Hopp til hovedinnhold

Majestehta Gonagasa vuođđolágalaš sadji

Majestehta Gonagasa geatnegasvuođat leat eanas dat ahte galgá ovddastit ja čuovvut seremoniijaid. Go Vuođđolága bustávva ain cealká ahte mearrideaddji fápmu lea Gonagasa hálddus, de dat mearkkaša otná dilis ahte dat lea Ráđđehusa hálddus.


Gonagas doaimmaha Stuoradikki almmolaš rahpama juohke čavčča, ja sus lea dehálaš bargu go ráđđehus molsašuvvá ja son jođiha Stáhtaráđi juohke bearjadaga Gonagaslaš šloahtas. Gonagas ja Dronnet fitnaba stáhtaguossástallamiin olgoriikkain ja soai vuostáiváldiba olgoriikkaid stáhtaoaivámuččaid go sii bohtet min riikii guossin. Lea Gonagas gii vuostáiváldá amas riikkaid ambassadevrraid Oslos go sii buktet iežaset dovddusindahkanreivviid allaáiggalaš audieanssas Šloahtas. Sus lea generáladássi Eanansuodjalusas ja Áibmosuodjalusas ja lea Mearrasuodjalusas admirála, ja son lea riikka bajemus befálaolmmái.


Beaivválaš bargguide Gonagaslaš šloahtas gullet maid audieansat, ovdanbuktimat, ságastallamat stáhtaministariin, olgoritministariin ja Suodjalusa ovddasteddjiiguin. Gonagas fitná dávjá priváhta ja almmolaš institušuvnnain iežas mátkkiin miehtá riikka.