Njuike váldosisdollui

Davvi-Tromsa 2007

Gonagaslaš Allavuohta Ruvdnaprinsa ja Gonagaslaš Allavuohta Ruvdnaprinseassa finaiga Davvi-Tromssas borgemánu 26.- 28.beivviid 2007. Ruvdnaprinsabárra finai Návuona, Skiervvá, Gálssa, Gáivuona, Ivgo ja Omasvuona suohkaniin, ja soai mátkkošteigga Gonagasskiippain Norge.

Návuotna, Skiervá ja Gálsa - borgemánu 26. beaivvi Guossástallan álggii sotnabeaivvi Skorpas Návuona suohkanis. Máŋŋil go leigga fiervvás váccašan ja gullan go Fjellklang koarra lávllui, de manai Ruvdnaprinsabárra Skorpa girkui gos lei ipmilbálvalus. Máŋŋel ipmilbálvalusa guossohuvvui girkogáffe olggobealde girku.

Diibmu 13:00 borjjastii Gonagasskiipa viidáseappot Skiervái, gos Ruvdnaprinseassa rabai birasgáhta almmolaččat. Maŋŋá birasgáhta lágidan dilálašvuođa, finai Ruvdnaprinsabárra Skiervvá dearvvašvuođaguovddážis.

Beaivvi loahpas lei eahkeslágideapmi Torsvågas Gálsa suohkanis. Doppe beasai Ruvdnaprinsabárra fitnat geahččamin Torsvår guollerusttega, ja dan maŋŋil lei boradeapmi ja sosiálalaš ovttastallan Festplassenis.

Gáivuotna ja Ivgo - borgemánu 27. beaivvi

Ruvdnaprinsabárra bođii Leaibevuovddi kájai Gáivuona suohkanis mánnodatiđit. Dáppe soai finadeigga gili mánáidgárddis, gos čájehedje mánáidgárddi Ruvdnaprinsii ja Ruvdnaprinsessii, ja soai beasaiga maid dearvvahit mánáid, geat čájáhalle sihke dárogillii ja sámegillii.

Dan maŋŋá mátkkošteigga Ruvdnaprinsa ja Ruvdnaprinseassa Olmmáivággái. Doppe beasaiga gullat ollu musihkkaovdanbuktimiid ja dan maŋŋá gáfestalaiga báikkálaš nuoraiguin darfegoađis Ridduguolbanis. Lunsjan guossohuvvo báikkálaš borramušat stuora lávus.

Veaháš badjelaš beal ovttas borjjastii Gonagasskiippa Ivgomuotkái, gos ollu smávva fatnasat vuostáiválde K/S Norge Ivgovuonas. Maŋŋá sártniid ja musihka čuojahemiid Ivgomuotkkis, vulggiiga Ruvdnaprinsa ja Ruvdnaprinseassa Larsvold dállui Oksviikas, gos báikki boanddat muitaledje iežaset guovllu eanandoalu birra. Ollu nuorat Ivgos bargagohtet eanandoaluin ja dasa gullevaš buktagiid ráhkademiin ja mearkagálvohuksemiin. Ruvdnaprinsabárra beasai máistet borramušaid maid ráhkadit Larsvold dálus.

Guossástallan Ivgo suohkanis loahpahuvvui go ledje leamaš geahččamin Haplast Technology fitnodaga Furuflaten industrigilis, gos čađahuvvui Haplast almmolaš rahpan SIVA industriinkubatoran.

Eahkes lágiduvvui vuostáiváldin Gonagasskiippas.

Omasvuotna - borgemánu 28. beaivvi

Maŋemus beaivvi Davvi-Tromssas oassálastii Ruvdnaprinsabárra Nils-Aslak Valkeapää viesu Lásságámmi almmolaš vihaheamis Ivgovuonbađas sámi dáiddárviessun.

Lásságámmi lei namma maid multidáiddár Nils-Aslak Valkeapä ieš lei bidjan dan vissui. Jus dan galgá njuolga jorgalit dárogillii, de dat šattašii Svaberggammen, ja namma muitala viesu sajádaga ja hámi. Lásságámmi rahppojuvvui almmolaččat go Ruvdnaprinsabárra leigga doppe guossin, ja lea dál rabas dáiddáriidda ja dutkiide geaid bargguin lea sámi sisdoallu.

Maŋŋá rahpanseremoniija ja Lásságámmi geahčadeami, de vulggii Ruvdnaprinsabárra viidáseappot leastadiánalaš rohkoskapellii ja čuovui doppe rohkosbottu.

Rohkoskapeallas vácciiga Ruvdnaprinsa ja Ruvdnaprinseassa márkanbáikái, gos earet eará báikkálaš dáru ja sámi duojáriin ja giehtadáiddáriin ledje gávpesajit gos ledje árbevirolaš giehtaduojit.

Guossástallan Omasvuonas – ja fylkamátki Davvi-Tromssas loahpahuvvui Ivgovuonbađas seamma beaivvi.

31.01.2009

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas