Guossástalai Homer, Alaskas

Homer lea unna gávpogaš go ásset badjelaš 5 000 olbmo, ja dat lea Kenai - njárggas lulágeahčen Alaska. Gávpot lea čáppa báikkis Kachemak Bay gáttis, ja gávpoga birastit várit, vuovddit ja jiehkit. Ja turisma lea ge dehálaš ealáhusgeaidnu Homeris, ja áinnas fállet mátkkálaččaide maiddái guollebivdovásáhusaid, luossabivddu ja bálddesbivddu. Das lahkosis lea maid Kachemak Bay State Park, gos lea vejolašvuohta vásihit luonddu.

Fanasmátki dutkiiguin

Gonagas Harald oaččui vejolašvuođa návddašit veaháš dien guovllu ovddolaš luonddu, go son disdaga finai fanasmátkkis dutkiiguin. Fanasmátkkis ledje mielde báikkálaš dutkiguovttos Heather Renner ja Angela Doroff, geat muitaleigga makkár dálkkádatnuppástusaid sii oidnet báikkálaččat.

Sii vudje lulásguvlui vuonas,Tutka Bay Lodge báikái, gos gussiide guossohedje lunšša.

Gonagas Haraldis lea stuora beroštupmi dasa movt dálkkádagaid nuppástuvvamat čuhcet lundui – ja olbmuid eallimii – iešguđet guovlluin máilmmis. Sártnistis studeanttaide Pacific Lutheran Universitehtas lávvordaga ávžžuhii Gonagas nuoraid bargagoahtit dieinna váttisvuođain ja bargat juoidá mii dahká erohusa:

- My generation has little to show for itself when it comes to taking care of the environment and our climate. My hope is that your generation will do better. I feel fortunate to have the opportunity to engage with young people like yourselves. Highly motivated young people are already making a difference and pushing their governments to do more. I hope you will take part in raising awareness about the urgency of the environmental challenges that we are facing.

Mállásat guvernørain

Disdat eahket lei Gonagas Harald guossin almmolaš mállásiin maid guvernøra Bill Walker guossohii Alaska stuorámus gávpogis, Anchorage.

Gonagas Haralda almmolaš guossástallan loahpahuvvo gaskavahku, goas sus lea garra prográmma Anchorage gávpogis. Doppe galget garrasit čalmmustahttit davviguovlluid, dálkkádatgažaldagaid ja arktalaš dilálašvuođaid.