Koronadilálašvuohta

Buorit olbmot,

Mii leat dál dakkár dilis mii lea sihke jáhkitmeahttun, amas ja balddihahtti midjiide buohkaide. Eat mii dovdda šat iežamet árgabeaivvi eat ge máilmmi mii lea min birra. Ja dá lea easka álgu dakkár dilálašvuođas man bohtosiid mii eat oalát dieđe.

Diehtemeahttunvuohta dahká min raššin.
Duohtavuohta dahká ahte mii álgit ballestallat.
Dát ođđa beaivválaš dilli sáhttá návccahuhttit min.

Norgii lea čuohcan seamma roassu go muđui olles máilbmái.

Dál lea min deháleamos bargu geahččalit goahcat dán dramáhtalaš ovdáneami – dakko bokte ahte čuovvut dan maid eiseválddit gohččut min dahkat.

Mii galgat leat giitevaččat go mis leat politihkalaš jođiheaddjit ja fágaeiseválddit geain lea roahkkatvuohta ja máhttu hálddašit dán dili rehálašvuođain ja realismmain.

Norgga dovdomearka lea ahte min servodagain lea luohttevašvuohta. Dál lea earenoamáš dárbu čájehit luohttámuša guhtet guoibmáseamet. Sihke dan dáfus ahte juohke okta dovdá ovddasvástádusa hehttet virusa njoammuma. Ja luohttámuša dasa ahte riikka eiseválddit dahket buriid ja jierpmálaš mearrádusaid.

Mu jurdagat ja rohkosat leat din buohkaid luhtte dál.

Jurdagat leat din luhtte geat buohcabehtet ja din lagamuččaid luhtte.

Ja dearvvašvuođa bargiid luhtte miehtá riikka geat bargabehtet ija beaivvi. Ja din luhtte geat vásihehpet heajut ekonomalaš dili ja ballabehtet boahttevuođas. Ja buohkaid din luhtte guđet  áimmahuššabehtet dehálaš doaimmaid servodagas vai min riika sáhttá doaibmat.

Buot mánáid luhtte – geat soaitibehtet ballestallat juste dál – ja geaid mii fertet earenoamáš bures bearráigeahččat dál.

Ja din luhtte geat dovdabehtet oktovuođa dál, danin go min smávit ja stuorát ovttastallan lágideamit leat giddejuvvon.

Loahpas hálidan muittuhit ahte mii buohkat dárbbašit veaháš eanet ustitvuođa dán áiggis. Mii leat ovttas dán dilis. Ja ovttas galgat mii nagodit birget dan áiggis mii lea min ovddabealde.