Hopp til hovedinnhold

Norgga – Látvia suodjalusovttasbargu

Majestehtaguovttos Gonagas ja Dronnet čuovuiga eske ovdalgaskabeaivvi H.E. Presideantta Andris Bērziņš MS Baronen fatnasii. Doppe vuostáiválddii Norgga spesiálasoalddátveahka sin.

19.03.2015

Látvia ja Norgga Suodjalusovttasbargu lei guovddážis Presideantta Bērziņš’ nuppi stáhtaguossástallanbeaivvi Norggas. NATO ovttasbargguin lea suodjaluspolitihkalaš ovttasbargu nannejuvvon, ja goappešat riikkain bidjet stuora mearkkašumi internašuvnnalaš geatnegahtti ovttasbargui, deattuhii Gonagas Harald sártnistis gaskavahku eahket. Gonagas ovdošii maid Látvia olbmuid stuora ráfibisuhan dáhtu:

- Dán jagi muitojuvvo dat ahte leat 70 jagi vássán dan rájes nubbe máilmmisoahti nogai. Dat soahti lea máŋgga láhkái váikkuhan min historjái ja min našuvnnaide. Norgga okkupašuvdna bisttii vihtta jagi. Látvia dárbbašii arvat guhkit áiggi oažžut iešstivrejumi. Lea ovddolaš oaidnit látvialaččaid gierdavašvuođa ja dáhtu. Látvia, Estteeatnama ja Lietuva olbmot ráhkadedje 1989:s olmmošráiddu, iežaset golmma oaivegávpogiid gaskka, mii lei 60 miilla guhku. Olles máilbmi ovdošii dien ráfálaš lávlu revolušuvnna!

Bohte fatnasii gasku vuona

Eske ovdalgaskabeaivvi čuovui Gonagasbárra Presideantta Bērziņš MS Baronen fatnasii, mainna sii vudje Oslovuonas. Gasku vuona bohte fatnasii Norgga mariidnabivdit ja Suodjalusa spesiálakommándo soalddáhat, ja dien láhkái čájehedje movt sii sáhttet njuiket fatnasii ja váldit dan iežaset stivrra vuollái.

Suodjalusministtar Ine Marie Eriksen Søreide ja suodjalushoavda Haakon Bruun-Hanssen ledje njunnošis dien doaimmas, gos Gonagasbárra ja Presideantta besse gullat vel eanet min guovtti riikka sihkarvuođa- ja suodjalusovttasbarggu birra.

Lunša Oslo Militære Samfundas

Maŋŋil suodjalusa demonstrašuvnna de leigga Gonagas Harald ja Dronnet Sonja Látvia presideantta lunšaguossin Oslo Militære Samfundas. Gonagaslaš Allavuođaguovttos Ruvdnaprinsa ja Ruvdnaprinseassa leigga maid doppe, ja nu maiddái Prinseassa Astrid, Ferner roavvá.

 

Presideanta Bērziņš loahpaha stáhtaguossástallama Norggas odne veaigin, go lea vuos leamaš čoahkkimis látvialaččaid birrasa ovddasteddjiiguin, dilálašvuođas mii lea Látvia ambassádas Oslos.

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas