Gonagasbárra Hyllestadas

Hyllestad čábbada beakkán Sognefjorden-njálmmis. Gonagasbárra manai gáddái káijas skiippahuksenfitnodaga Havyard Leirvikas Hyllestada suohkanis ovdagaskkabeaivvi.

Gonagasbárra manná gáddái Hyllestadas. Govva: Heiko Junge / NTB

Korona čuohcan industriijadoaimmaide

Sátnejođiheaddji Kjell Eide vuostáiválddii ja skiippahuksenrusttega siste čilgii oanehaččat oktain Havyard Leirvika direktevrrain Karsten Sævikain.

Sis lei ságastallan Hyllestadservodaga birra mii guoskai ealáhusaide, nuppastuhtimii, ođđa vejolašvuođaide skiippahuksenindustriijas ja eará ealáhusaide, ja vel suohkana dilii birra pandemiija áigge.

Gonagas Harald ja Dronnet Sonja Gonagasskiippa Norges, jođidettin Havyard-skiippahuksenrusttega lusa Leirvikas. Govva: Liv Anette Luane, Gonagaslaš hoavva

Havyard Leirvik hukse fatnasiid ja elektrelaš feargaid ja lea stuorámus fitnodat suohkanis. Diimma čávčča lei dat badjel 100 jahkásaš skiippahuksenfitnodat gitta stuora koronanjoammuma geažil. Suohkanis mas leat 1500 ássii ja bargit skiippahuksenfitnodagas, 700 olbmo leat erremis leamašan maŋŋel njaommuma.

Historjjálaš geađgemilloroggi ja ođđa kulturláhtorahppan

Gonagasbárra galledii Havyard Leirvik mátkis Sogn ja Fjordanes 2002:s. Dalle finai Geađgemillopárkas ja nu maiddái dán mátkis.

Geađgemillopárka Hyllestadas lea olgomusea, stuoramus geađgerogganbáikkiin vikiŋga- ja gaskaáiggis Davvi-Eurohpás. Dan áigge ii birgen geađgemillu haga. Geađgemillo haga – eai livčče jáfut ii ge biebmu. Geađgemilluid vuvde čuođiduháhiid mielde miehta Norgga, Ruosa ja Dánmárkku.

Gonagas Harald ja Dronnet Sonja Geađgemilopárkas Hyllestadas. Govva: Heiko Junge / NTB

Dronnet Sonja rabai Geađgemillopárka 2002:s. Odne Dronnet rabai ođđa kulturláhtu, seammá giehtamilluin go 19 jagi áigi. Oahppit Hyllestada nuoraidskuvllas muitaledje skuvllaprošeavtta birra gos sii fitnet Geađgemillopárkas 2,5 diimmu juohke vahku oahppat historjjá Hyllestada ja boares dáiddu birra – nu mot dáhkut ja gortniid millet.

Oahppit Hyllestada nuoraidskuvllas servet skuvllaprošektii Geađgemillopárkas. Govva: Heiko Junge / NTB

Ruoktot Hyllestadái

Tanja Kvellestad Akse (23) fárrii ruoktot Hyllestadái gasku oahpu gazzama. Son lea eadni Conradái (1,5), ja irggis lea bargu Hyllestadas. Odne muitalii Gonagasbárái ahte  son sávai ruoktot fárret, ja maiddái erenoamášpedagogihka bachelorgráda birra Romssas man son lea ollašuhttan ruovttus Hyllestadas.

Tanja Kvellestad Akse (23) ságastalai Gonagasbárain eretfárrema birra. Govva: Heiko Junge / NTB

Hyllestad lea smávva servodat ja rahčá seamma láhkái go eará nai smávva gilážat ja unnit suohkanat – eretfárremiin. Suohkana olmmošlohku lea njiedjan 1950 rájes. Nuorat fárrejit gávpogiidda ja stuorat čohkkebáikkiide – ja dušše unnitlohku máhccá fas ruovttoluotta go gerget oahpu gazzamis.

Tanja Akse ságastalai Gonagasbárain ja sátnejođihedjiin mot son dán dili sáhtášii bisset.

Mánát Hyllestada mánáidgárddis sávvet bures boahtima Gonagasbárrii. Govva: Liv Anette Luane, Gonagaslaš hoavva

– Áigi lea guhki leamaš

Gonagasskiippa Norge Gonagasbárain vuolgá maŋŋegaskabeaivvi káijas. Florø lea boahtte ja maŋemus bisánanbáiki Gonagasbára golmma beaivásaš mátkkis – vuosttaš almmolaš mátki Norggas das rájes go koronapandemiija ollásit čuozai njukčamánus 2019:s.

Gonagasbáras livččii sávaldat gullat mot báikegottit ja olbmot leat birgen pandemiija dilis ja makkár vásáhusat sis leat.

– Áigi lea guhki leamaš, eat ge vel dieđe goas geahčči boahtá, ja dat gal lea garrasit čuohcan olbmuide. Ja nu leat máŋgasat gártan nuppástuhttimii. Ja dan leat sii nagodan, Gonagas dajai maŋŋel galledeami Flåmas – vuosttaš beaivvi mátkkis.

– Lea buorre gullat man hutkái olbmot leat váttis dilis. Dilis mii mis lea leamaš mannan jagi, ja de lihka nagodit jurddašitgoahtit eará ládje ja mot boahtte áiggis galgá birget. Dat lea nana buorre, loahpahii Dronnet.