Birra Norgga vaikko leš ge pandemiija

Koronapandemiija ja njoammuneastadeamit leat olu váikkuhan Gonagasviesu ja Gonagaslaš hoava doaimmaid jagis 2020:s. Sihke Gonagasviesu miellahtuid almmolaš prográmma ja olu hoava bargu fertii rievdaduvvot ja unniduvvot seammás go servodaga fertii giddet. Gonagasa konstitutionála doaimmat leat eanáš čađahuvvon nu mot dábálaš.

-Lea leamaš earálágaš jahki, muhto mii leat ilus go Gonagasbearaš lea sáhttán olbmuiguin deaivvadit eará vugiid mielde – digitála guossástallamiid ja dearvuođaid bokte, tv-buvttademiid čađa ja earálágan miessemánu 17. beaivve – ja muhtun duohta deaivvademiiguin dasa lassin. Gonagaslaš hoavas lea ruhtadilli buorre, ja leat plánat dan jagi ja maiddái boahttevaš jagiin čađahit prošeavttaid maid eat leat beassan čađahit 2020:s. Mii leat duhtavaččat go leat nagodan doalahit sihkkarvuođaprošeavtta ovdáneami nu mot lei áigumuš. Dan jagaš vuolláibáza vuolgá das go leat váldán atnui ovttiid jagiid várrejuvvon ruđa, cealká hoavvahoavda Gry Mølleskog.

Birra Norgga pandemiija áigge

Vaikko lei pandemiija, Gonagasbearaš lihkká nagodii gallestallat buot riikka fylkaid, 24 suohkaniid ja Jan Mayena jagis 2020:s. Dasa lassin ožžo vel 31 suohkana digitála gallestallama eambbo go 40 videočoahkkimiid čađa, badjel 30 servodatsurggiin. Gonagasbearaš deaivvadii olbmuiguin dearvvašvuođa suorggis, oahpaheaddjiiguin, studeanttaid ja ohppiiguin, ealáhusain, kultursurggiin, mánáidsuodjalusain, bassiiguin, NAV:ain, olbmuiguin geat bákkus leat virgeluomus, sátnejođiheaddjiiguin, eaktodáhtolaš bargiiguin ja servviiguin mat ovddidit psyhkalaš dearvvašvuođa- namuhan dihte muhtumiid.

50. stádaguossástallan

Njukčamánus leigga Gonagasbárra sudno vihttalogat stádaguossastállamis. Historjjálaš guossástallan Jordanii lei Gonagasbára vuosttaš stádaguossástallan Gaska-Nuorttas. Juste maŋŋá go bođiiga fas ruovttoluotta, šadde garra njoammuneastadanbijut, ja das maŋŋel ii leat Gonagasbearaš fitnan makkárge mátkkiin olgoriikkas. Gonagasbearaš lei oktiibuot njeallje geardde virggálaččat guossis olgoriikkas 2020:s, ja fitne digitálalaččat vel čieža riikkain.

Sihkkarvuođaprošeakta gonagaslaš opmodagain

Stuorámus prošeakta Gonagaslaš hoavas lea sihkkarvuođaprošeakta man ulbmil lea nannet sihkkarvuođa Šloahtas ja muđui gonagaslaš opmodagain. Maiddái dán prošektii lea pandemiija čuohcan, muhto doaibmabijut leat biddjon johtui mat nannejit vejolašvuođa gárvvistit plána mielde 2021:s.

Jahkerehketdoallu

Jahkerehketdoallu čájeha 65 miljovnna ruvdnosaš vuolláibáza. Plánejuvvon sisaboahtu- ja olggosgolloárvvoštallan vuolgá 2020 jagi sihkkarvuođaprošeavttas mii plána mielde lea golahan 87 miljovnna ruvnno prošektii ovttiid jagiid várrejuvvon ruđaiguin.

Gonagaslaš hoava doaibmarehketdoallu čájeha 22 miljovnna ruvnno buorrin báhcán. Njoammuneastadanásahallan lunddolaččat gáržžidii Gonagasbearraša čađahit virggálaš doaluid ja mátkkiid, ja danin leat unnit golahan. Maiddái máŋgga Hoava divodanprošeavttat maŋiduvvo, danne go guhkit áigge ii lean vejolaš olggobeal’ bargiide dahje eará gálvolágideaddjiide beassat gonagaslaš opmodagaide njoammuneastadanbijuid geažil. Lea jurdda eanáš badjebáza golahit prošeavttaide 2021:s ja 2022:s. Danin ráhkkanit nu ahte šaddá vuolláibáza 2021 doaibmarehketdoalus ja várra maiddái 2022:s. Stuorámus oassi dain ruđain galgá golahuvvot opmodagaide ja párkkaide.

Gonagaslaš hoava jahkeraporta 2020 oktan jahkedieđáhusain lea doaimmahuvvon Stuoradikki Presideantagoddái, Gielda- ja ođasmahttindepartementii ja Riikarevišuvdnii.