Feastabeaivi Budejjus

Dronnet Sonja sávai gávpogii lihku ávvudanbeivviin:

- Buot ovddemus hálidan sávvat Budejju gávpogii váimmolaš lihku 200 jagi ávvudemiin! Munnos Gonagasain leat ollu  buorit muittut dán gávpogis, ja munnuide lea earenoamáš hávski beassat leahket dáppe juste dákkár ávvudoaluid oktavuođas.

Gávpotvázzin ja álbmotfeasta

Gonagasskiipa Sjaluppen – fanas bođii gáddái veaháš badjelaš diibmu 11.00, ja Gonagas ja Dronnet lávkiiga gáddái Budejju hámmanis. Das soai vulggiiga vázzit gávpogii, márkanbáikki guvlui. Dan vázzinmátkkis lei ollu oaidnámuš Gonagasbárrii; sihke čuovgaráhkkanusat ja dáidaga ovdanbuktin Stormen girjerádjosis, mánáid ja nuoraid lávlun ja dánsun. Duopmogirku lávlunskuvlla lávlunjoavku lávllui Budejjulávlaga, ja mánáidgárdemánát lávlo 200 jagi riegádanbeaivvilávlaga ávvudeaddjái Budejju gávpogii.

Márkanbáikkis beasai Gonagasbárra vásihit eanet musihka ja maiddái brasilialaš ja somálialaš sambadánsuma.

Dánsejeaddjit eai gal atnán áššin ge dan go ledje dušše aittoládje gávcci lieggagráda olgun. Olles dát lágideapmi loahpahuvvui Gonagaslávlagiin.

Gieddefeasta Budejju kulturguovddážis

Gonagas ja Dronnet leigga bovden 300 guossi iešguđet guovlluin Nordlánddas gieddefestii, ja dat feasta lei kulturguovddážis eske veaigin. Dronnet Sonja sávai gussiide buresboahtima:

- Munnje lea stuora gudnin beassat sávvat didjiide buohkaide liekkus buresboahtima deike dán čáppa Nordlándda kulturguovddážii, maid mii lihkus beassat geavahit go hálidit bovdet gieddefestii.

Báikkálaš olbmot, earet eará Nordlándda fágaskuvllas, ledje lágidan borramuša ja guossohedje dan, ja Nuoraid fylkkadikki jođiheaddji Marija Håkonsen Milanovic doalai sáhkavuoru boahtteáigi doaivaga birra. Ledje máŋggalágan guoimmuheamit, earet eará musihkka ja lávlagat maid Budejju joatkkaskuvlla oahppit ovdanbukte.

Dronnet liiko hui bures vánddardit luonddus – ii unnimustá Nordlánddas – dan gal ollugat dihtet, ja sártnistis son muitalii iežas ollu mátkkiid birra dán fylkkas:

- 25 jagi dás ovdal ledjen ovtta iežan vuosttaš vázzinmátkkiin Sáltoduoddaris. Dat lei dakkár vásáhus maid in vajáldahte. Mu vázzinváibmu gal dasa liikui nu sakka. Ja danin mearridan dallánaga juo ahte áiggun  máhccat fas dohko vásihit seamma guovllu dálvehámis.  Maŋit jagi ledjen ge čuoigamin doppe.

Maiddái eahkes oažžu Dronnet  vejolašvuođa vázzit – son galgá rahpat Budejju gávpotvári Keaisárbálgá.

Ludvig Filip-latnja

Loahpas beasai Gonagasbárra oaidnit Ludvig Filip-lanja, dovddus latnja gos leat seaidnemaleriijat maid Gottfried Ezekiel  lea málen 1754:s. Maleriijat čiŋahedje álggos Bodin báhpagárdima, mii lei álggos dán báikkis. Latnjii leat bidjan Orleans fránskkalaš prinssa Louis Philippe nama, guhte lei báhpagárdimis guossin 1795 geasi, go lei báhtaran fránska revolušuvnnas. 1830:s šattai son Frankriikka gonagassan.

Rahpá Keaisárbálgá

Dronnet Sonja rahpá odne eahkes "Keaisárbálgá" – mii lea ođđa bálggis gávpotváris gos lea hui várddus, ja dat lea gárvvistuvvon dán ávvudanjahkái.

Guhtta Nepala sherpara leat dainna bálgáin bargan 2015 rájes, ja leat ráhkadan bálgá maŋemus 15 - 20 mehtera geađgetráhppan. Ovdal go sii huksegohte, de sii buressivdnidedje vári rohkosiin ja čuovggaiguin vai ii makkárge lihkuhisvuohta dáhpáhuva barggadettiin. Diet guhtta bargi leat boahtán giliin mat leat Mount Everest lahkosiin ja sis lea guhkes bargohárjáneapmi bargat geđggiiguin ja ceakko várregilggain. 

Dronnet áigu vázzit bálgá Keaisárvarden lusa, gos Gonagas Harald maid lea vuordimin. Dronnet Sonja galgá rahpat bálgá ja dan son dahká go lokte geađggi ovttas muhtun sherpar bargiin. Sullii 40 000 olbmo vázzet dán Keaisárvarden luhtte juohke jagi. Ja dál go lea ođđa bálggis, de sáhttet oalle fargga lassánit vel eanet vázzit.

Maŋŋelaš odne eahkes vuolgá Gonagasskiipa Budejjus ja bidjá sivtta Troandima guvlui, gosa sii leat vurdojuvvon geassemánu 22.beaivvi.