Njuike váldosisdollui

– Mii juogadit vuđolaš árvvuid

Cealkinfriddjavuohta lea nanus sihke Norggas ja Nederlánddas, ja goappašat riikain lea vašalaš cealkámušaid vuosttildeapmi guovddážis. Nuorra servodatjienat deaivvadedje seminárai ja digáštallamii Bjørkvikas distat ovdalgaskabeaivve.

10.11.2021

Majestehtat Gonagas Harald, Dronnet Sonja, Gonagas Willem-Alexander ja Dronnet Máxima oasálaste doaluin maid almmolaš eiseválddit, nederlándda organisašuvdna TMI (Too Much Information) ja Norgga kampánja Stopp hatprat, lágidedje.

Gonagas Willem-Alexander ja Gonagas Harald boahtiba Deichmanai, Bjørvikas.

Dát seminára lei vuosttaš doaibma Nederlánddalaš stáhtagalledeami nuppi beaivve.

Nuorra jienat cealkinfriddjavuođa ovddas

Oasseváldit iešguđetge beroštus-ja nuoraidorganisašuvnnain, earret eará njuoraidbellodagain, deaivvadedje digaštallat cealkinfriddjavuođa ja mot vuosttildit vašalaš cealkámušaid otná digitála servodagas. Ovddeš ođaslohkki Mah-Rukh Ali jođihii seminára man kultur- ja dásseárvoministtar Anette Trettebergstuen loahpahii.

Nuoraidambassadevra Amanda Anvar Stopp hatprat-organisašuvnnas rabai seminára. Govven: Simen Løvberg Sund, Gonagaslaš hoavva

Seminára lágiduvvui Oslo ođđa váldogirjerádjosis, mii árabut dán čavčča nammaduvvui máilmmi buoremus álbmotgirjerájusin riikkaidgaskasaš girjerájusorganisašuvdna IFLA bokte. Girjerádjosa hoavda Knut Skansen muitalii girjerádjosa birra Gonagasbáraide.

Árvvuid searvevuohta nanus

Iežas sártnis Gallamállásiin Šloahtas mánnodat eahket, válddii Majestehta Gonagas Harald ovdan Norgga-Nederlándalaš searvevuođa árvvuid dáfus ja ahte lea dárbu digáštallamii láhčit dili gos árvvusatnin ja gudnejahttin lea vuođđun.   

– Mii leat rabas, ođđaáigásaš demokratiijat mat juogadit vuđolaš árvvuid ja beroštumiid, logai Gonagas sártnis.

"Mii eallit dál máŋggadáfot máilmmis ja fertet árvvusatnit ahte mii leat máŋggaláganat. Dat lea áibbas mearrideaddji midjiide ahte oahppat mot ovdanbuktit iežamet sierraláganvuođaid rahpasit digaštallamiin - sániid bokte, ii ge veahkaválddálašvuođain." Gonagas Harald.

– Mii eallit dál máŋggadáfot máilmmis ja fertet árvvusatnit ahte mii leat máŋggaláganat.  Dat lea áibbas mearrideaddji midjiide ahte oahppat mot ovdanbuktit iežamet sierraláganvuođaid rahpasit digaštallamiin - sániid bokte, ii ge veahkaválddálašvuođain, deattuhii Gonagas Harald ja rámidii seammáš Nederlándda gongasbára rahčamušaid deaivvadit ja guldalit ovddasteddjiid main leat sierra álginsajit. 

Ráđđehus bovdii beaiveborramušaide

Maŋŋelgaskabeaivve deaivvadeigga Gonagas Willem-Alexander ja Dronnet Máxima stáhtaministariin Jonas Gahr Støriin, ja dan maŋŋel lei ráđđehusa beaiveborramuš nederlándalaš gonagasbára gudnin.

Ráđđehus lágidii beaiveborramušaid Akershus ladnins stáhtagalledeami gudnin. Govva: Patrick van Katwijk, NTB

Gonagas Harald, Dronnet Sonja ja Gonagasaš Allavuohta Ruvdnaprinseassa Mette-Marit maiddái oasálaste dáid mállásiin, gos Gonagas Willem-Alexander ja Norgga stáhtaministtar iežaska sartniin deattuheigga ahte dán guovtti riikas lea lagas oktavuohta.

Gonagas Willem-Alexander ja eará gonagaslaš guossit vuolláičálle Akershusa guossegirjji. Govva: Patrick van Katwijk, NTB

Suodjalusovttasbargu

Maŋŋel galledii Ruvdnaprinseassa Mette-Marit ovttas Nederlándda gonagasbárain nederlándalaš marinafatnasa  HMS Rotterdam. Dát lea amfibiefievru mii hárjehalla Norgga mearraguovlluin ja lea dál Revierkáijas  Oslos.  Fatnasis lei alladásičoahkkin suodjalusovttasbarggu birra, ja dán čoahkkima ovdal ledje vuostáiváldindoalut Norgga nederlándalaš birrasa várás.

Gonagas Willem-Alexander, Dronnet Máxima ja Ruvdnaprinseassa Mette-Marit HMS Rotterdam fatnasis. Govva: Robin Utrecht / Dana press

MUNCH

Eahkedis leigga Gonagas Harald ja Dronnet Sonja guossin doaluin ođđa MUNCH visttis. Gonagas Willem-Alexander ja Dronnet Máxima bovdiiga konsertii nederlándalaš  cellistain Harriet Krijgh.

 Eahkedis leigga Gonagas Harald ja Dronnet Sonja guossin doaluin ođđa MUNCH visttis.

Fáktadieđut

Stáhtagalledeapmi Nederlánddas

Stáhtaguossástallan skábmamánu 9. beaivves 11.beaivái 2021 ii leat Gonagas Willem-Alexander ja Dronnet Máxima vuosttaš galledeapmi Norggas, muhto lea vuosttaš stáhtagalledeapmi.

Gonagas Willem-Alexanders eadni, Dronnet Beatrix, lei stáhtagalldeamis Norggas guktii, jagiin 1986 ja 2010.

Nederlándda Dronnet Juliana ja Prinsa Bernhard leigga Norggas stáhtagalledeamis jagis 1953 ja Dronnet Vilhelmina jagis 1922.  Dalle lei Gonagas Haakon gii sávai buresboahtima.

Seamma lágiin leat leamaš njealjje stáhtagalledeami Norggas Nederlándii. Stáhtagalledeamit čalmmustahttet lagas oktavuođa gaskal Norgga ja Nederlándda.

Gonagas Haakon, Prinsa Harald, Ruvdnoprinsa Olav ja Prinseassa Astrid sevvet mana dearvan Dronnet Julianai maŋŋel stáhtagalledeami jagis 1953. Govven: Jan Stage/NTB

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas