Mátkki loahppa Åfjordas ja Bjugnas

Muhto sihke vuorasolbmot ja áibbas nuorra Åfjord olbmot ledje guovddážis otná guossástallamis. Diet guokte buolvva deaivvadit sierra dáiddaprošeavttas, mii lea ovttasbargu gaskal Åfjord dearvvašvuođaguovddáža ássiid ja báikki mánáidgárdemánaid. Ovdalgaskabeaivvi finadii Gonagasbárra dearvvašvuođaguovddážis. Doppe beasaiga dearvvahit sihke vuoras ja nuorra oasseváldiid, ja Dronnet Sonja oaččui ovtta sin bargguin skeaŋkan. 91 jahkásaš fioliniidnačuojaheaddji Kåre Stjern čuojahii «Fagert av landet» Gonagasbárrii.

Dronnet deattuhii dan buori ja aktiiva vuorrasiiddivššu go doalai sáhkavuoru Åfjordstorgetis:

- Guossástallan Åfjord dearvvašvuođaguovddážis čájehii movt lehpet ovdošanláhkai nannen doaimmaid vuorrasiidda main lea oaivil, ja movt lehpet ásahan buriid kulturvásáhusaid ássiide. Višuvdna mii čájeha movtta, ilu ja maiddái leaikkastallama, muitala ollu dan birra movt movttiidahttin váikkuha dasa ahte olbmot eai dárbbaš oktovuođas, láittasvuođas ja dorvvohisvuođas eallit – ja dat čájeha maid dán barggu hutkáivuođa.

Márkanbáikkis beasai Gonagasbárra oaidnit vel eambbo suohkana kulturbargguin. Kulturskuvllas lea stuora prošeakta mas leat mielde gaskal čieža ja vihttanuppelot jahkásaš mánát, ja Gonagas ja Dronnet beasaiga vásihit sihke «Snart blir jeg majestet» ja «En sirkel av liv», mat leat vižžojuvvon Løvenes konge muitalusas, ja maid koara, dánsárat, neavttárat ja solisttat ovdanbukte.

Loahpaheapmi Bjugnas

Bjugnas beasai Gonagasbárra oahppat eanet suohkana kulturnannendoaimmaid birra. Gonagas ja Dronnet beasaiga daid bargguid birra gullat – ja beasaiga maid ieža oaidnit bargguid bohtosiid – sihke de go olliiga Bjugnii ja maiddái Kulturviesu luhtte. Nuorra entreprenørskap lea okta oassi diein nannendoaimmain, ja kulturviesu feaskariin presenterejedje Fosen joatkkaskuvlaoahppit iežaset prošeavttaid Gonagasbárrii.

Gonagas Harald doalai dán fylkkamátkki maŋemus sártni, mas son rámiida suohkana dán dehálaš barggu ovddas:

Mun ovdošan daid ollu kulturvásáhusaid maid dinguin lean beasan vásihit! Dat ahte lehpet dihtomielalaččat válljen nannet kultuvrra ja falástallama – earenoamážit mánáid ja nuoraid várás, lea ovdošanveara, ja dan barggu geažil lea dát suohkan šaddan dovddusin. Suohkan nammaduvvui 2004:s dan jagi mánáid-ja nuoraidsuohkanin ja 2006:s fas falástallansuohkanin. Dat lea čevllohallanveara!

Illumátki

Gonagasbárra doalai maid loahpahančoahkkima preassain odne. Das čoahkkáigesii Gonagas Harald fylkkamátkki ja logai ahte dat leamaš guhkes illumátki – ja dovddahii ahte son lea suollemas trøndár.

Dronnet Sonja rámiidii suohkana bargaomovtta ja bargomiela, maid soai leigga vásihan hui dávjá miehtá Trøndelágarittu dán mátkkis.

Gonagas loahpahii sártnistis giitosiin:

Giitu didjiide buohkaide geat lehpet ráhkadan dán mátkki buorren vásáhussan munnuide. Giitu ustitvuođa, čáppa sániid ja dearvvuođaid ovddas – ja somás loahpaheami ovddas dáppe  Bjugnas.

Moai sávve didjiide buohkaide lihku viidáseappot!

Giitu munno ovddas!

Eahkes lágida Gonagasbárra vuostáiváldima Gonagasskiippas.