Feastamállásat Operas

Guovtte beaivásaš ávvudeapmi lea ge dasto loahpahuvvon ja Gonagasbárra doalai oktasaš giitus sártni ráđđehusa mállásiid oktavuođas odne eahkes. Muhto árabut odne lei vuos Gonagasbárra ja sudno guossit Oslovuonasen Gonagasskiippain.

Lunša vuonas

Eske ovdalgaskabeaivvi leigga Gonagas ja Dronnet bovden gussiideaskka Gonagasskiippa Norge mielde finadit Oslovuonas.

Gonagasskiipa gonagaslaš gussiiguin mátkkošteamen Oslovuonas. Govva: Vidar Ruud / NTB scanpix

Ii lean gal buot buoremus dálki, mihto sihke doalloguoddit ja guossit ledje dálkki mielde gárvodan.  Sii bohte Honnørbryggenii vuolábealde Oslo Ráđđeviesu diibmu 11.00, ja doppe sáhtostedje sin Gonagasskiipii. 

Dronnet Sonja mannamin Gonagasskiipii. Govva: Berit Roald / NTB scanpix

 Gullojedje 21 skuohta Akershus kanovnnain go Gonagas Harald lávkii sjaluppenii mii fievrredii sin  K/S Norge Fatnasii.

Ráidun Karl Johan mielde

Majestehta Gonagasa Garde láidestii gussiid Operaviesu guvlui, go lei áigi dohko vuolgit. Sii marserejedje Šloahtas Opera guvlui diibmu 18.15, ja 18.30 rájes čuvvo gonagaslaš guossit maŋis, geat ledje boahtán sihke dán riikkas ja olgoriikkain.

Mátkki vuolde besse sii gullat iešguđetlágan musihkkakorpsaid, ja go guossit ollejedje Operai, besse sii oaidnit dánsejeddjiid sihke olggobealde ja siste. Festii čiŋadan guossit aste bisánastit dearvvahit preassaolbmuid geat ledje dohko boahtán.

Ávvudeaddjit bođiiga Operai diibmu 19.00, gos stáhtaministtar Erna Solberg vuostáiválddii. Govva: Heiko Junge / NTB scanpix

Musihkka ja dánsun

Otná eahkeda feastamállásiin ledje 270 guossi. Ledje buot fylkkaid, olles Norgga ja norgga servodateallima ovddasteaddjit. Ledje ollugat geat ovddastedje maiddái kultuvrra ja falástallama.

Ráđđehus lei vállje  Opera ovddabeallái Akershus šloahta feastamállásiidda – ja musihkka ja dánsun lei ge dehálaš oassi eahkeda guoimmuhanprográmmas. Ollu lávlut, musihkkárat ja dánsejeaddjit  guoimmuhedje sihke ovdal mállásiid ja maiddái mállásiid oktavuođas. Lei álbmotdánsa ja baleahtta, koaralávlun ja solisttat, opera ja tango.

Den Norske Opera Mánáidkoara lávllui Gonagasbárrii riegádanbeailávlaga Operas. Govva: Heiko Junge / NTB scanpix

Solistakoara lei maid musikála konferansier.

Stáhtaministara sárdni

Dákkár dilálašvuhtii gullet sártnit, ja dán eahket gulaimet guokte. Guossoheaddji, stáhtaministtar Erna Solberg  lei vuosttaš gii doalai sártni.

Govva: Håkon Mosvold Larsen / NTB scanpix

Stáhtaministtar dajai ahte su mielas, gii bargá oažžut olbmuid bissut barggus nu guhká go nagodit, lea Gonagasbárra máŋgga dáfus buorre ovdagovva diesa. Ja son čujuhii dasto maid Gonagasa ja Dronnega rollaide nugo ambassadevrrat : "lundui ja kultuvrii. Fitnodagaide mat addet midjiide birgejumi. Olbmuide geat ásset dáppe."

Stáhtaministtar loktii maid ovdan Gonagasbára nugo bissovaš ásahussan min leahkin dilálašvuođas:

"Dakkár máilmmis,  dievva ráfehisvuođain, riidduiguin ja ravdaoaiviliiguin, ovddasteahkki doai ovddolaš bissovašvuođa servodagas. Nanu čanastaga min eallimis. Dan mii dárbbašit. Doai veahkeheahppi ásahit searvidahtti servodaga man nanusvuohta lea luohttevašvuohta, rabasvuohta ja árvvasvuohta".

Gonagasbára giitus

Gonagas ja Dronnet doalaiga iežaska sártni ovttas- soai hálideigga dán eahkeda skeaŋkka ovddas giitut. Gonagasbárra muitalii man giitevaččat soai leaba obbalohkái eallimii ja iežaska doibmii – ja go leaba ožžon dan vejolašvuođa ahte eallit nugo soai ieža leaba. Dasa leamaš dárbu.

Dronnet Sonja ja Gonagas Harald doallaba oktasaš sártni Operas. Govva: Heiko Junge / NTB scanpix

"Mii livččii 80 jagi eallin leamaš almmá daid vejolašvuođaid haga mat olbmos leat hukset su iežas eallima ja oaivila daid geatnegasvuođaide, árbái ja daguide mat su doibmii gullet?",jearai Gonagas.  "Lei várra váttis mu áhččái čuovvut mu allagit árvvusadnojuvvon áddjá maŋis. Ja munnje lei váttis čuovvut mu áhči maŋis, geasa álbmot  nu sakka liikui. Muhto mun gávnnahit oalle johtilit ahte áidna vuohki movt dan nagodan dahkat, lea dat ahte ferten gávdnat iežan vuogi movt bargat Ferten leat dakkár go mun juo lean. Ieš. Nu lea minguin buohkaiguin dán eallimis."

Dronnet Sonja muittašii sullasaš vásáhusaid:
"Vásihemiid, áiggi ja obbalaš servodatovdáneami bokte ohppen dađistaga ahte lea vejolaš leat sihke dronnet ja mun ,dábálaš Sonja maid. Ahte duohtavuođas ii lean makkárge eará geaidnu maid sáhtten čuovvut! Jáhkán mii buohkat dárbbašit dovdan dan, ahte ollu eallimis lea čadnojuvvon oktii. Mii dárbbašit vuođu, oadjebasvuođa vai sáhttit ovdánit.

Soai giittiiga maid goabbat guoibmáseaskka – nana doarjaga ovddas:

"Odne hálidan giitit dan vejolašvuođa ja doarjaga ovddas maid lean ožžon deavdit iežan rolla, nugo mu mielas lei dárbu dan dahkat. Dan in livčče nagodan dahkat almma iežan eamida haga – gii leamaš mu bálddas juo fargga 50 jagi. Danin hálidan odne earenoamáš lieggasit giitit Dronnega."

"Hálidan odne eahket sáddet liegga giitosa ruovttoluotta Gonagassii – vaikko son okte gohčodii ge mu trollet! – danin go son lea addán munnje vejolašvuođa hábmet mu rolla dan láhkái mii addá  munnje oaivila."

Feastabávkkanas vel loahpas

Olggobealde Opera vurde jietnagovat, čuovggat ja feastarakeahttabáhčin Gonagasbárrii ja eará gussiide. Kajáhkkásuhkkit suhke čuovggaiguin Opera meaddel ja dađistaga čuvgejedje feastarakeahtat almmi.

Olggobealde Opera loahpahedje feastarakeahtat feastamállásiid. Govva: Jon Olav Nesvold / NTB scanpix

Maiddái Šloahta lusa ledje cahkkehan čuovggaid vuorddekeahtes illun Gonagasbearrašii go sii máhcce fas ruovttoluotta Šlohttii.