvvaha kaniinnaid. Govva: Marius Gulliksrud, Stella Pictures

Lassin šibihiidda, lea dállodoalus maid ealgabearaš mas leat njeallje ealgga. Sis lea sin iežaset guovlu, mii lea birrasii 50 mihtu viiddu. Doppe sii guhtot rásiid, smávva beziid ja dakŋasiid. Muhto juohke beaivvi ožžot sii maid olles guorpmi skáhpelasttaid ja sieđgalasttaid, ja daidda gal liikojit earenoamáš bures.

Ruvdnaprinsabárra dearvvaha "vuvddiid gonagasa". Govva: Stian Lysberg Solum / NTB scanpix  

Ruvdnaprinsabárra dearvvahii "vuvddiid gonagasa", ja soai beasaiga maid gullat ealgabivddu birra ja čájehedje maid masa ealgga sáhttá geavahit.

Loahpaheigga Heidalvuosttáin

Glittersjåas vulggii Ruvdnaprinsa Haakon Heidal vuostáráhkadanbáikái, gos beasai oahppat eambbo dien árbevirolaš biebmoráhkadeami birra. Ja diehttelas beasai son máistet Heidalvuosttá maid, ja oaččui vel albma fiinna vuosttá skeaŋkan:

Soađi vuolde sáddejuvvui ruškesvuostá skeaŋkan Gonagas Haakonii. Biigá Mari Stormyrengen ráhkadii vuostálihti 1942:s. Dállodoalli Finn Seiersted, gean biigán Mari lei, válddii vuosttá mielde Osloi, ja doppe dat sáddejuvvui Gonagassii guhte lei Londonis. Odne oaččui Ruvdnaprinsa vuosttá skeaŋkan Heidal vuostá ráhkadeddjiin.

Vuostábáikkis doalai Ruvdnaprinsa dán jagi fylkkamátkki maŋemus sártni:

- Dál letne ollen dán golmmabeaivásaš ovddolaš máinnasmátkki loahpageahčái, dáppe min riika váimmus. Moai Ruvdnaprinseassain dovde stuora giitevašvuođa buot dan ovddas maid letne beassan vásihit. Dan dihte go eallit ná čáppa eatnamis, ovttas kreatiiva olbmuiguin, geain lea nu gierdavašvuohta, nuppástuhttinnávccat ja olmmošvuohta. Lea ovddolaš beassat mátkkoštit ja vásihit olbmuid ráhkisvuođa iežaset ruovttubáikái – ja oaidnit nu stuora eaktodáhtolašvuođa ja ealáhusaid ovddidanmáhtu, mii vuolgá juste dán ruovttubáikki ráhkisvuođas.

Ruvdnaprinsabárra Sel suohkanis. Govva: Marius Gulliksrud, Stella Pictures

- Gudbrandsdalen ja dán báikki duottarguovllut muittuhit midjiide agálaš bistevašvuođa, mii guoddá áiggiid čađa. Guhkes, guhkes áiggiid. Das lea juoga hui oadjebas, ja seammás maid nu mearálaš. Ollu riikkain lea ollu čáppa luondu, muhto dáppe Norggas leat mis lihkus návccat suodjalit luonddu – ja láhčit dili nu ahte olbmot besset geavahit luonddu ja vánddardit mehciin buori lági mielde – sihke gesiid ja dálvviid.


Nie giittiiga Ruvdnaprinsa ja Ruvdnaprinseassa ollu fiinna vásáhusaid ovddas Opplandas. Ja nu loahpahii ge Ruvdnaprinsabárra fylkkamátkki dies Sel suohkanis.

 

 

 

 

Kronprins Haakon og Kronprinsesse Mette-Marit besøkte seks kommuner i Oppland i løpet av tre dager i september 2019. Reisen gikk til Dovre, Lesja, Skjåk, Lom, Vågå og Sel. Foto: Simen Løvberg Sund, Det kongelige hoff

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas