Hopp til hovedinnhold

Almmolaš guossástallan USA:s

Majestehta Gonagas Harald lea álggahan almmolaš guossástallama USA:s, mii galgá bistit vahku. Gonagas guossástallá stáhtaid Washington ja Alaska, ja son ollii Seattle gávpopgii veaigin gaskavahku.

23.05.2015

Olles 450 000 ássi Washington stáhtas leat norgalaččaid maŋisboahttit, ja doppe gávdnojit birrasii 60 iešguđetlágan norgalaš – amerihkálaš searvvi ja organisašuvnna. Ollugat lohket ge maid The Norwegian American Weekly aviissa, mii lea almmuhuvvon 1889 rájes.

- It is easy to understand why so many Norwegian immigrants chose Seattle as their new home, logai Gonagas Harald duorastaga eahkes go doali sártni. - With the backdrop of hills and mountains and the closeness to the ocean, it looks very much like parts of Norway. I also know that you are no strangers to wet weather. All of you who have been to Norway’s second largest city will probably agree: It makes perfect sense that Bergen and Seattle are twin cities.

Guossástallan álggahuvvui veaháš várrogasat duorastaga, Gonagas lei almmolaš lunššas maid Washington guvernevra, Jay Inslee, guossohii. Muhto dan maŋŋá álggii eanet garrasit prográmma Gonagas Haraldii.

Mátkeseminára

Beaivi álggii mátkeealáhusseminárain Seattles, doppe beasai Majestehta deaivvadit Norgga ja Amerihká ealáhusovddasteddjiid. Innovasjon Norge lei čohkken mátkelágideddjiid ja mátkekantuvrraid workshopii, dan birra makkár vejolašvuođat mátkeealáhusain leat Norggas ja dán USA oasis – ja dan fátta birra jotke ságastallat birra beavddi ealáhuslunššas mii lei dan maŋŋá. Ledje sullii 70 guossi, ja sidjiide čájehuvvui maid oanehaš filbma Norgga birra nugo turistabáiki.

Pacific Fishermen Shipyard

Veaigin manai Gonagas Harald Pacific Fishermen Shipyard báikái Ballard gávpotoasis, maid 400 norgalaččaide gullevaš guolásteaddjit ja sin bearrašat vuođđudedje 1946:s. Ballard lea gávpotoassi davvi lulábealde Seattle, mas lea guhkes skiipamátkkoštan- ja guolástanhistorjá.

Doug Dixon vuostáiválddii Gonagasa, ja son oahpistii ge Gonagas Haralda ja muitalii skiipahuksema historjjá. Dan guossástallama oktavuođas beasai Gonagas dearvvahit ollugiid geat gullet dan guovllu ealli norgalaš – amerihkkálaš birrasii. Sin searvvis ledje sihke skiipagoasttideaddjit, guolásteaddjit ja reabbábivdit, ja Gonagas beasai maid máistet borramušaid maid sii ledje ráhkadan.

Bergen Place

Seattle ja Bergen leat ustitvuođagávpogat, ja Ballardas lea unna párkkaš maid leat navdán Bergen Place. Ballard – ja Bergen Place – galgá leat dat báiki mii čohkke eanemus olbmuid miessemánu 17.beaivvi ávvudeapmái olggobealde Norgga.

Oassi párkkas lea devdojuvvon stuora maleriijaiguin, main leat Ballard guhkes dimbbar -ja mearramátkkoštanhistorjjá govat. Seaidnemaleriijaid ledje váldán eret ođasmahttima dihte, muhto ikte beasai Gonagas Harald rahpat ovtta maleriija mii lei ođasmahttojuvvon, mii čájeha nanu čanastagaid gaskal Seattle ja Skandinávia.

Sártnui eahkes

Eahkes lei Gonagas Harald bankeahttaguossin Norgga ambassadevra, Kåre Aas luhtte, gii lei dohko bovden norgalaš – amerihkkálaš birrasa ovddasteddjiid dien stáhtas.

Gonagas Harald doalai doppe mátkki maŋemus sártni mállásiid oktavuođas. Gonagas deattuhii dan man nanu kulturbáttit leat gaskal Norggas ja Washington, ja danin lea álki norgalaččaide dovdat Seattle dego iežaset ruoktun. Son giitalii maid go USA lea álo nu bures sin vuostáiváldán, sihke dalle dan vihtta soahtejagi go Ruvdnaprinsabearaš šattai doppe ássat go nasisttat ledje váldán Norgga vuollásis, ja maiddái maŋit áiggiid go lea guossástallan USA.

 - I am deeply grateful for the generosity and hospitality we felt throughout those five years in the United States. Your country has had a special place in my heart ever since.

 

 

Guoskevaš leaŋkkat

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas