Mind the Map!

Vástádusa mearridit čalmmit mat gehččet ja guđe geahččanguovllus geahččá. Kártta sáhttá máŋggaládje geahččat ja gaskkat eai mearkkaš dušše fysalaš sturrodaga, dat lea ge juoga maid dát dáidda-ja kulturfestivála geahččala deattuhit nu bures go sáhttá.

Festiválas leat oasseváldit sihke Barentsguovllu riikkain ja eará riikkain olggobealde dán guovllu. Doaluid guovddážis lea oktavuođaid huksen ja máhttolonohallan. Festivála lea buresliikojuvvon ja dehálaš deaivvadanbáiki dáidda-ja kultureallima olbmuide. Dál dat lágiduvvo gávccát geardde, ja 2010:s fitne dán festivála iešguđet lágidemiin badjel 13.000 olbmo.

Girkonjárgga konferánsa

Dronnet Sonja lei álggos Girkonjárgga konferánssa rahpamis. Konferánsa lea oassi Barents Spektakel ja Barentsbeivviid doaluin, ja dat čalmmustahttá politihka, ekonomiija, industriija ja logistihka davviguovlluin. Konferánssa rabai gielda-ja guovloministtar Liv Signe Navarsete.

Festiválarahpan dollasymfoniijain

Iešalddis Barents Spektakela rabai Dronnet Girkonjárgga gávpebáikkis ikte eahkes. Sártnistis namuhii Dronnet Sonja makkár vejolašvuođat leat nannet Norgga ja Ruošša ovttasbarggu boahtteáiggis:

- 2010 lei mearkajahki dáppe Norggas ja davviguovllu rádjeguovlluide. Barentsábi juohkinlinnjá šiehtadus rahpá Norgii ja Ruoššii vejolašvuođa ásahit viidát ja buoret ovttasbarggu dan hárrái movt dán guovllu ain sáhttá ovddidit boahttevuođas, logai Dronnet.

Duiska Theater Titanick čájehii rahpanshowa "Furnace symphony". Sii govahalle davviguovllu industrialiserema mašiinnaiguin ja revrriiguin mat bosso musihka ja dollanjuokčamiid. Titanick ráhkadii dain musihkkačuojanasaid rytmmaiguin, dollanjuokčamiiguin, mašiinnaiguin ja dollabávkkanasaiguin.

Arctic Score

Rájiidrastá ovttasbargu lei maid fáddán konsearttas mii lágiduvvui das maŋŋelaš. Dronnet čuovui "Arctic Score” Fjellhallas – dat lea musihkkabihttá mas gullo ruošša, norgga ja suoma árbevirolaš musihkka mii deaivvada akrobatihkain ja falástallamiin. Boađus das lei symbolalaš doarrun dien golmma riikka gaskka ja golbma kultuvrra gávnnadedje ge árktalaš soahtešiljus.

Mind the Map!

Diibmu dieđihii juo idjajorraleami go olgoritministtar Jonas Gahr Støre ja rádjekommissær Ivar Sakserud rabaiga festiválačájáhusa Mind the Map! Diet rahpan lei olgun, ja dohko lei maid lágiduvvon norgga dáiddára Morten Traaviks dáiddaduodji Borderlines: Boares norgga ja ruošša rádjestoalpput leat ceggejuvvon Girkonjárgga Vázzingáhttii ja sirrejit gávpoga guovtti oassái. "Ráji” bearráigehččet ja streamejit guokte webkamera.

Rahpanseremoniija jotkkojuvvui Amfi guovddážis Girkonjárggas, doppe čájehedje Dronnet Sonjai Mind the Map! Das lea maid čájáhus gos itáliija dáiddár Stefano Cagol ja ruošša Olga Kisseleva čájeheaba iežaska rádjedáiddadujiid.

Dronnet beasai maid oaidnit čájáhusa ”Surviving the future” maid Sámi Dáiddaguovddáš čájehii ja Davvinorgga Dáiddaguovddáža North East West South prošeavtta.