Hopp til hovedinnhold

Fránskka taffeldiibmu

Dát fránskka taffeldiibmu, dolas gollehuvvon bronssas, lea ráhkaduvvon Pariissa diibmofitnodagas Potonié Léon. Dat lea Loddelanjas, ja doppe dat lea leamaš dan rájes Šloahtta vihahuvvui 1849:s.

Taffeldiibmu gullá diŋggaide mat gohčoduvvojit ”Pariserdávvirat”, dat leat olles ráidu diimmut maid ráhkadedje máilmmigávpogis 1800-logu álgojagiid. Pariserdávvirat ledje dan áiggis árvvusadnojuvvon dávvirat mat ledje sihke nannosat ja čábbát. Diibmu mii lea Loddelanjas lea hui hárve diibmu, min dieđuid mielde lea dušše okta vel dákkár diibmu gávdnamis, ja dat lea Musée des Arts Décoratifsas Pariissas.

Hábmejuvvon dego gohtalaš katedrála

Taffeldiibmu lea ráhkaduvvon dego gohtalaš katedrála. Dat lea bajásguvlui hámát ja olggobealde lea dego portála. Diibmotávval lea dego lieđđeláse. Diimmus lea okta stuora doardna ja ollu smávit doartnat hearvan. Diibmu lea muđui hervejuvvon ođđagohtalaš ornamentihkaid ja hearvvaiguin.

Álggugeahčen 1800-logu válde hui viššalit fas atnui dološ stiilamálliid. Nugo ovdamearkkadihte gohtalaš stiilla, maid oinnii hui ollu Oarje-Eurohpá arkitektuvrras miehtá gaskaáiggi, gaskal 1150 – 1550. Okta dán huksenvuogi dovdomearkkain lei ahte galggai hukset nu alladit go vejolaš ja oažžut nu ollu čuovgga vistái go vejolaš. Seaidnekonstrukšuvdna ja stoalpput galge oidnot viesus. Gotihka ruovttoluottafievrredeapmi ihtigođii maid diibmodáidagii ja dáiddaduodjái muđui.

Fugleværelset stohpodávviriid lágideapmi

Taffeldiibmu ostojuvvui vásetin dan várás ahte galggai biddjot Loddelatnjii gaskal 1846 ja 1848. Evttohusas "Møblering af Kongeboligen i Christiania 30 te mai 1846", juolluduvvo 50 spesidálera dáid biergasiid oastimii: "1 taffeluhr og 2 Kandelabrer paa bordet til dette værelset".

Gonagas Oscar I sáddii hoavvaintendantta Fredric Otto Bæckström Stockholm Šloahtas Christianiai ráhkadit evttohusa movt ođđa Šlohttii galggašii ordnet stohpodávviriid. Juolluduvvo oktiibuot 60.000 spesidálera stohpodávviriid ja eará biergasiid oastimii. Bæckström finai earet eará Pariissas, gos gávnnai kandelaberiid ja taffeldiimmu Loddelatnjii. Dienna gávppašemiin son gal lihkostuvai bures, go diet dávvirat leat ain dan sajis gosa daid bidje gaskkamuttos 1800-logu.

04.06.2012

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas
Guoskevaš leaŋkkat