Hopp til hovedinnhold

Loahpaheapmi Bergenis

Slovakia Presideanta, H.E. hearrá Andrej Kiska, loahpahii iežas stáhtaguossástallama Norggas odne. Gonagaslaš Allavuohta Ruvdnaprinsa Haakon lei su mielde maŋemus oasis guossástallanmátkkis, mii lei Bergenis.

06.06.2018

Presideantta ja Ruvdnaprinssa otná prográmmas ledje guokte guossástallanbáikki: Media City Bergen ja Bjerknes dálkkádagaid dutkanguovddáš.

Media City

Media City lea earenoamáš ovttasbargu mas leat fárus akademiija, ođđaásaheaddji teknologiijaindustriija, našuvnnalaš ja regionála mediaásahusat. Dán ovttasbarggus leat mielde badjel 100 mieldelahtu.

Bergen Universitehta lea ovttasbarggu akademalaš ovddasteaddji, doppe leat 240 studeantta geat lohket journalistihka, filbma ja tv-buvttadeami, ja media ja interakšuvdnadesign. Lohkan leat earenoamážit heivehuvvon teknologiija ja innovašuvnna hárrái.

Studeanttat ja universitehta ovddasteaddjit čájehedje Ruvdnaprinsii Haakonii ja Slovakia Presidentii muhtun doaimmaid maid guovddáš jođiha. Dan maŋŋil soai  finadeigga TV 2 falástallanstudios go leigga Media Citys.

Presideanta Kiska ja Ruvdnaprinsa Haakon TV 2 guossin. Govva: Sven Gj. Gjeruldsen, Gonagaslaš hoavva

Dieđut dálkkádatdutkama birra

Bjerknesguovddážis čájehedje Presidentii ja Ruvdnaprinsii mot ođđaáigásaš teknologiija dahká vejolažžan dutkat ovdalaš dálkkádatnuppástuvvamiid. Ođđa teknologalaš fuomášumiiguin lea dutkiide vejolaš "lohkat" dálkkádatnuppástuvvamiid guhkás maŋos áiggis, ja sii ožžot maid dieđuid dálkkádatrievdademiid birra mat dáhpáhuvve dalle go eatnamis dáhpáhuvve hui stuora rievdadusat, gaskal jiekŋaáiggi ja liegga áigodagaid.

Govva: Sven Gj. Gjeruldsen, Gonagaslaš hoavva

Professor Asgeir Sortberg geavahii Oslo 1952 olympiija dálvegilvvohallamiid, Lillehammer 1994  gilvvohallamiid ja čuoigan -MM Oslos 1982 ja 2011 ovdamearkan dálkkádatrievdademiide. Son geavahii maid diimmá sihkkel -MM Bergenis ovdamearkan garra dáhpáhusaide mat gusket sihke dálkkiide ja  bohtosiidda. Slovakia Peter Sagan vuittii, nugo muitit, Máilmmimeasttir nama goalmmát geardde Bergenis.

Dutki Hanna Lee digaštalai dan mot lea gilvit muoraid dainna jurdagiin ahte goahcat dálkkádatnuppástuvvamiid. Muorat njammet CO2 áimmus šattadettiin ja nu dat sáhttet ge eastadit kárbonluoitima. Muhto vuvddiin leat maid vel eanet váikkuhusat dálkkádagaide, maid sáhttá leat váttis ipmirdit, dakko bokte mot dat váikkuhit karbonii, energiijai ja čáziid golgamiidda. Danin sáhttet ge vuvddiid gilvimiid bohtosat leat juogo ávkkálaččat dahje vahágin dálkkádagaide, dađi mielde mot strategiija láhččojuvvo.

Earru

Maŋŋel Bjerknesguovddáža guossástallama, válddii Ruvdnaprinsa Haakon earu Presideanta Kiskain. Presideanta loahpahii stáhtaguossástallama almmolaš lunššain, maid Austevoll sátnejođiheaddji guossohii, ja Ruvdnaprinsa manai viidáseappot

 

 

Fáktadieđut

Dieđut Slovakia birra

Oaivegávpot: Bratislava
Stuorámus gávpogat: Bratislava, Košice ja Prešov

Viidodat: 49 035 km² (Norga: 385 203 km²)
Olmmošlohku(2018): sullii 5,4 millioner
Giella: Slovakias

Stivrejupmi: Republihkka
Stáhtaoaivámuš 2018 (
2018): Presideanta Andrej Kiska

Leat leamaš diplomáhtalaš oktavuođat Norggain 1.beaivvi  rájes ođđajagimánus 1993, dalle go Slovakia ásahuvvui sierra stáhtan go ovdalaš Tsjekkoslovakia juogaduvvui. Norga ásahii ambassáda Bratislavai ođđajagimánus 2005. Gonagas Harald ja Dronnet Sonja, leigga stáhtaguossástallamis Slovakias golggotmánus 2010.

Slovakia ja Norgga gaskkas leamaš dađistaga eanet ovttasdoaibma, sihke kultuvra ja ealáhussuorggis. Sivvan dasa lea earet eará dat ahte Norga addá doarjaga Slovakiai EØS-ruhtadanortnegiin. Sullii 20 norgalaš fitnodoaimma lea ásahuvvon Slovakiai,  ja birrasii 600 norgalačča studerejit doppe (eatnasat lohket medisiinna).

Gáldu: Olgoriikadepartemeanta 

Almmolaš govven Loddesálas: Gonagasbárra ja Presideanta Andrej Kiska. Govva: Gorm Kallestad / NTB Scanpix

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas