Innovatiiva eanadoallu Flatangeris

Ollu olbmot ledje čoahkkanan go gonagaslaš fanas bođii Lauvsnes kájái. Doppe lágidedje ollu kulturčájáhusaid, ja dasa lassin doalai sihke Ruvdnaprinsa ja sátnejođiheaddji sártni.

- Maritiibma máhttu mii gávdno dáppe Trøndelaga rittus lea alla árvosaš, sihke báikkálaččat ja našuvnnalaččat, logao Ruvdnaprinsa, ja rámidii ođđajurddašeaddji guollebiebmanealáhusa Flatangeris.

- Innovatiiva riddo-Norga dárbbaša doaimmaid dakkáriid go Storlavika Áhpedoallopárkka . Dien láhkái sáhttit mii oažžut áigái nanu guoddevaš doaimma gaskal olbmuid ja ábiid – maiddái boahtteáiggis.

Ruvdnaprinsabárra galggai ge vuolgit geahččat dan ođđa Áhpedoallopárkka, muhto ovdal dan finadeigga soai "Heimen" lávlolas olbmuid guossis.

Lávlu vuorasolbmot "Heimenis"

Heimen dikšun- ja fuolahussiiddas beasai Ruvdnaprinsabárra oahpásnuvvat  pilohtaprošeavttain "Lávlolas vuorasolbmuid institušuvnnat" – mas "Heimen" Flatangeris lea mielde. Lávlun oassin vuorasolbmuid divššus lea huksejuvvon máhttui ja jáhkkui ahte lávlumis leat máŋga buori beali.

Lávlolas institušuvnnain lea bargiin máhttu ja diehtu dan birra mo lávluma sáhttá geavahit ja maid dat mearkkaša dearvvašvuhtii ja áiggi loaktimii. Sii lávlot boarrásiidda – ja lávlut ovttas singuin. Dat ásaha buori dili ja oktiigullevašvuođa, ja lea maid ávkkálaš muitui, dearvvašvuhtii ja eallinkvalitehtii.

Buhtistanguolit luossadihkiide

Storlavikas lea Flatangera ođđa áhpedoallopárka. Álggos sii fitne Namdal Rensefisk rusttegis, gos guossit besse filmmas  oaidnit ja gullat mo dan guovllu guollebiebman lea ovdánan historjjálaččat. Dasto beasai Ruvdnaprinsabárra oaidnit dárkileappot daid smávva guolážiid maid luitet čáhcái ja mat galget soahtat luosa stuorámus váttisvuođaiguin. Dán rusttegis bibmet oainnat áhkácinccuid/ rognkjeks – mat áinnas liikojit borrat luossadihkiid.

Govva: Berit Roald, NTB scanpix

Go leat fuobmán man gievrrat  áhkácinccut leat loaktit luossadihkiid, de leat bidjan ollu miljovnnaid dakkáriid guollebiebmanrusttegiidda miehtá norggarittu.  Ja dál lea iešalddis áhkácinccuid biebman šaddan stuora guollebiebmanealáhussan.

Rabai Áhpedoallopárkka

Buhtistanguollerusttegis vulge sii Áhpedoallopárkii, gos Ruvdnaprinsa Haakon beasai čađahan dan almmolaš rahpama. Ruvdnaprinsabárra beasai vázzit ja geahččat párkka, gos leat sihke Bjørøya AS, Proneo ja Aquagelbbolašvuohta. Guollebiebman lea juo deháleamos ealáhus dien gilis. Párkka ásaheami ulbmil lea geassit vel eanet máhtu, bargosajiid ja olbmuid dohko.

Guliid mat leat merddiid siste ábis, bibmet dán bearráigeahččanstašuvnna vehkiin. Govva. Berit Roald, NTB scanpix

Biebman bearráigeahččanstašuvnnas beasai Ruvdnaprinsabárra gullat mo luosaid sáhttet gáidosis biebmat. 

Storfjellet

Ja de lei áigi coggalit meahccebiktasiid.  Kari Olsen, Storfjellets venner jođiheaddji, láidestii vázzinmátkái. Mátkki vuolde bisánedje sii gullat "Lávlu ábi ruvváid", ovdalgo vázziledje Storfjellet várrečohkkii gos besse návddašit ovddolaš  Folla ja Flatanger mearragátti.

Storfjell čohkas lea várddus. Govva: Berit Roald, NTB Scanpix.

Vuostáiváldin Gonagasskiippas

Eahkes leat buot daid suohkaniid ovddasteaddjit gos Ruvdnaprinsabárra lea fitnan dán fylkkamátkis bovdejuvvon vuostáiváldimii, mii leat skiippas Kongeskipet Norge.  Dat leat olbmot geaiguin Ruvdnaprinsabárra  lea deaivvadan dán mátkkis,  ja máŋggas geat leat leamaš mielde lágideamen daid ollu vásáhusaid maid soai leaba vásihan – ja boahtiba ain vásihit viidásit mátkkis.