Hopp til hovedinnhold

158. Stuoradikki rahpan

Odne rabai Majestehta Gonagas Harald 158. dábálaš Stuoradikki. Seremoniija čađahuvvo allaáiggálaččat, Vuođđolága § 74 mearrádusa mielde.

09.10.2013

Stuoradiggi čoahkkana dábálaččat vuosttaš árgabeaivvi golggotmánus, ja 158. Stuoradiggi čoahkkanii golggotmánu 1.beaivvi. Ođđa presideanttajođihangoddi válljejuvvui konstituerenčoahkkimis golggotmánu 8. beaivvi, ja odne lei allaáiggálaš rahpan.

Majestehta bođii Stuoradiggái ovdalaš diibmu 13.00,  ovttas Majestehta Dronnegiin ja Gonagaslaš Allavuođain Ruvdnaprinssain. Stuoradiggeáirras delegašuvdna, mas dán háve ledje mielde Akershus-beaŋkka áirasat, sávve sidjiide buresboahtima. Dábálaččat fitná Gonagas Stuoradikkis dušše dán ovtta háve jagis.

Truvdnasárdni ja Riikka dilálašvuohta

Seremoniijas leat guokte váldooasi: Truvdnasárdni ja Čilgehus mii muitala riikka dilálašvuođa birra. Gonagas lohká Truvdnasártni, muhto dan leat Ráđđehusa áirasat čállán. Sárdni čájeha ráđđehusa politihka váldolinnjáid boahtte jahkái. Moatti beaivvi geahčen álgá truvdnasárdnedebáhtta, gos Ráđđehus ja opposišuvdna digaštallet dehálaš osiid sártni sisdoalus.

Truvdnasártni maŋŋil lea čilgehus mas muitaluvvo riikka dilálašvuođa birra. Dat lea dieđáhus dan birra maid Ráđđehus lea olahan maŋemus jagi, ja árbevieru mielde lea Ráđđehus nuoramus lahttu mii dan lohká. Maiddái dán jagi, nugo diibmá ge,lei kulturministtar Hadia Tajik mii logai dien dieđáhusa

Go čilgehus lea lohkkojuvvon, de addá stáhtaministtar dan Gonagassii, gii fas addá sihke Truvdnasártni ja Čilgehusa riikka dilálašvuođa birra Stuoradiggepresidentii.

Stuoradiggepresideanttas lea alimus almmolaš ámmát Norggas maŋábealde Gonagasa, ja Stuoradiggepresideanta Olemic Thommessen doalai iežas sártni ovdal go sii loahpahedje seremoniija Ja vi elsker vuosttaš vearssa lávlumiin.

NRK sáddii olles seremoniija njuolga Stuoradiggesálas.

Vuođđoláhka mearrida seremoniija

Stuoradikki rahpanseremoniija lea mearriduvvon Vuođđolága § 74:s:

Saasnart Storthinget har konstitueret sig, aabner Kongen eller den, han dertil beskikker, dets Forhandlinger med en Tale, hvori han underretter det om Rigets Tilstand og de Gjenstande, hvorpaa han især ønsker at henlede Storthingets Opmærksomhed. Ingen Deliberation maa finde Sted i Kongens Nærværelse."

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas