Hopp til hovedinnhold

Loahpaheigga Tallinnis

Ruvdnaprinsabárra loahpahii guossástallanmátkkis báltalaš riikkain Estteeatnamis odne. Otná beaivvi fáddán lei sihke digitaliseren, ođđaáigásaš gávpotovddideapmi ja Tallinna historjjálaš árbi – gávpot mii lea UNESCO-listtus.

26.04.2018

Estteeanan ja Norga leat hui guhkás joavdan servodaga ja ealáhusaid digitaliseremiin, ja leat ollu oktasaš beroštumit. Dat lei duogáš seminárii mii álggahii Eksellense Presideanta Kersti Kaljulaid ja Gonagaslaš Allavuođaguovtto Ruvdnaprinssa ja Ruvdnaprinseassa otná prográmma.

Ealáhusforum

Dien guovtti riikkas lea juo viiddis ovttasbargu digitála suorggis.  Davviriikkat ja Báltalaš riikkat vuolláičálle diibmá  "Digitála davviguovllut" julggaštusa Oslos. Dat ovdanbuktá áigumuša ahte dahkat Davviriikkaid ja Báltalaš riikkaid njunuš riikan digitaliserema ovddideamis.

Ruvdnaprinsa Haakon rabai otná seminára, ja čujuhii dasa man ollu lea mii lea seammalágan ja man ollu oktasaš vejolašvuođat mis leat.

"Estonia and Norway are both small, open economies. We are both part of the Single Market. And both our countries are at the top of international rankings of digitalisation. This means that we are in a good position to address the challenges and exploit the opportunities represented by digital transformation."

Estteeanalaš ja norgalaš fitnodoaimmat leat čoahkkanan iešguđet oktavuođain, sihke Tallinn ICT Week ja Oslo Innovation Week lágideamis. Odne láhččojuvvo vejolašvuođat čatnat vel eanet oktavuođaid.

 
Presideanta ja Ruvdnaprinsabárra Norwegian-Estonian Business Forumis. Govva: Lise Åserud, NTB Scanpix

 
Telliskivi - gávpotovddideapmi

Vázzinmátkki duohken Tallinn gávpotguovddážis lea Telliskivi ("diilageađgi") báiki. Dien boares industriija guvlui lea ásahuvvon ođđa eallin. Doppe leat hutkalas doaimmat, teáhter ja musihkka, galleriijat ja dáidda. Doppe lea ealli biras gos leat boradanbáikkit,  čoahkkananbáikkit ja ođđaáigásaš fitnodagat ja organisašuvnnat. 

Máŋgasiin Telliskivi kulturbargiin leat oktavuođat Norgii. Nu lea maid estteeanalaš eaktodáhtolaš organisašuvnnain (NENO), mat leat dehálaš aktevrrat dan oktavuođas mii guoská doarjagiidda maid Norga juolluda Estteeatnamii EØS-doarjagiin.

Oahpisteaddjit čájehedje Ruvdnaprinsabárrii Telliskivi Creative Center, gos soai beasaiga gullat eanet sin doaimmaid birra  ja oktavuođaid birra Norgii.


Váccašeamen Tallinna boares gávpotoasis. Govva: Lise Åserud, NTB Scanpix

Loahpaheigga Boaresgávpogis

Maŋŋel dan ođđaáigásaš Telliskivi, loahpaheigga Ruvdnaprinsa ja Ruvdnaprinseassa iežaska guossástallama Boaresgávpogis. Tallinna Boaresgávpot lea okta dain gaskaáiggi gávpogiin Eurohpás mii lea buoremusat seailluhuvvon, ja lea ge UNESCO máilmmiárbelisttus. Estteeatnama kultuvra ja historjá, ja čanastagat Davviriikkaide, Ruššii ja eurohpálaš kontinentii – buot dieid speajalgovaid oaidná boares gávpoga muvrraid siskkobealde.

Vázzin oahpisteddjiiguin loahpahuvvui boares ráđđevisttis, guovdu Boaresgávpoga márkanbáikki. Ráđđeviessu,mii lea huksejuvvon 1400-logus, lea iešalddis juo ovddolaš oaidnit. Dál leat Ráđđeviesus maleriijat vuosttaš oasis 1900 – logu, ja ollu dáiddáriin ledje čanastagat Norgii.


Ruvdnaprinsabárra loahpahii guossástallanmátkkis preassačoahkkimiin Tallinna gávpotguovddážis. Govva: REUTERS / Ints Kalnins / NTB Scanpix

 

Ruvdnaprinsabárra loahpahii guossástallanmátkkis preassačoahkkimiin olggobealde Ráđđeviesu. Ruvdnaprinsa Haakon ja Ruvdnaprinseassa Mette – Marit leaba mátkkoštan njeallje beaivvi Latvias, Litauenis ja Estteeatnamis, ja searvan sin 100-jagi iešmearridan ávvudeapmái.

 

 

Fáktadieđut

Dieđut Estteeatnama birra

Oaivegávpot:Tallinn
Stuorámus gávpogat: Tallinn, Tartu ja Narva

Viidodat: 45 339 km2 (Norge: 385 186 km²)
Olmmošlohku:  sullii 1 318 700 (2018)
Birrasii 69 % leat estilaččat. 25% álbmogis leat ruoššat.

Giella: Esttegiella

Stivrejupmi: Republihkka
Stáhtaoaivámuš 2018: Presideanta Kersti Kaljulaid
Vuođđuduvvon guovvamánu 24. beaivvi 1918

Majestehta Gonagas Harald lei stáhtaguossástallamis Estteeatnamis 1998:s.
Estteeatnama presideanta lei stáhtaguossástallamis Norggas 2014:s ja 2002:s.

Norggas ja Estteeatnamis lea lagas ja buorre bilaterála gaskavuohta, ja leat ollu oktavuođavejolašvuođat. Maiddái kultureallimis lea viiddis oktavuohta, ja dán guovtti riikka gaskasaš gávppašeapmi lassána dađistaga. Birrasii 5 000 estilačča ásset Norggas, ja ollu norgalaččat fitnet Estteeatnamis.

Gáldu: Olgoriikadepartemeanta

 

Ruvdnaprinsabárra ja Presideanta Kaljulaid allaáiggálaš buresboahtinseremoniijas Tallinnis. Govva: Lise Åserud, NTB Scanpix.

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas