Njuike váldosisdollui

Almmolaš guossástallan Fijis

Gonagaslaš Allavuohta Ruvdnaprinsa lea almmolaš guossástallamis Jaskesábi sulluin. Odne sávve sutnje buresboahtima Fiji oaivegávpogii, Suvai, árbevirolaš seremoniijain.

08.04.2019

Ruvdnaprinsa Haakon lea almmolaš guossástallamis suolonašuvnnain Tonga, Fiji  ja Samoa. Eske beaivet seaivvui Ruvdnaprinsa Nausori girdihámmanii olggobealde Suva. Doppe son inspiserii gudnigardena fárrolaga suodjalushoavddain Viliame Naupoto.   Ruvdnaprinsa Haakon inspisere gudnikompaniija, ovttas suodjalushoavddain Viliame Naupoto. Govva: Karen Setten / NTB scanpix

Fiji lea riika mii iežas olmmošlogu ektui doarju buot eanemus olles máilmmis ON ráfibisuheaddji veagaid. Ovdamearkkadihte leat Norgga soalddáhat leamaš ráfibálvalusas ovttas Fiji soalddáhiiguin Libanonas -soalddátveagas man jođiheaddjin lei dálá  presideanta, hearrá Jioji Konrote.

Árbevirolaš buresboahtin

Oaivegávpogis Suvas sávve Ruvdnaprinsii Haakonii buresboahtima árbevirolaš vugiin, lieđđekránssain (salusalu), bossubániin- ja kava seremoniijain.

 Jaskesábijugus kava lea oassi árbevirolaš buresboahtinseremoniijas. Govva: Karen Setten / NTB scanpix

Maŋŋá seremoniija vulggii Ruvdnaprinsa Presideantta Jioji Konrote gárdimii, Borron House, čoahkkimii. Guovddáš fáddá sudno ságastallamiin lei ovttasbargu gaskal Norgga ja Fiji gažaldagain mat gusket áhpái ja dálkkádagaide.

Fijis lea hui aktiivvalaš rolla ON bargguin, ja nu leat ge Norggas ja Fijis ollu oktasaš beroštumit. Fiji jođihii  šiehtadallamiid gitta ON stuora COP23 dálkkádatkonferánssa rádjái. Fiji lea ge fárus Alimusdásipanelas mii gieđahallá nanu guoddevaš áhpeekonomiija, dan panela jođiheaddji lea stáhtaministtar Erna Solberg. Fiji lei maid stuora ON áhpekonferánssa lágideaddji 2017:s. Norga áigu dan barggu fievrredit viidáseappot, go Our Ocean konferánsa lágiduvvo Oslos dán jagi. Doppe galgá ábi resurssaid máhtolašvuođa vuođul hálddašeapmi leat guovddážis, ja fra Tonga, Fiji ja Samoa olgoriikaministarat leat bovdejuvvon dohko oasseváldin.

Ruvdnaprinsa Haakon ja Presideanta Jioji Konrote čoahkkimis. Govva: Karen Setten / NTB scanpix

Almmolaš vuostáiváldin

Ruvdnaprinsa Haakon lei maid čoahkkimis stáhtaministariin Josaia Bainimarama, guhte maid lei guossástallama vuostáiváldima lágideaddji. Sártnistis vuostáiváldima oktavuođas deattuhii Ruvdnaprinsa  Fiji dehálaš jođihandoaimma gažaldagain mat gusket áhpái ja dálkkádagaide. Son illudii beassat ovttasbargat dieid dehálaš gažaldagain, mat leat guovddáš áššit goappešat riikkaide.

"The voice of the Pacific is important, and Fiji has made it heard"

"Under the leadership of the Prime Minister of Fiji, the Pacific has raised its voice on the global stage — speaking out about critical issues such as climate change and the oceans. Fiji’s leadership at COP23 and the UN Ocean Conference was crucial, and enabled the Pacific to influence vital processes and agreements. The voice of the Pacific is important, and Fiji has made it heard."

Stáhtaministtar Frank Bainimarama lágidii vuostáiváldima Ruvdnaprinsii ja Norgga delegašuvdnii. Govva: Sven Gj. Gjeruldsen, Gonagaslaš hoavva

Ruvdnaprinsa Haakon sávai loahpas iežas sártnis hui ollu lihku Fiji álbmogii sin našunálafalástallama – rugby – máilmmimeasttir gilvvuin, mat lágiduvvojit čakčamánus Japánas. Ihttin iđit beassá Ruvdnaprinsa ieš geahččalit dien falástallama, hárjehallamiin - Fiji našunála rugby-arenas, Albert Park.

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas