Hopp til hovedinnhold

Muittočalmmusteapmi suoidnemánu 22. beaivvi

Logi jagi áigge - suoidnemánu 22. beaivvi 2011:s – deaivvai okta dain vearrámus terrorfallehemiin Norggas nuppi máilmmisoađi rájes. Beaivi muittuhuvvo moanat doaluin odne, ja vuosttáš lei Ráđđehuskvartála olggobealde diimmu 09.00.

22.07.2021

Bomba Ráđđehuskvartálas ja falleheapmi Utøyas gottii 77 olbmo, ollugat sis ledje hui nuorat. Lei ja lea ain losses noađđi sidjiide geat besse heggii, bearrahiidda, ustibiidda ja kollegaide. Odne Norga muitá sin guđet goddojuvvojedje ja roasmmohuvve, ja cuiggoda vaši ja ekstremisma mii dagahii daguid. 

Čalmmusteapmi Ráđđehuskvartálas

Ráđđehuskvartála deaivvahalai álggos, go bomba bávkkehii høyblokka olggobealde. Gávcci olbmo gottáhalle ja logis šadde buohccivissui heakkavárra ja bahá roasmmehuvvama geažil. 

Tor Inge Kristoffersen, nubbijođiheaddji Suoidnemánu 22. beaivvi Nationála doarjjajoavkkus, sávai bures boahtima ja lei vuosttaš gii doalai sártni čalmmusteami vuolde. Su maŋis ges doarjjajoavkku jođiheaddji, Lisbeth Kristine Røyneland ja de Merete Stamneshagen guhte logai divtta "Til en sønn".

- Áigi ii dálkkut buot háviid, vaikko servodat dan vuordá, Røyneland deattuhii. Son bijai gažaldaga: Maid dat jápmit livčče min birra jurddašan? Maid mii servodahkan leat bargan daid fámuiguin mat dagahedje olmmošgoddimiid, lei maid guovddážis  AUF:a jođiheaddji Astrid Hoema sártnis.

- Buot vaššái sániin ii boađe terror, muhto buot terror álgá vaššái sániiguin. Lea beare maŋŋit vaššái sániid caggat maŋŋil go vašši lea juo beassan olbmo heakka váldit, dajai AUFa jođiheaddji Astrid Hoem. Govva: Geir Olsen / NTB

- Olbmuid juohkit "mii ja sii"-joavkkuide dagahii vaši ja olmmošgoddima, dajai Hoem, ja mii eat leat caggan dán vaši. Olmmošgoddi lei okta mis. Heakkavárálaš rasisma ja olgešekstremisma ain eallá. Buot vaššái sániin ii boađe terror, muhto buot terror álgá vaššái sániiguin. Lea beare maŋŋit vaššái sániid caggat go vašši lea juo beassan olbmo heakka váldit. Mii fertet dadjat ahte mii eat dohkket rasisma, eat dohkket vaši. Jus dan dahkat, soaitit sáhttit doallat lohpádusa “ii goasse ge šat suoidnemánu 22. beaivvi”.

Sártnistis Erna Solberg maiddái deattuhii man dehálaš lea vaši vuostá soahtat. Cielahit ja uhkidit lea áibbas dohkketmeahttun ja dan ferte cuiggodit, dajai stáhtaministtar. – Dehálaččamusa fertet hukset siskkáldasas - váibmoláđisvuođa ja gierdevašvuođa. 

77 nama

Buohkat čuoččahedje go lohke daid 77 gottáhallan olbmo namaid. Álggos daid gávcci Ráđđehuskvartálas, dasto daid 69 geat Utøyas gottáhalle. 

Lieđđebidjan gottáhallamiid muitobáikkis. Govva: Sven Gj. Gjeruldsen, Gonagaslaš hoavva

Njeallje rássebotnosa biddjoje daid jápmán olbmuid muitobáikki ovdabeallái. Stáhtaministtar, Gonagaslaš Allavuođat Ruvdnoprinsa ja Ruvdnoprinseassa, Astrid Hoem ja Lisbeth Røyneland njulgeje iešguđetge rássebotnosa báttiid ovdal minuvttalaš jaskatvuohta botkejuvvui Magnus Aannestad Oseth bokte guhte trumpehtain čuojai «Til ungdommen» (“Nuoraide”). 

Tor Inge Kristoffersen loahpahii seremoniija ovdal go Marthe Wang ges musihkain loahpahii.

Muitoipmilbálvalus Oslo duopmogirkus

Majestehtat Gonagas ja Dronnet leigga muitoipmilbálvalusas Oslo duopmogirkus, gosa eatnagat čoagganedje liđiid buktit terrorfalleheami beivviid maŋŋel.

Preses Olav Fykse Tveit álggahii seremoniija, ja Oslo bisma Kari Veiteberg doalai otná sártni. Jens Stoltenberg, guhte lei stáhtaministtar suoidnemánu 22. beaivvi 2011:s, sárdnidii:

- Terror deaivvai vigihemiid, muhto ii lean ávvirmeahttun, Stoltenberg dajai. Ulbmil lei AUFa ja Bargiidbellodaga deaivat. Sii gottáhalle iežaset oaiviliid dihte. Muhto ulbmil lei rievdadit riikamet veahkaválddálašvuođain. Danin falleheapmi lei olles Norgga vuostá.

- Sátnefriddjavuohta mearkkaša ahte sánit dievva vašiin bohtet ovdan. Čoavddus ii leat gáržžidit sátnefriddjavuođa, muhto geavahit dan. Mii fertet dadjalit vaši ja ekstremisma vuostá, deattuhii Stoltenberg.

Gintalcahkkeheapmi

Imam Senaid Kobilica álggahii gávcci gintaliid cahkkeheami:

- Mii čoahkkanit deike iešguđetge oskkuin ja eallinoainnuin. Vuosttažettiin mii leat buohkat olbmot, ja de muslima, risttalaš, buddhista, sikha dahje eará. Dál mii leat buohkat čoahkis, muitin dihte, ja gintaliid cahkkehit oktiigullevašvuođain oaffariiguin ja buohkaide geasa dat lea guoskan.

Senaid Kobilica ginttalcahkkeheami vuolde Oslo duopmogirkus. Govva: Torstein Bøe / NTB

Áirasat iešguđetge oskkus, AUF:as ja Dan nationála doarjjajoavkkus cahkkehedje gintaliid:

Mii cahkkehit gintaliid doaivaga dihte.
Olmmošvuođa ovddas.
Oktavuođa ovddas.
Buohkaide geat bajidit jiena ekstremisma ja vaši vuosta.
Vuoiggalašvuođa ja friddjavuođa ovddas.
Roahkkatvuođa ovddas.
Buohkaide geat ohcalit soapmása.
Vai mii eat goassege galgga vajálduhttit. 

Ipmilbálvalus loahpahuvvui diibmu 12.00. De čudje girkobiellut Oslo duopmogirkus ja girkuin miehta riikka. Dat bohtet čuodjat vihtta minuvtta.   

 Ollugat bukte liđiid ruvsobácci lusa Oslo duopmogirku olggobealde odne. Govva: Beate Oma Dahle / NTB

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas