Almmolaš guossástallan Samoas

Ruvdnaprinsa Haakon ollii Samoai eske veaigin, ja oaivegávpogis Apias sávve sutnje almmolaččat buresboahtima.

Ruvdnaprinsa Haakon inspisere gudnigardena buresboahtinseremoniija oktavuođas Apias. Govva: Sven Gj. Gjeruldsen, Gonagaslaš hoavva

Samoa lea okta stuorámus stáhtain Lulli-Jaskesábis, ja das lea – nugo  Fijis – njunuš rolla dan regiovnnas. Eanadoallu ja guolásteapmi lea váldoekonomiija, muhto turisma lea maid šaddagoahtán dađistaga dehálit ealáhus. Samoai čuhcet maid dálkkádatnuppástuvvamiid váikkuhusat garrasit, seammaládje go eará Jaskesábi suolostáhtaide ge.  Áhpedási badjáneapmi ja garra dálkkit mat dávjjit bohtet, leat duohta áittan dáid guovlluin. Guovvamánus 2018 dagahii Gita syklona stuora billistemiid.

Samoa vuoruha duođalaččat dan ahte oainnusindahkat dálkkádagaid nuppástuvvamiid váikkuhusaid, ja dan mot dat čuhcet smávva stáhtaide Jaskesábis. Dan oktavuođas lea dát riika váldán dehálaš jođihanrolla ON ja eará internašuvnnalaš arenain, ja lei maid dehálaš ovttasbargi Norggain dálkkádatšiehtadallamiin ovdal Pariisašiehtadusa.

Almmolaš mállásat

Stáhtaoaivámuš Tuimalealiifano Vaaletoa Sualauvi II lágidii almmolaš mállásiid gudnin gussiide. Ruvdnaprinsa Haakon doalai sártni mállásiid oktavuođas ja deattuhii man mearkkašahtti Samoa jođihanrolla lea.

Goappešat riikkat vuoruhit bargguid mat gusket dálkkádagaid nuppástuvvamiidda ja dearvvaš áhpái. Goappešat álbmogiin lea nanu čanastat áhpái, ja mii oaidnit baluin dan ahte ábis bivdojuvvo badjelmearálaččat guolli ja ahte dat nuoskkiduvvo. Ii guliid ii ge plastihkkanuoskkidemiid sáhte rájiiguin ja ekonomalaš sonaiguin caggat, deattuhii Ruvdnaprinsa. Danin dárbbašuvvo globála áŋgiruššan sihkkarastin dihte ábiid ja nanu guoddevaš áhpebivddu boahttevuhtii.

"The oceans of the world form a global ecosystem. Neither fish stocks nor plastic waste are stopped by boundaries, or confined to economic zones. A global effort is required to secure our oceans for sustainable harvesting in the future – so that fishermen can bring in their catch and tourists can meet clean nature."

Stáhaoaivámuš Tuimalealiifano Vaaletoa Sualauvi II ja Ruvdnaprinsa Haakon mállásiin odne eahket. Govva: Sven Gj. Gjeruldsen, Gonagaslaš hoavva

Ihttin leat Ruvdnaprinsa Haakonis máŋga čoahkkima Samoa jođiheddjiiguin, ja dasa lassin galgá son fitnat geahččamin guokte dulveguovllu. Norgga delegašuvdna beassá oaidnit guovlluid maidda hui dávjá čuhcet dulvvit ja maid sii barget nannen dihte báikkálaš servodagaid dulvviid vuostá.

Doppe loahpahe ge Ruvdnaprinsa su almmolaš guossástallama Jaskesábis. Son lea leamaš sihke Tongas, Fijis ja Samoas ja lea oaidnán, gullan olbmuid muitaleame ja oahppan – earenoamážit dan mot sii leat vásihan dálkkádagaid nuppástuvvamiid váikkuhusaid. Diet suolostáhtat leat dehálaš ovttasbargit Norgii gažaldagain mat gusket dálkkádagaide ja áhpái.