Hopp til hovedinnhold

Gonagas Carl Johan portreahtta

Dát Gonagas Carl Johan III portreahtta heaŋgá dál Bernadottesaloŋgas Gonagaslaš šloahtas, ja dan lea Caroline Cathinca Engelhardt málen.

Engelhardt (1845-1926)  riegádii Københámmanis ja čađahii dáiddaoahpus Düsseldorffas ja Pariissas. Son orrugođii Londonis álgogeahčen 1880-logu, go lei vuos orron máŋgga gávpogis feara gos Eurohpas; 1875:s lei son earet eará Christianias ja Stockholmas. Su dáiddaduojit leat eanas šáŋramáleriijat ja portreahtat.

Dán min oktavuođas lea várra govviduvvon olmmoš eanet miellagiddevaš go dáiddár ieš;

Portreahta duogáš

Engelhardt portreahta lei Gonagas Oscar II diŋgon 1875:s, dan oktavuođas go Carl Johan-bázzi galggai almmustahttojuvvot Šloahta olggobealde. Máleriiija lea okta oassi Gonagas Oscar II ”dynastisk prográmmas”. Son hálidii čohkket buot Bernadotte – soga lahtuid govaid Christiania šlohttii, lobálažžan dahkan dihtii iežas posišuvnna uniuvdnagonagassan. Portreahtas oaidnit Gonagas Carl Johan olles hámi, sus lea badjelis marskálkauniforbma mas leat ruoŧa árvomearkkat (Sverdordenen, Serafimerordenen ja Carl XIII orden).

Čuožžunláhki máleriijas lea juste seammalágan go dat maid oaidnit portreahtain maid Francois Gérard (1770-1837) lea málen, maŋŋil go Carl Johan lei válljejuvvon ruoŧa truvnno árbejeaddjin 1810:s. Son divttii iežas málejuvvot ruoŧa ámmátuniforpmain dan áiggis go son ain lei Frankriikkas, ja sáddii portreahta adoptiivaáhččásis, Gonagas Carl XIII. Gérard portreahtta galgá leat dat máleriija masa Gonagas lea eanemus liikon iežas portreahtain. Go bálddastahttá eará portreahtaiguin ja karikatuvrraiguin, de lea sihke Gérard sárggastus mas lea olles olmmoš mielde, (mii dál lea Universitehta girjerádjosa govvavuorkkás Oslos) ja iešalddis portreahtta maid oalle rámidahtti.

Sir Hudson Lowe, St. Helena guvernøra Napoleon fáŋgavuođa áiggi, lei deaivvadan Jean Baptiste Bernadohtain Madame de Staël saloŋgas Pariissas. De son galgá leat dadjan ahte dan olbmos, mii maŋŋil šattai uniuvdnagonagassan, lea eahpedábálaš stuora goaskinnjunni. Muhto njunis maid Gérard lea málen ja maiddái njunis mii lea Engelhard posthume versuvnnas, lea oalle dábálaš sturrodat. Muđui boahtá Gonagas Carl Johana šođbes hápmi hui bures ovdan go son dies čuččoda rabas láse vuostá.

Gonagas Carl Johan

1810:s lei ráđđejeaddji ruoŧa dynastiija nohkagoahtán. Gonagas Gustav IV Adolf biddjojuvvui eret stáhtaválddi gomihemiin 1809:s, go Ruoŧŧa lei vuoittahallan soađis Ruoššain ja massán Suoma. Su maŋisboahtti lei su boares mánáhis eahki, Gonagas Carl XIII. Danin válljejedje Riikkabeivviin fránskalaš áššeovddideaddji bártni ja revolušuvdnagenerála Jean Baptiste Bernadotte Gonagas Carl XIII maŋisboahttin. Dat dáhpáhuvai Örebroas borgemánu 21.beaivvi 1810. Son válddii nama Charles Jean mii ruoŧagillii šattai Carl Johan.

Loga eambbo Gonagas Carl Johan birra, dan áiggi birra go Norga lei uniuvnnas Ruoŧain ja Gonagaslaš šloahta huksema birra čuovudettiin čujuheddjiid das olgešbealde.


Materiálat

Oljomála liinnis

Mihtut
235 x 133 cm

Inventarnummar
DKS.001703

 

04.06.2012

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas