Quatar ja FAE 2010

Guossátallan álggii Qataris. Doppe lea Norgga indistriija leamaš juo 60-logu rájes, ja Norgga ja Qatar gaskasaš gávppašeapmi lassána dađistaga.

Qatalum rahpan

Qatalum lea okta máilmmi stuorámus alumiidnafabrihkain, ja lea ovttasbargu gaskal Norsk Hydro ja Qatar Petroleum. Lea Hydro teknologiija mii suddadanommaniin geavahuvvo, maid Årdal dutkanossodat lea ovddidan. Dán mállet elektrolyseteknologiija rehkenasto leat hui beaktil ja lea buoret birrasii go ommanat maid ovdal leat geavahan.

Ruvdnaprinsa Haakon ja Qatar Emira, Allavuohta Sjeik Hamad bin Khalifa al-Thani, čuovuiga ovttas dan allaáiggalaš rahpama, ja dan maŋŋá čájehedje ja muitaledje sudnuide industriija birra.

Norgga skuvla Qataris

Go lei geargan Qatalumis, de finai Ruvdnaprinsa Haakon Qatar norgga skuvllas. Doppe son beasai daivvadit skuvlamánáiguin geat vázzet dien skuvllas. Mánát ledje ráhkadan iežaset čájáhusa mas ovdanbukte movt sin eallin Qataris lea, sihke skuvlaárgabeaivi ja ástoáigi.

Skuvllas leat dál sullii 150 oahppi, ja doaimmat leat hui ollu dán guovllu fabrihkaid doaimmaid duohken. Dál go Qatalum doaimmaiguin leat geargan, de vulget ollu norgalaččat Qataris ruoktot, ja dasto dáidá skuvlla ohppiidlohku maid boahttevuođas šaddat arvat unnit go dál.

Museum of Islamic Art

Qatar oaivegávpot Doha lea arábialaš kulturoaivegávpot 2010, ja Islámaid dáiddamusea lea dán dilálašvuođa čalmmusteamis guovddážis. Ruvdnaprinsa Haakon beasai geahčadit musea, man ulbmil lea iežas suorggis šaddat máilmmi njunuš musean. Čoakkáldagain leat manusat, dáida, giehtaduodji ja čikŋageađggit golmma kontineanttas, 600-logu rájes gitta 19. čuohtejahkái.

Eahkes seamma beaivvi mátkkoštii Ruvdnaprinsa viidáseappot Quataris Ovttastuvvon Arábialaš Emiráhtaide.

Ovttastuvvon Arábialaš Emiráhtat

Ovttastuvvon Arábialaš Emiráhtat vuođđuduvvui 1971:s, ja das leat mielde čieža emiráhta main guđesge lea oalle muddui iešstivrejupmi. Abu Dhabi lea stuorámus, ja dan historjjá sáhttá guorrat 7 000 jagi maŋos áiggis. Doppe lea dál ollu huksen ja sii barget hui dihtomielalaččat nannet kultuvrra ja turismma. Dasa lassin lea doppe petroleumdoaibma ja barget ollu dakkár energiija ovddidemiin mii ođasmahttojuvvo.

Logaldalai Zayed universitehtas

Ruvdnaprinssa prográmma Emiráhtain álggii Zayed universitehtas. Doppe son doalai logaldallama Development and Dignity birra 300 studentii.

Ealáhusat ja dálkkádathástalusat

Norggas ja Emiráhtain leat oktasaš beroštumit mat gusket oljo-ja gássabohkamiidda. Maŋŋá logaldallama manai Ruvdnaprinsa ”Norga maritima oljo- ja gássasuorggi teknologiijabargoguoibmi” seminára rahpamii. Sártnistis deattuhii Ruvdnaprinsa ovttasbargovejolašvuođaid, ja son gesii maid ovdal Emiráhtaid saji barggus mii guoská dasa ahte gávdnat máilmmi viidosaš čovdosiid dálkkádathástalusaide. Dán oktavuođas čujuhii son earenoamážit Masdar-prošektii;

Masdar gávpot

“Masdar“ lea arábialaš sátni mii mearkkaša “gáldu”. Abu Dhabi áigumušat Masdar-prošeavttain leat hukset vuosttaš gávpoga máilmmis mii lea karbonneutrála ja gos ii galgga nuoskkideapmi gávdnot. Sii áigut gávdnat iešguđetlágan buhtis energiija ja movt ruskkaid geavahit ođđasit ávkin juogamasa. Ulbmil lea oažžut gávpoga šaddat guovddášbáikin dutkamii ja buhtis energiija ja nanu teknologiija ovddideapmái.

Plána mielde galget Masdar gávpogis ássat 40.000 olbmo ja doppe galget vel ásahuvvot bargosajit 50.000 olbmui. Sullii 1500 ealáhusdoaimma galget doppe leat – eanas dain galget vuovdit ja ráhkadit buktagiid mat eai illis birrasa.

Guovddášsáttagotti čoahkkin

Doppe ledje maiddái ollu čoahkkimat main ledje fárus Ruvdnaprinsa, Sjeik Hamdan bin Zayed Al Nahyan ja sjeik Nahyan bin Mubark Al Nahyan. Dat ledje norgga fitnodagaid ja Emiráhtaid eiseválddiid alimus dási guovddášsáttagottiid čoahkkimat. Čoahkkimiid váldofádda lei nannet guovttebealat oktavuođaid ja politihkalaš ja ekonomalaš ovttasbargguid.

Ealáhusseminára Dubaias

Maŋemus oassi guossástallamis lei Dubaias. Dát Emiráhtta lea guovllu ekonomalaš guovddáš, gos leat viiddis gávpedoaimmat. Dubaias ásset birrasii 1000 norgalačča, oallugat sis barget shipping ja petroleumdoaimmain.

Norgga gelbbolašvuohta mearrateknologiija ja IKT suorggis lei váldosáhkan semináras maid Ruvdnaprinsa rabai vuosttaš oassin Dubai prográmmas. Rahpansártnistis son deattuhii dan man ollu máhtu Norga lea huksen mearradutkan suorggis – dat lea gelbbolašvuohta maid sihke Dubai ja Emiráhtat sáhttet atnit ávkin.

Audiensa

Maŋŋá seminára lei Ruvdnaprinsa Haakonis čoahkkin Allavuohta Sjeik Hamdaniin, gii lea Dubai Ruvdnaprinsa. Soai finaiga fárrolaga Burj Khalifas– mii lea alimus doardna máilmmis. Doardna lea badjel 800 mehter alu ja das leat 160 etáša. 124. etášas lea várdanstealli gos Sjeik Hamdan čájehii Ruvdnaprinsa Haakonii čáppa Dubai gávpoga.

Dry Docks

Skiipahuksenbáikkis Dry Docks huksejit, molsot ja divodit skiippaid ja offshoreinstallašuvnnaid. Gaskamearálaččat leat juohke jagi 400 fievrru Dry Docks divuhusas. Ruvdnaprinsa Haakon beasai oaidnit ja gullat skiippadivuhusa ja seismihkkafievrru Polarcus Asima birra. Skiipa lea ráhkaduvvon dainna jurdagiin ahte galgá unnimus lági mielde luoitit nuoskkideami ja lea ráhkaduvvon earenoamážit árktalaš guovlluid várás. Dat lea ge ovdamearkan dasa makkár ovttasbargu lea gaskal Buvai skiipahuksenbáikki ja norgga design ja industriija.

Mearraolbmáid girku

Veaigin deaivvadii Ruvdnaprinsa mearraolbmáid guovddážis muhtun norgalaččaiguin geat ásset Dubaias. Dát báiki lea dán guovllu skandinávalaččaid deaivvadanbáiki. Sis lea doppe fásta prográmma masa gullet lávlunjoavku, iđđesdeaivvadeapmi, lášmmohallan, filbmaeahket, ipmilbálvalusat ja tuvravázzin.

Sii guossohedje Ruvdnaprinsii vaffeliid, ja norgga skuvlla mánát lávlo sutnje. Ruvdnaprinsa Haakon giittii dan barggu ovddas maid sihke bargit ja earát barget eaktodáhtolaččat dán guovddážis.

A taste of Norway

Dubai ja Emiráhtaid guossástallan loahpahuvvui norgga mearraborramušaiguin. Bovdejuvvon gussiide guossohedje ”a taste of Norway”, norgga biepmut ja ja earenoamáš borramušareahtat.