Hopp til hovedinnhold

Mátkki loahppa Marnardal ja Songdalen suohkaniin

Gonagaslaš Allavuođaguovttos Ruvdnaprinsa ja Ruvdnaprinseassa loahpaheigga iežaska Vest-Agder fylkkamátki Marnardal ja Songdalen suohkaniin. Álggos soai leigga Mandalas, gos Ruvdnaprinsabárra oaččui čáppa buresboahtinsávaldagaid.

19.09.2013

Gonagasskiipa lei mannan ija olggobealde Mandal, ja iđđes doalvvui Kongesjaluppen fanas Ruvdnaprinssa ja Ruvdnaprinseassa gáddái gos soai jotkkiiga mátkki viidáseappot Marnardalii. Šaldi ala ledje čoahkkanan ollu olbmot leavggaiguin dearvvahit sudno.

Ollu doaimmat Marnardalas

Øyslebø báikkis lei suohkan lágidan Ruvdnaprinsabárrii prográmma mii sisttisdoalai ollu aktivitehtaid. Sátnejođiheaddji Helge Sandåker lei njunnošis láidesteaddjin. Go Ruvdnaprinsabárra lei ožžon dieđuid báikki birra, gullan sártniid ja musihka, de besse geahčadit mánáid ja nuoraid aktivitehtabáikkiid.

Ruvdnaprinsa ja Ruvdnaprinseassa beasaiga ieža geahččalit ollu doaimmain. Doppe lei sihke dánsa, ráŋggáštusčievččastangilvu, volleyball  ja fuollan. Ruvdnaprinseassa Mette-Marit oaččui maid vejolašvuođa “sihkkelastimiin ráhkadit alccesis juice” earenoamážit ráhkaduvvon sihkkeliin mii lei čadnojuvvon juiceráhkadanrusttegii.

Ruvdnaprinsabárra váccii ovttas sátnejođiheddjiin Mandaljohkagátti  Kalvekleivii. Marnardal 4H-klubbat ledje ovttas ráhkadan doaimmaid geainnu mielde – doppe lei dolla ja besse dolas bassit árbevirolaš biepmuid.

- Go lean ollu jagiid juo leamaš 4H suodjaleaddji, de lea diehttelas hávski go juste dat organisašuvdna lea nu guovddážis dán suohkanis, go sii leat nu viidát fárus lágideamen olgodoaimmaid sihke mánáide, rávisolbmuide ja vuorasolbmuide, logai Ruvdnaprinsa. Son muitalii maid man dehálaš olgoeallin lea su iežas bearrašii. Go oainnán man lášmat son (Dronnet) lea, de jurddašan ahte buoremus dearvvašvuođadáhkádus ferte leat dat ahte vázzit ollu olgun.

Porsmyr gilimusea

Sogndalas manne guossástallit álggos Porsmyr gilimuseai, gos sátnejođiheaddji Johnny Greibesland vuostáiválddii sin. Son oahpistii ja čájehii Ruvdnaprinsabárrii musea. Váldoviesus besse guossit oaidnit sihke gievkkana ja skuvlastobu, oađđenlanja ja bivttasčájáhusa ovdal go vulge olggos, gos leat sihke olgovisttit, áittit ja bádji. Láđus beasaiga Ruvdnaprinsa ja Ruvdnaprinseassa geahčadit dološ atnudávviriid, ja láhtošalddis lei veteránabiila biddjojuvvon čájáhussan.

Porsmyr ustibat leat soames duhát diimmu bargan eaktodáhtolaččat museas ovddas. Bargu lea seammás maid oassin doaimmas man ulbmil lea «Vuorrasiidda»lágidit aktiivvalaš eallima.

Ollu bargu lea biddjojuvvon dán boares musea seailluheapmái – illun sihke nuoraide ja vuoras olbmuide. Gonagasbáras lea earenoamáš beroštupmi čalmmustahttit dan man mávssolaš lea beassat leahket aktiivvalaš buot eallindásiin, ja go boađán ruoktot, de lea mus miella sudnuide muitalit dan maid dáppe lean oaidnán, logai Ruvdnaprinseassa sártnistis maŋŋelaš seamma beaivvi.

Dasto sii manne Frivilligsentralen báikái, gos Ruvdnaprinsabárra beasai gullat kaféa birra mii lea ásahuvvon sisafárrejeaddjietniid várás, ja soai beasaiga maid dearvvahit muhtumiid geat jođihit kaféa ja maiddái gussiid. Maŋemus oassi prográmmas lei borranbottoš Searvegoddeviesus.

Loahpaheapmi Haugenpárkkas

Ruvdnaprinsa ja Ruvdnaprinseassa beasaiga geahčadit párkka ovdal go sátnejođiheaddji álggahii prográmma. Sogndalenis leat olles guovttes geat leat ožžon Brage-bálkkašumi, ja Gaute Heivoll logai jitnosit olbmuide – ja dan maŋŋil lei lávlun gitára čuojaheapmái ja nuoraidviesu dánsenjoavku dánssui hip hop.

Ruvdnaprinseassa Mette-Marit sárdni loahpahii guossástallama ja fylkkamátki. Son logai loahpalaččat sitáhta Tove Jansson Mumistálu girjjiin –dan sitáhta áigu nubbi suohkana Brage-bálkkašumi vuoiti, Paal-Helge Haugen, heŋgestit iežas čállinbeavddi bajábeallái: «Tenk på kunsten – og hold halen i ro.»

- Eallimis leat ollu dilálašvuođat main álkit sáhttá massit jurddašandáiddu, sáhttá massit dan stuora mihttomeari eret čalmmis ja šaddat gierddoheapme. De sáhttá ge veahkehit jus –  smiehttá dáidaga ja diktá seaibbi orrut lihkakeahttá.

Vel okte áiggun cealkit eatnat giitu buohkaide hearvás fylkkaguossástallama vásáhusaid ovddas (…). Munnje lea illun beassat lohkat ahte Vest-Agder lea mu ruovttufylka.

400 syngende barn ga Kronprinsparet en fantastisk velkomst da de ankom Marnardal på sin fylkestur i Vest-Agder 17. - 19. september 2013. Foto: Det kongelige hoff

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas