Ruvdnaprinsabára vuosttaš fylkamátki

Mátkkis soai guossástalaiga ollu suohkaniid; Lillehammer, Ringebu, Sør-Fron, Nord-Fron, Dovre, Rennebu, Meldal, Orkdal, Hemne, Surnadal, Rindal, Sunndal ja Oppdal. Soai mátkkošteigga togain ja biillain.

Lillehammer, Ringebu, Sør- Fron, Nord- Fron ja Dovre

Ruvdnaprinsabára fylkamátki álggii Lillehammeris, gos čuovuiga ”Det nytter” festivála rahpama. Ringebuas beasai Ruvdnaprinsabárra gullat Kvitfjell guovllu birra. Sør-Fronas sáhtostedje Ruvdnaprinsabára heasttain Dale-Gudbranda dállui, gos soai earet eará beasaiga oaidnit ”Klubbeslaget” historjjálaš teáhterbihtá. Nord-Fronas beasai Ruvdnaprinsabárra geahččat Gudbrandsdála Soahtemuitočoakkáldaga, ja soai finaiga maid Kvam Girkoeatnamis. Dombåsas Dovre suohkanis beasai Ruvdnaprinsabárra gullat Luftambulánsa birra. Ruvdnaprinsii muitaledje maid maŋŋil Dombås HV-skuvlla birra.

Rennebu, Meldal ja Orkdal

Ruvdnaprinsabárra bođii Lulli-Trøndelágii togain Berkåkii Rennebu suohkanis. Doppe sudnuide guossohedje iđđesborramuša Mjuklia nuoraidguovddážis. Dan maŋŋil leigga soai ipmilbálvalusas Innset girkus. Meldálas rabai Ruvdnaprinsa Lagasbirasrusttega. Dan maŋŋil čájehedje Ruvdnaprinsabárrii ”Gammelruva”, mii lea heaittihuvvon veaikeruvke, doppe lágiduvvui maid smávva konsearta. Guossástallan Melbus loahpahuvvui togamátkkiin Thamshavnbána mielde Løkke Stašuvnnas.

Orkdálas bisánedje mátkkálaččat oanehaš Fannremas, gos Ruvdnaprinsa rabai Fannrem-Bårdshaug togabána. Bårdshaugas beasai Ruvdnaprinsabárra deaivvadit singuin geat ásset Elvepromenaden borettslagas. Maŋŋil seamma eahkeda ledje mállásat Bårdshaug Hearráid gárdimis.

Hemne, Aure ja Halsa

Ruvdnaprinseassa rabai Vormstad olgománáigárddi Vormstadas, ja das sii mátkkoštedje viidáseappot Kyrksæterørai Hemne suohkanis. Doppe čájehedje Ruvdnaprinsabárrii Aqua Gen fitnodaga, mii lea luossabiebmanbáiki. Ja dasto soai bisáneigga Bakkely mánáidgárddis. Maŋŋá lunšša beasai Ruvdnaprinsabárra fitnat Hellandsjø Skinnsøm fitnodagas, gos muitaledje iežaset doaimmaid birra.

Dasto sii bisánedje Tjeldbergoddenis Aure suohkanis. Doppe beasai Ruvdnaprinsabárra gullat Statoil rusttegiid birra. Aures beasai Ruvdnaprinsabárra fitnat geahččamin Aure girku. Aures sáhtostedje Ruvdnaprinsabára KV Garsøyain Halsa suohkanii. Dáppe beasai Ruvdnaprinsabárra earet eará gullat gáicafanaskultuvrra birra, ja soai beasaiga oaidnit go gástašedje gáicafatnasa. Dasto suhke Ruvdnaprinsabára Otneset báikái ja doppe lei heastagearrosáhttu Otnes girkui. Eahket loahpahuvvui mállásiiguin Halsa joatkkaskuvllas.

Surnadal ja Rindal

Surnadal suohkanis soai bisáneigga oanehaš ”Utsiktenis”. Dasto sii mátkkoštedje viidáseappot Ullkorga fitnodahkii Rindal suohkanis, gos sudnuide muitaledje báikki birra. Saga Skysstasjon báikkis muitaledje earet eará movt ceahkkunbargu doaimmahuvvo, ja Ruvdnaprinsabárra beasai oaidnit movt cehkkot. Rindal guossástallan loahpahuvvui Rindal Gilimuseas. Go fas joavddaiga Surnadalii, de doppe guossohedje árbevirolaš boandaborramušaid Utsis Røv báikkis, ovdalgo vulge viidáseappot Møretre fitnodaga geahččat. Doppe beasai Ruvdnaprinsabárra geahččat fitnodaga ja gullat dan birra. Maŋŋil seamma beaivvi váccašeigga soai Skei guovddážis gos maiddái ledje kulturovdanbuktimat. Beaivi loahpahuvvui feastamállásiiguin Surnadal hoteallas.

Sunndal

Álggos dán beaivvi lei oahpisteapmi Stangvik skuvllas, ja dan maŋŋil sii mátkkoštedje viidáseappot Sunndal suohkanii. Doppe finaiga Aquaforsk fitnodagas, ja dan maŋŋil lei kulturprográmma márkanbáikkis. Dasto oahpistedje ja muitaledje sudnuide Hydro Aluminium, Sunndal birra. Dan maŋŋil soai finadeigga Sunndal helsetunas ja Svisdal dálus.

Oppdal

Ruvdnaprinsabárra joavddai Lønset skuvlii Oppdalas, gos Ruvdnaprinseassa rabai dán ođđa skuvlla. Dasto soai váccašeigga Oppdal márkanbáikkis gos maid ledje kultuvrralaš ovdanbuktimat, ja de manaiga fitnat muhtun Oppdal nuoraid mielde Villmarksleirii. Fylkamátki loahpahuvvui mállásiiguin Njårdhalleos, ja soai rabaiga muitopláhta Oppdal stašuvnnas ovdal go fas vulggiiga togain ruovttoluotta Osloi.