Barents Spektakel Girkonjárggas

Ruvdnaprinsa čuovui álggos Girkonjárggakonferánssa, gos gieđahallá dakkár fáttáid go Politihkalaš ovdáneapmi Davviguovlluin ja Davviguovllut jagi 2030 guvlui. Ruvdnaprinsa beasai maid fitnat guossin Barentsčállingottis, mii dán jagi ávvuda dan go Barentsovttasbargu lea doaibman juo 20 jagi.

Barents Spektakel

Diibmu 18.00 odne eahket rabai Ruvdnaprinsa Haakon Barents Spektakel festivála, mii 10.geardde juo ásaha saji kultuvrralaš deaivvademiide, davviguovlluid ja riikkaid álbmogiidda. Dán jagaš časkkástatsátni lea Ticking Barents, ja Ruvdnaprinsa deattuhii maid dákkár festivála mearkkaša dán guovllu ovddideapmái:

- Kultuvra lea namalassii ságastallan. Ságastallan hukse ráfi ja dássedis dili, ja dássedis dilli ásaha ovdáneami. Mus lea nana osku kultuvrralaš ásahanfápmui , movt dat nagoda min čohkket, ja ásahit gulahallama ja hukset juoidá mii lea ođas.

Ruvdnaprinsa čuovui rahpanshowa, KIMEK skiipadivodanbáikkis, mii bisttii diimmu. Dan lágideaddjit ledje Pikene på Broen – mii lea norgga/ruošša kulturovttasbargu mii lea duogábealde Barents Spektakel.

Ticking Barents

Ruvdnaprinsa čuovui maid Ticking Barents rahpankonseartta – dat lea dáiddalaš ovttasbargoprošeakta mas leat mielde Reconstructing the Utopia ,Moskvas, Wach Auf musihkárat Oslos ja Arkangelsk Spolokhi joavku ja The XOP/The Choirfra, Murmánskkas eret. Ovttas ledje sii ráhkadan prográmma mii bisttii diimmu Fjellhallenis, gos geavahedje sovjehtalaš 20 ja 30-logu musihka, diktalohkamiid futuristalaš gillii, duiska maŋŋelsoađi musihka ja Norgga bargiidlávlagiid

Border Musical

Gaskaijaáiggi beasai Ruvdnaprinsa čuovvut ja vásihit Border Musical earenoamáš čájeheami. Filbma muitala Ola birra gii lea Finnmárkkus eret ja Tanja, gii lea Guoládagas eret, geat geahččaleaba ásahit ovttaseallima. Sudno náittusdilli govvida veaháš Norgga-Ruošša rádjeguovlluid eallima, eallin mii rasttida kultuvrralaš rájiid ja sosiála norpmaid ja árvvuid.

Filmma lea ráhkadan ruoššabeale dáiddárkollektiiva Chto Delat ovttas eará bargonávccaiguin Norgga ja Ruošša bealde ráji. Dat galgá čájehuvvot olgun muohtakinos gaskavahku rájes gitta lávvordahkii.