Hopp til hovedinnhold

Nationála muitodoalut Oslo Spektrumas

Majestehta Gonagas Harald sárdnidii muitodoaluin Spektrumas duorastat eahkeda. – Lea mu doaivva ahte sáhttit veahkehit guhtet guimmiideamet eallit dainna maid leat oahppan suoidnemánu 22. beaivvi vásáhusas juohke beaivvi, juohke dáfus, Gonagas dajai.

22.07.2021

- Seammás fertet servodahkan dovddastit ahte mii guhkkin eret leat nagodan doarvái bargat fuomášit, veahkehit, noađi ovttas guoddit – ja vuosttaldit seavdnjadasa fámuid. Dat dagaha mu morrašii. 

Gonagas Harald lei otná eahkeda váldosárdnideaddji, doaluin gos ledje iešguđetge sártnit ja musihka, ja filmmat mat čájehedje sin vásáhusaid geasa garrasepmosit dáhpáhusat čuhce; sii geat besse heakkas, maŋisbáhccit ja veahkit geat muitaledje iežaset vásáhusaid birra. Sihke Gonagasbárra ja Ruvdnoprinsabearaš ledje muitodoaluin.

Stáhtaministtar Erna Solberg lei lávddi vuosttáš sárdnideaddji eahkeda doaluin. - Odne muittašit daid 77 geat ain livčče galgan dás. Geat livčče galgan riikka riggodahttit. Čuvggodahttán beivviid. Mii giitit din geat leiddet veahkkin heakkaid gádjut, sihke Oslos ja Utøyas, dajai stáhtaministtar. 

Čuovga lea gievrrat go seavdnjadat

- Logi jagi leat vássán das rájes go Norga šattai seavdnjadassii. Šohkka, moraš ja suhttu čuozai midjiide buohkaide. Šohkka dan dihte go ná sáhtii dáhpáhuvvat min gaskkas. Moraš gottáhallan olbmuid ja billašuvvan eallimiid dihte. Suhttu fámuid dihte mii dagahii dán.

Nu álggahii Gonagas Harald iežas sártni eahkes.

Video: Gonagas Harald. Govva: NRK

- Davás gitta lulás ellet váhnemat geat čađat guddet nuorra olbmo muitu váimmus. Oappát ja vielljat geain álohii váilo viellja dahje oabbá. Obmot geat ohccálit eatni dahje áhči, irggi dahje moarsi, ustiba dahje kollega.

Muhto čuovga lea gievrrat go seavdnjadat, Gonagas dajai. Čielgasit boahtá oidnosii go oaidná makkár vuorddekeahtes vuoibmi juohkehačča siste lea:

- Go geahččan máŋgasiidda geat besse heakkas dan beaivvi, imaštan mas sii leat ráhkaduvvon. Ollugat sis áŋgiruššet, nuoraiguin miehta riikamet, vai Norggas šattašii buohkaide buorre eallit. Diet čájeha midjiide ahte čuovga lea gievrrat go seavdnjadas.

Lea mu doaivva ahte sáhttit veahkehit guhtet guimmiideamet eallit dainna maid leat oahppan suoidnemánu 22. beaivvi vásáhusas juohke beaivvi, ja juohke dáfus. Seammás fertet servodahkan dovddastit ahte mii guhkkin eret leat nagodan doarvái bargat oaidnin dihte, veahkehit, noađi ovttas guoddit – ja seavdnjadasa fámuid vuosttaldit. Dat dagaha mu morrašii. - Gonagas Harald.

Dán muitobeaivvi bokte bođii ovdan dárbu fallehemiin oahppat ja vuosttaldit vaššidadjamušaid, rasisma ja ekstremisma. 

- Našuvdnan lea mis oktasaš ovddasvástádus ođđa buolvvaide oahpahit suoidnemánu 22. beaivvi dáhpáhusas, Gonagas Harald dajai. Dan mii leat velggolaččat bargat buot gottáhallamiidda, maŋisbáhcciide, sidjiide geasa čuozai – ja alcceseamet. Sihke šaddan dihte buoret olmmožin, viisáset álbmogiin šaddan dihte, ja bargan dihte Norgga šaddat vel buorebut servodat min maŋisboahttiide.

- Riikamet lea huksejuvvon vuođu ala mas buot olbmuin lea seamma árvu. Lea huksejuvvon sátnefriddjavuođa ala. Lea huksejuvvon vuođu ala mii gierdá sierramielalašvuođa ja ohccá kompromissaid. Min vuođđu ii rievdan maŋŋel suoidnemánu 22. beaivvi 2011:s. Buot dat lea ain min Norgga dovdomearkkat odne nai.

- Dan maid divrasit leat oahppan suoidnemánu 22. beaivvis lea earet eará: Ahte fertet čuollat ovttaárvosašvuođa ja olmmošvuoigatvuođaid beali. Ahte fertet doahttalit ahte mii leat iešguđetláganat. Ahte fertet ráhččat dan ala masa mii oskut – ráfálaš gaskaomiiguin.

Maŋŋel Gonagasa sártni, ođđa buolva AUFa miellahtut lohke daid 77 olbmo namaid geat gottáhalle terrorfalleheamis dan beaivvi.

Sierramielalašvuođa

Demokratiija dovdomearka lea earet eará gierdat sierramielalašvuođa ja iešguđetlágánvuođaid veahkaválddálašvuođa ja hárdima haga. Osku- ja eallinoainnuservodaga ovttasbargoráđi searvvis leat olbmot iešguđetlágan religiovnnain ja oskuservodagain – lea sihke osku ja eahpádus. Ráđi generálačálli Ingrid Rosendorf Joys ságastalai Rima Irakiin gierdilvuođa ja sierramielalaš-oktavuođa birra. 

 Osku- ja eallinoainnuservodaga ovttasbargoráđis leat olu iešguđetlágan religiovnnat ja jáhkut. Govva: Fredrik Hagen / NTB

Bargiidbellodaga stáhtaministtar máŋggaid jagi čađa, Gro Harlem Brundtland, maid galledii Oslo Spektruma eahkes. 

- Vašši sáhttá veahkaválddálašvuođa bohciidit. Badjelgeahččanvuohta sáhttá goddit. Dan fertet juohke beaivvi vuosttaldit, nu mot AUF dál gáibida, Brundtland dajai. – Jaskatvuohta ii ábut gokčat suoidnemánu 22. beaivvi dáhpáhusa, ii ge buot vaši mii gilvojuvvo sosiála mediain.

Gro Harlem Brundtland Spektrumas: Vašši sáhttá veahkaválddálašvuođa bohciidit. Badjelgeahččanvuohta sáhttá goddit. Dan fertet juohke beaivvi vuosttaldit, nu mot AUF dál gáibida. Govva: Fredrik Hagen / NTB

Eahkeda prográmmajođiheaddji, Rima Iraki,loahpasánit doaluin: 77 olbmo masse heakka suoidnemánu 22. beaivvi. Eat galgga eambbosiid massit. Govva: Fredrik Hagen / NTB

77 nuorra dánsejeaddjit iešguđetge skuvllain Oslos ja Vikenis loahpahedje muitodoaluid Oslo Spektrumas. Govva: Fredrik Hagen / NTB

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas