Ruvdnaprinsabárra Skjåk suohkanis

Ottačázadat golgá čađa Ottavákki, ja addá vejolašvuođaid sihke ealáhusaide ja astoáiggidoaimmaide Skjåk suohkanis. Muhto johka sáhttá maid leat hástaleaddji. Golggotmánus 2018 šattai veaháš heahtedilli, go Ottačázadat dulvvai badjel buot rájiid. Ain dál dovdojit dan dulvvi mearkkat. Dan birra beasai Ruvdnaprinsa Haakon gullat vel eanet go finai Ofossen Mølle báikkis odne.

Sátnejođiheaddji Elias Sperstad muitalii Ruvdnaprinsa Haakonii 2018 dulvvi birra mii čuzii Skjåk suohkanii. Govva: Marius Gulliksrud, Stella Pictures

Arvedálkkit mat suddadedje muohttaga hui johtilit, dagahedje ahte johka dulvvai oanehis áiggis badjel mehtera. Ollu viesut šaddá čáhcái, ja čáhci leavai stuora bartabáikki birra, go dulvi doalvvui Dyringšalddi. Sátnejođiheaddji Elias Sperstad muitalii dulvvi birra ja čájehii govaid dulvvis.

- Din dilli čuozai duođas min dovdduide ja mii čuovuimet dárkilit din dili diibmá čakčat go lei vearrámus dulvi dáppe, logai Ruvdnaprinsa Haakon sártnistis maid doalai maŋŋelaš seamma beaivvi. - Mii čuovuimet din bargguid, din duostilvuođa, ja oinniimet jáhkkemeahttun govaid – ja maŋŋil dulvvi fas din áŋgiris bargguid – mat eai leat vel oalát loahpahuvvon.
- Dieđán man ollu dat lea gáibidan eatnasiin dis, ja galgabehtet muitit ahte mii ovddošit dan mot dii lehpet hálddašan dan dili ja man ollu lehpet bargan.

Maŋŋelaš seamma beaivvi beasai  Ruvdnaprinsabárra dearvvahit Signe ja Torvald Bakken, geat šattaiga guođđit iežaska viesu 2018 dulvvis – ja Rukses Ruossa bargiid geat ledje mielde gádjunbargguin.

Ruvdnaprinsabárra dearvvaha Rukses Ruossa bargoveaga geat ledje mielde 2018 dulvvi gádjunbargguin. Govva: Stian Lysberg Solum / NTB scanpix

Ofossen Mølle

Ofossen Mølle buvttada mearkagálvvuid Skjåkmjøl/Skjåkjáffuid ja Skjåkgryn/Skjåkrievnnaid. Sii geavahit aivve báikkálaš ávdnasiid, dan guovllu eanadoaluid jáffuid ja rievnnaid. KSL Matmerk lea addán Skjåkmillu fitnodaga buktagiidda “Norgga spesialitehta” steampila.

Ofossen vuosttaš millu ceggejuvvui juo 1875:s, ja dan rájes lea millu leamaš čađat doaimmas. Ruvdnaprinsa Haakon beasai oaidnit dálá buvttadanlanjaid, ja beasai maid máistet bivgerievdnabuvrru, mii lea earenoamážit dán báikki borramuš.

Rafting

Rafting lea aktivitehta masa ollugat liikojit, ja Ottajohka heive dasa bures, ja maiddái eará čáhcefalástallamiidda. Ruvdnaprinsabárra gal bisuiga gáttis, muhto leigga gal  geahččame raftingolbmuid. Ledje Skjåk Adventure raftingolbmot geat čájehedje mot galgá raftet.

Skjåk Adventure čájeha rafting i Ottas Ruvdnaprinsabárrii. Govva: Guri Varpe, Gonagaslaš hoavva

"Skjåk čáhci"

Ofossen Millus jotkkii mátki Bismoi, mii lea Skjåk hálddahusguovddáš, ja lei Jotunheimen Veteránavuddjiidsearvi mii sáhtostii. Doppe finai Ruvdnaprinsabárra Skjåk mánáid- ja nuoraidskuvlla.

Ruvdnaprinsabárra olle Skjåk mánáid- ja nuoraidskuvlii. Govva: Stian Lysberg Solum / NTB scanpix

Skuvllas beasaiga Ruvdnaprinsa ja Ruvdnaprinseassa geahčadit ohppiidbargguid mat ledje biddjon čájáhussan. Bargguid fáddán lei "Skjåka čáhci", ja dain čájehedje iešguđet beliid gili ja joga oktavuođas – buriid ja heajut beliid. Rektor Trude Teigen čájehii skuvlla Ruvdnaprinsabárrii, ja sii fitne maid earenoamášpedagogihka ossodagas ja stoahkanbáikkis.

Ruvdnaprinsa Haakon čujuhii ge joga oktavuhtii sártnistis maid doalai guossástallama loahpas:

- Čáhci mii muhtomin dagaha stuora váttisvuođaid, go beare ollu boahtá oktanaga, lea maid seammás buot eallima bajásdoalli – nugo dii maid lehpet dáppe Skjåkas duođaštan, ja lehpet maid ollu dainna bargan. Lea hui buorre beassat oahppat eambbo čázi birra, sihke ealáhusaid ovddideami dáfus ja maiddái mot jogas sáhttá raftet.

Ruvdnaprinsabárra ságastallamin ohppiiguin Reodor Bruland (6) ja Heidi Jevnheim Skjåk mánáid-ja nuoraidskuvllas. Govva: Stian Lysberg Solum / NTB scanpix

Ja go leigga spihkebiergguin ja suvrralákcabuvrruin ožžon vuoimmi, de vulggiiga Ruvdnaprinsa ja Ruvdnaprinseassa viidáseappot boahtte bisánanbáikái dán fylkkamátkkis: Lom

Aktivitehtat Lom suohkanis