Hordalánda 2009

Gonagas Harald ja Dronnet Sonja geavaheigga Gonagasskiippa dán fylkkamátkkis, ja diibmu 10:00 joavddai Norge Våge hámmánii Tysnesas.

Tysnes

Tysnesas guossástalai Gonagasbárra Galleri G, gos muhtun Dronnega iežas govain leat čájáhussan. Čájáhusa namma lea Klangbunn, ja dan prošeavttas leaba Dronnet Sonja ja dáiddár Ørnulf Opdahl ovttasbargan.

Dasto finaiga Gonagas ja Dronnet Tysnes buhcciidsiiddas, gos Gonagasbárra earret eará beasai dearvvahit Tysnes boarraseamos olbmo, Synnøve Meland, gii lea riegádan 1906:s. Tysneshallenis beasai Gonagasbárra searvat historjjálaš dilálašvuhtii, gos ledje máidnasat, lávlun ja musihkka.

Austevoll

Ollu fatnasat ledje čoahkkanan vutnii dearvvahit Gonagaskiippa olggobealde Austevoll. Kája alde vurddii sihke lávlunjoavku ja korpsa, ja das besse maid gullat nuoraidmusikála "Mammo mi".

Go Dronnet almmustahtii bácci "Sildajento”, de son deattuhii mearranissoniid stuora áŋgirvuođa. Dan maŋŋá beasai Gonagasbárra gullat báikkálaš guolásteddjiid historjja, mearradutkama ja muitaluvvui maid mat maritima mánáidgárddit leat. Fedje Fylkkamátkki nubbi beaivi álggahuvvui Fedjes, gos Gonagasbára vuostáiválde kájas ovdalgo vulge Fedje buhcciidsiidii. Soai beasaiga maid oanehaččat gullat guvllu maritima dáhpáhusaid birra, ovdalgo jotke mátkki Seim báikái Lindås suohkanis.

Lindås ja Austrheim

Seim báikkis guossástalai Gonagasbárra Håkonshaugen – mii lea Håkon den Gode hávdemuitoaláš, Adalsteinsfostre, son lei gonagas Norggas sullii jagi 933 rájes gitta 960 rádjái. Egil Skallagrimson, Johannes Rydland hámis, ja 6 hirdolbmá čuvvo Gonagasbára dán muitoalážii, gos ledje ollu kultuvrralaš ovdanbuktimat lávlumiin, divttaiguin ja musihkain.

Maŋŋelgaskabeaivvi finaiga Gonagas ja Dronnet StatoilHydros raffineriijas Mongstadas. Sudnuide čájehuvvui doaibma ja bargobáiki, ja muituluvvui dárkileappot bargguid birra dan botta go ledje bisánan muhtun bearráigeahččanlatnjii.

Radøy

Radøyas finai Gonagasbárra Vestnorsk Utvandringssenteris Slettas. Gaskal 60 ja 70 % Norgga álbmogis leat sogalaččat Davvi-Ameriikkas, ja dát guovddáš lea gudnimuitobáiki sidjiide geat leat guođđán Norgga ja mátkkoštan dohko.

Gonagas ja Dronnet beasaiga oahpásnuvvat Præriebyen ja Emigrant-girkui. Dát lea Davvi-Dakota gaikojuvvon ja ođđasishuksejuvvon Brampton Lutheran Church. Girku huksejedje álggos norgalaš emigránttat ovddit čuohtejagi molsašumis, ja geassemánu 22. beaivvi 1996 addojuvvui girku skeaŋkan Olggosmátkkošteddjiid guovddážii -Utvandringssenteret.

Fylkamátki loahpahuvvui kulturdoaluiguin Mangeris, gos Gonagas doalai iežas maŋŋemus sártni dán mátkkis.