Hopp til hovedinnhold

Fylkkamátkkis Davvi-Trøndelagas

Odne álggahii Ruvdnaprinsabárra golbma beaivvi guhku fylkkamátkki Davvi-Trøndelagas. Mátki bása lea Gonagasskiipa, ja eske iđđes bođii sjaluppen Øyrkollenii Høylanddas.

20.09.2017

Gonagaslaš Allavuođaguovttos Ruvdnaprinsa ja Ruvdnaprinseassa galgaba guossástallan guhtta suohkana dáid beivviid: Høylandet, Namsskogan, Grong, Namsos, Fosnes, Flatanger ja Frosta.

Høylandet álggos

Guossástallan álggii buriin dálkkiin čáppa birrasis Øyrkollen báikkis Høylanddas.

"Lei jáhkitmeahttun čáppat borjjastit vuona sisa Høylanddas eske iđđes ja boahtit gáddái Øyrkollenis.""

Sátnejođiheaddji Hege Nordheim-Viken sávai buresboahtima, ja Ruvdnaprinsa ja Ruvdnaprinseassa asttaiga humadit lieđđemánáguoktáin, Karoline ja Jakob.

 
Ruvdnaprinsabárra beasai oaidnit oasi báikki kulturdoaimmain. Høylandet bearašteáhter čájehii čájáhusa "Sirkel av liv" , mii lea oassi čájáhusas "Løvenes konge" ja mánáidgárdemánát lávlo iežaset lávlaga Ruvdnaprinsabárrii.


"Livsgledebarnehagen" lávlla lea maid almmuhuvvon CD:s. Govva: Berit Roald, NTB Scanpix

Goavddis mii lei das lahkosis oaččuiga Ruvdnaprinsa ja Ruvdnaprinseassa veaháš borramuša ovdal go vulge viidáseappot Namsskoganii.

Luondu ja kultuvra Namsskoganis

Namsskogan bearašpárkkas lei Guovžabálggis vuordimin Ruvdnoprinsabára. Doppe gávdnojit sihke boraspiret ja eará stuora ja smávit eallit, ja dan báikkis lea maid okta dán riikka golmma boraspireguovddážiin. Guovddáža bargun lea addit objektiiva dieđuid dan golmma stuorimus boraspire birra mat gávdnojit Norgga luonddus – guovža, gumpe, geatki ja albbas.

Sihke geatki ja guossit orrot čájeheamen stuora beroštumi - muhto lei ge fargga biebmanáigi. Govva: Berit Roald / NTB Scanpix

Guovža lea stuorimus boraspire Norggas, ja Bearašpárkka guovža Odin deaddá  350 kilo ja lea ge stuorimus ealli doppe. Boraspirebagadalli Chrstina Maria Stølhaug muitalii párkka boraspiriid birra, ja makkár dilli guđege eallis lea friddja luonddus.

Párka lea stuora geahččanvearabáiki dán guovllus, ja dan namuhii ge Ruvdnaprinsa Haakon sártnistis veaháš maŋŋelaš: - Lea oba bures dahkkon go leat nagodan ásahit dákkár báikki mii geassá  50 000 olbmo deike juohke jagi, suohkanii gos ásset unnit go 1000  olbmo. Dii lehpet duođai nákcen ásahit juoidá mii geasuha sihke smávváid ja stuorráid, logai, Ruvdnaprinsa.

Trones jávregáttis

Trones jávregátti vistái ledje smávvát ja stuorrát čoahkkanan. Buot mánát báikkálaš golmma mánáidgárddiin Bamesebo, Labbetussen ja  Tiriltoppen lávlo MOT-lávlaga Ruvdnaprinsii ja Ruvdnaprinsessii ovttas Namsskogan skuvlla mánáiguin.

Govva: Berit Roald, NTB scanpix 

Maŋŋá Ruvdnaprinssa sártni, guoimmuhii Namsskogan lávlunjoavku osiiguin  iešguđetlágan norgga lávlagiiguin, láidesteaddjin lei solista Bjørnar Sellin.

Miehtá dien báikki ledje buvrriid gos báikkálaš searvvit ja organisašuvnnat fálle iešguđetlágan doaimmaid, ja Ruvdnaprinsabárra bisánii máŋgasa lusa.


Oinniimet ahte Ruvdnaprinseassa lei čeahppi bálkestit ruovderieggáid/ skotthyllkasting. Govva: Berit Roald / NTB scanpix

Sámi lunša

Lunšaáigái ledje stuora goahtái gárvvistan borramuša, ja láidestedje luđiin olbmuid čohkkánsajiide. Guossohedje sihke Byrkijeguoli ja bohccobierggu guobbariiguin ja joŋaiguin, ja Algot Jåma muitalii lullisámi historjjá Ruvdnaprinsabárrii. 

Maŋŋá dieid somás vásáhusaid Namsskoganis mátkkoštii Ruvdnaprinsabárra viidáseappot Kråangke

suohkanii, ja eahkes loahpahuvvojit beaivvi lágideamit konsearttain Namsosas. Dan birra sáhtát lohkat eanet go čuovut leaŋkalisttu dás olgešbealde.

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas