Hopp til hovedinnhold

Polárahistorjá ja olu čáppa lávlun Hareidas

– Moai loahpahetne munno fylkkamátkki Sunnmøre čáppa guovddášsajis, Hareidas, dajai Majestehta Gonagas Harald sártnis maid doalai čáppa beaivvádagas ja seamma sárdnestuolus go su áhčči, Gonagas Olav, geavahii jagis 1986.

01.09.2022

Dát sárdnestuollu ráhkaduvvui vásedin dan galledeapmái ja 1000-jagi ávvudoaluide Hjørungavåg-riiddu muitun. Dát soahti dahje riidu lei árvideames jagis 986 ja Sunnmøres ain čalmmustahttet dán.

Lea vuosttaš geardde go Majestehta Gonagas ja Majestehta Dronnet galledeaba dán koaragili ja industriijasuohkana.

-Moai Dronnegiin letne guhká illudan boahtit galledit Hareida, mii dán vuoro lea maŋemus suohkan man galledetne dán fylkkamátkkis Møre ja Romsdalas. Ruvdnaprinsabárra lei dáppe fylkkamátkkis jagis 2012, ja gulaime olu rámi dan galledeamis, dajai Gonagas Harald sártnis man doalai Tusenårsplassen-šiljus Hareid guovddážis.

Loga Gonagasa sártni dás

Gulliver Gryt (10 jagi) geige liđiid Dronnegii ja Aminde Fiol Lillebø (6 jagi) skeŋkke Gonagassii girjji mas leat sárgumat. Govven: Lise Åserud, NTB

Mearkkašanveara organisašuvdnaeallin

Olles suohkana álbmot lei bovdejuvvon álbmotfestii ja guovllu mearkkašanveara organisašuvdnaeallin ivdnii prográmma. Musihkka-ja kulturskuvla álggagii šuoŋain “Mellom bakkar og berg”. Hareid Valástallansearvi deavdá 100 jagi dán jagi, ja čalmmustahtii dán ávvudeami turnačájálmasain. Báikkálaš rap-kollektiiva Kontrollert Kaos čuovvolii dasto albma “dološmállet”/“old school” rapain ja gilikoara lávllui “Tidt eg minnest”.

Hareid Valástallansearvi deavdá 100 jagi dán jagi, ja čalmmustahtii dán ávvudeami turnačájálmasain. Govven: Liv Anette Luane, Gonagaslaš hoavva

Ultraviehkki Therese Falk lea Hareidas eret ja lei vuosttaš gii doalai sártni. Logi jagis lea son čađahan nu eatnat go 100 maratona ja 60 ultraviehkama. Su sártni fáddán lei báikkálaš valástallan ja eaktodáhtolašvuohta.

Gonagas Harald gesii ovdan Therese Falk olahusaid su sártis ja logai ahte Hareid lea buorre ovddasteaddji eaktodáthtolašvuhtii dál go lea Eaktodáhtolašvuođajahki.

– Suohkanis leat badjel 50 doaimmalaš searvvi ja organisašuvnna, dát mearkkaša sullii okta searvi čuođi ássi nammii. Dát gal lea oalle mearkkašanveara, logai son. Gonagas maddái rámidii suohkanis stuora valljivuođa  doaimmaid ja surggiid dáfus.

Ealáhushistorjá Ishavsmuseet- dávvirvuorkkás

Gonagas ja Dronnet  jođiiga dasto viidáseappot Brandala Ishavsmuseet nammasaš museai gos gulaiga eanet njuorobivddu ja jiekŋaábijohtolaga birra mii vulggii Hareidas. Gilli lei guovddáš njuorjobivdui ja Vestlándda poláraekspedišuvnnaide mannan jahkečuođis. Váris guhto moskusat, jiekŋaguovžžaid vedde gáttis stáffuin ja morššat vuojadedje lahtti vuolde dan botta go vurde gávppi šaddat.

Gonagas ja Dronnet jođiiga dasto viidáseappot Brandala Ishavsmuseet nammasaš museai gos gulaiga eanet njuorobivddu ja jiekŋaábijohtolaga birra mii vulggii Hareidas. Govven: Lise Åserud, NTB

Jiekŋaahpefatnasis “Aarvak”  muitalii sátnejođiheaddji Bernt Brandal ovdalaš – ja dálá áigge polárahistorjjá ja ealáhushistorjjá birra.  Gonagas Harald ja Dronnet Sonja humadeigga maiddái otná viidáneaddji ealáhuseallima ovddasteddjiin. Stian Garnes muitalii DIMO fitnoaga birra, mii fállá hydraulistalaš vuogádagaid ja čovdosiid maritiima ealáhussuorgái. Jagis 1995 lei Garnes mohtorbargin Gonagasskiippas Norge, man Gonagasbárra geavahii dego ruoktun dán golbma beaivásaš fylkkagalledeamis Møre ja Romsdalas.

Loahpaheapmi vuostáiváldimiin

Maŋŋelgaskabeaivve bovdii Gonagas ja Dronnet lohpahandoaluide Gonagasskiippas. Sullii 70 guossi ledje bovdejuvvon, ja dát ledje ovddasteaddjit buot dain vitta suohkaniin gos Goangasbárra finai dáid beiivviid.

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas