Hopp til hovedinnhold

Ruvdnaprinsa máhcan ruovttoluotta Ruonáeatnamis

Gonagaslaš Allavuohta Ruvdnaprinsa Haakon lea dearvan ollen ruoktot maŋŋel go čuoigga ja kite:ain lea rasttildan Ruonáeatnanjieŋa. Ruvdnaprinsa lea oasálastán UIT Norgga Árktálaš Universtiteahta gaskkustanekspedišuvnnas.

04.06.2022

Maŋemus guokte vahku leat ekspedišuvnna miellahtut čađahan 1228 kilomehtar guhkosaš mátkki Ilulissatas oarjabealde gitta Daneborgai nuorttabealde. Ruvdnaprinsa loahpahii mátkki nuortabeale jiehkkeravddas.

-Lei áibbas erenoamáš, ja lean hirbmat giitevaš go ožžon vejolašvuođa searvat dása ja vásihit dán, dajai Ruvdnaprinsa Haakon go deaivvadii pressaolbmuiguin maŋŋel go bođii.

Gaskkustanekspedišuvnna mihttun lea gilvit dieđuid  polárahistorjjá birra ja dehálaš dutkama birra árktálaš guovlluin.

-Go čuoččut doppe jieŋa alde, de das ii oro oba loahppa ge- orru leamen áibbas nohkameahttun, logai Ruvdnaprina.

-Muhto nu dat ii leat. Guovtti vahkus sáhttá rasttildit dán dušše biekkaid vehkiin. Dat lea measta ipmirmeahttun ahte lea vejolaš, muhto mii olbmot váikkuhit maiddái dán hirbmat, áibmadas jiekŋahivvodahkii. Nu ahte ii leat gusto dađi stuorát, ja nu mii fertet ge váldit vára das. Dat suddá jođánit, ja sivvan dasa leat dálkkádatrievdamat maid mii olbmot leat dagahan.

Ovtta beaivvis lea vejolaš johtit guhkás kite:a vehkiin, jus biegga lea riekta, guovlu duolbbas ja muohttadilli lea buorre. Govven: Markus Landrø, UiT.

Lei erenoamáš miellagiddevaš ságastallat EastGrip dutkkiiguin, muitalii Ruvdnaprinsa. Dánska dutkanstašuvna bovre jiekŋaváibmosa Ruonáeatnama nuortadavve jiekŋarávdnjái ja dan vuođul geahččalit viežžat dieđuid jiekŋarávnnji dynamihka ja ovdalaš áiggiid dálkkádaga birra. Gelbbolašvuohta lea dehálaš jus galgá nagodit árvvoštallat man olu jiekŋa dađistaga gártá merrii dađi mielde go šaddá ain lieggaset dálkkádat.

Ekspedišuvdna lea maiddái čohkken muohttaiskkosiid maid adde EastGrip dutkiide galledeami oktavuođas.

Buot oasseváldit gesse iežaset bulkora rusttegiiguin. Govven: Ekspedišuvnna ofelaš Ronny Finsås

Ekspedišuvdna vásihii idjábuollašiid, 30 buolašgráda ja vel biegga mii bosui 20 mehtera sekunddas. Govven: Vegard Ulvang, UiT  

Ekspedišuvdna joatká

Ekspedišuvdna lea nohkan Ruvdnaprinsa dáfus, muhto oasseváldit muđui jotket mátkkiin. Sii guđđet jiehki, ja johtet nuortabeal rittu mielde Daneborgas gitta Antarctichavnai. Dát lea guovlu gos máŋga norgalaš bivdi ja dutki leat orron dálvviid soahtegaskaággis. Doppe leat ain bivdobartat ja eará kulturmuittuit áimmuin.

- Lea leamaš hui suohtas ovttastallan ná čeahpes olbmuiguin geain leat nu olu dieđut. In livčče sáhttán dán čađahit sin haga, lohká Ruvnaprinsa. Govven: Vegard Ulvang, UiT

Čuovo ekspedišuvnna viidáseappot: Ekspedisjonsdagbok - UiT i Arktis

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas