Telemárku 2008

Notodden

Notodden lei vuosttaš báiki gos bisáneigga mátkkis. Ruvdnaprinsabárra bođii boares industriguvlui Tinfos báikkis iđđesbeaivvi, distaga golggotmánu 7. beaivvi, ja manaiga almmolaš vostáiváldimii Telemarksgalleriijai. Dáppe beasaiga Ruvdnaprinsa ja Ruvdnaprinseassa gullat oanehaččat rávdnjebuvttadeami historjjá ja movt dán guvlui huksegohte industriija, Sam Eyde ja Norsk Hydro rájes gitta teknologalaš buvttademiide, earet eará Berget a/s fitnodagas.

Doppe ledje maid dáiddalaš ovdanbuktimat, earet eará blues, rock ja stev.

Dan maŋŋil rabai Ruvdnaprinseassa Mette-Marit Redesign ođđa rámbuvrra Notoddenis. Dát prošeakta lea oassi máhcahanfitnodagas NOPRO. Biktasat, atnudiŋggat ja stohpogálvvut mat muđui bálkestuvvoše, ožžot ođđa eallima go divoduvvojit, ođđasis gorrojuvvojit ja ráhkaduvvojit ođđa gálvun.

- Redesign rámbuvra ovttastahttá fámuid bargat dakkár bargguid mat leat buot dehálepmosat min servodagas: Buorre biras, sihke olbmuide ja lundui, logai Ruvdnaprinseassa iežas rahpansártnis.

Dalen Tokkea

Maŋŋelgaskabeaivvi guossástalai Ruvdnaprinsabárra Tokke suohkanis. Tokke suohkanis soai finaiga Tokke kulturviesus gos Tokke kulturskuvlla oahppit dánso, lávlo ja čuojahedje.

Tokke dearvvašvuođaguovddážis rabai Ruvdnaprinsa Haakon dearvvašvuođaguovddáža ođđa ossodaga almmolaččat.

Beaivi loahpahuvvui mállásiin árbevirolaš Dalen Hoteallas gos soai maid idjadeigga.

Fyresdal ja Nissedal

Gaskavahku 8.beaivi álggii guossástallamiin Telemark Kildevann fabrihkas. Go leigga beassan gullat fabrihka bargguid birra, de vulggiiga viidáseappot Folkestadbyenii. Váccidettiin váldogáhta mielde beasaiga Ruvdnaprinsa ja Ruvdnaprinseassa máistet báikkálaš biepmuid ja fitnat standain gos sihke mánáidgárdi, 4H ja ohppiidfitnodagat ledje oasálastin, ovdal kulturdoaluid Øyskogenis.

Nissedálas finaiga Ruvdnaprinsa Haakon ja Ruvdnaprinseassa Mette-Marit Treungenis. Dáppe soai čuovuiga lágidemiid Fleirbruksviesus, ja doppe doalai Ruvdnaprinseassa sártni psyhkalaš dearvvašvuođa Máilmmibeaivvi oktavuođas.

Kragerø ja Bamble

Gaskavahku eahket joavddai Ruvdnaprinsabárra Kragerøii, ja maŋit iđit soai álggaheigga beaivvi Levangsheia fuolahusguovddážis. Dán guovddážis soai mátkkošteigga ”Gaven” fatnasiin Stabbestad feargakájas Kragerø guovddážii. Fatnasa dearvvahedje saluhtain Gundersholmen riddofortas, go sii vudje Gundersholmen meattá.

Maŋŋá vuostáiváldima Kragerø hámmanis, čájehedje Ruvdnaprinsii ja Ruvdnaprinsessii Kittelsenmusea. Dan maŋŋá jotkkii mátki ”Steinmannen” – várddusbáikái gos oaidná miehtá Kragerø. Das čáliiga Ruvdnaprinsa Haakon ja Ruvdnaprinseassa Mette-Marit iežaska signatuvrraid, mat galget biddjojuvvot Gonagas Harald ja Dronnet Sonja namaid báldii.

Bamble lei fylkamátki maŋŋemus bisánanbáiki. Dás vulggii Ruvdnaprinsabárra Croftholmen joatkkaskuvlii, gos muitaledje sudnuide skuvlla birra ja báikkalaš historjjá. INEOS rusttegis Rafnesas oahpistedje Ruvdnaprinssa ja Ruvdnaprinseassa fabrihkas ovdalgo sii fitne etylenfabrihka bearráigeahččanlanjas.