Hopp til hovedinnhold

Loahpaheigga Kristiansandas

Majestehtaguovttos Gonagas Harald ja Dronnet Sonja loahpaheigga iežaska ávvudanmátkki odne. Dat dáhpáhuvai Ruvdnaprinseassa ruovttugávpogis Kristiansandas.

29.06.2016

Ávvudanmátki álggii Romssas geassemánu 18. beaivvi. Doppe vulggii Gonagasskiipa lulásguvlui, ja bisánii Budejjus, Troandimis, Bergenis ja Stavangeris – ja dál loahpas vel Kristiansandas.  Buot báikkiin leat gávpogat bovden álbmotfestii,  ja Gonagasbárra lea bovden juohke fylkkas gussiid gieddefestii.

1 300 mehtera álbmotfeasta

Kristiansand bovdii 1 300 mehtera guhkes álbmotfestii odne.  Olmmošráidu álggii Kilden kulturviesus, ja ráiddus ledje 400 máná ja rávisolbmo vuordimin Gonagasbára ja Ruvdnaprinsabára borramušmovttain, kulturmovttain ja falástallanmovttain.

Dilálašvuođa álggahedje Ibsena divttain Terje Vigen birra – ja lei musihkka, dánsa ja resitašuvdna. Dasto sii vulge Odderøyai  "Blæsen" studeantaorkestera musihkain, geat ledje vuordimin šalddis.

Gonagasbearaš beasai oaidnit mánáiddáidaga, dánssa Kjell Nupena stuora lihti luhtte Nupen-parkkas, ja lei lávlun ja musihkka maid Fargespill multikultuvrralaš dáiddaprošeakta, Stinta skuvlakorpsa ja Kristiansand čuojahan- ja dánsenjoavku  ovdanbukte.

Gonagaslaš guossit besse maid máistet báikkálaš borramušaid Tresse biebmomárkanis, ja gullat movt daid ráhkadit.

Gieddefeasta Myren dálus

Veaigin ledje čoahkkanan 300 guossi Sørlandas Myren dálu gieddefestii, gosa Gonagas ja Dronnet bođiiga heastagearrosáhtuin, maŋŋá go Eldbjørg Rysstad lei vuostáiváldán sudno brukkas lávlumiin.

Juohke Ávvudangávpogis leat hástalan muhtun nuora doallat sártni  iežas boahtteáiggi doaivaga birra Norggas, ja Kristiansandas dan dagai 18 jahkásaš Marthe Næss Thomassen. Dronnet Sonja gesii čoahkkái muhtun fáttáid maid nuorat leat namuhan iežaset sártniin, ja dajai ahte mis lea buorre dilli:

- Mii leat gullan ja vásihan ahte nuorain lea višuvnnat, máhttu ja dáhttu, ja sii leat bures ráhkkanan boahttevaš hástalusaide. Min riika dáidá bures áimmahuššojuvvot, maiddái boahtte áiggis!

Dronnet gesii maid čoahkkái daid ollu muitogovaid mat sudnos leat čohkkon dán Ávvudanmátkkis:

- Mii ovddešetnot.  Mátki min guhkes  riddoguovlluin, mii leamaš dego máinnášmátki, lea fargga nohkamin. Sihke Gonagas, Ruvdnaprinsabárra ja mun leat vuot beassan vásihit buoremus Norgga, buot dan maid olmmoš beassá oaidnit go mátkkošta davvin lulás. Dákkár mátkkis beassá vásihit luonddu ja deaivvadit olbmuiguin, ja oaidnit man iešguđetlágan eatnamat ja olbmoluonddut leat! Lea hui ovddolaš beassat vásihit dien girjáivuođa jagis 2016.

- Mii ja min našuvdna gal rievdá áiggiid mielde.  Muhto várit, vuonat, báktesullot – go oaidná buot dieid mat leat agálašvuođas, min  guhkes mearragáttiin – dat boktet álo garra dovdduid.  Olmmoš dovdá de nanu giitevašvuođa! Makkár riika!

Dronnet Sonja giitalii buohkaid geat leat leamaš mielde dahkamin Ávvudanmátkki dákkár vásáhussan. Dronnet giittii maid buohkaid geat leat leamaš mielde lágideamen álbmotfeastta Kristiansandas – ja namuhii maiddái Quartfestivála:

- Gávpotguovddáža álbmotfeasta eske beaivet lei stuora vásáhus! Váimmolaš giitu buohkaide geat leamaš mielde ráhkadeamen diekkár somás prográmma. Duođai lea stuora girjáivuohta min ráhkis manji riegádangávpogis! Earenoamáš hávski lea dat go Quartfestiválas maid lea 25 jagi ávvudeapmi – seammaládje go munnos Gonagasain.  Dasgo almmá Quartfestivála haga ii leat buorre dadjat gii dál livččii Norgga Ruvdnaprinseassa!?

12 jiena nanu Flash lávlunjoavku lávllui dan botta go guossit besse máisttašit báikkálaš borramušain mat ledje lágiduvvon dasa.

Ja vuorddekeahtes musihkkavásáhus Kristiansand suohkanis lei Secret Garden, mii čuojahii go Gonagas Harald ja Dronnet Sonja, Ruvdnaprinsa Haakon ja Ruvdnaprinseassa Mette-Marit válde earu olbmuiguin ja manne fatnasii mii doalvvui sin fas Gonagasskiipii.

Ovddolaš Ávvudanmátkki lea vássán.

 

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas