2009 jahkedieđáhus

Gonagasbearrašis ledje 452 almmolaš ovddasteami ruovttueatnamis ja olgoeatnamiin 2009:s. Oktiibuot olles jagis sii fitne almmolaš guossástallamis 55 suohkanis 17 fylkkas. Gonagasbárra finai geassemánus Hordalánddas fylkkamátkkis, ja Ruvdnaprinsabára fylkamátki borgemánus/čakčamánus lei Rogalánddas.

Eanet almmolaš prográmma birra

2009:s ledje Gonagasas 123 audieanssa, ja ledje 29 Allaáiggalaš audieanssa gos ođđa ambassadevrrat leat buktán iežaset fápmudusaid. Dasa lassin lea Gonagasbearaš oassálastán ollu siskkáldas bargočoahkkimiin gos áššin leamaš organisašuvnna jođiheapmi ja almmolaš ovddastemiide ráhkkaneapmi.

Dronnet lea leamaš mielde bargguin mat gusket gonagaslaš opmodagaid bearráigeahččamii ja ovddideapmái. Son lea maid gidden earenoamáš beroštumi dáidagii ja kultursuorgái ja lea guovddážis hoava kulturbargguin.

Ruvdnaprinsa geavaha ollu áiggi Young Global Leaders, Global Redesign Initiative ja Global Dignity bargguide. Ruvdnaprinseassa lea čađahan masterkurssa ”Ledelse, makt og mening” BI :s. Dan son lea doaimmahan lassin iežas almmolaš prográmmii. Ruvdnaprinssas ja Ruvdnaprinseassas leat maid doaimmat UNDP ja UNAIDS organisašuvnnain. Ruvdnaprinseassa lágidii ja jođihii internašunála nuoraidkonferánssa HIV/AIDS birra Oslos geassemánus.

Divodanbarggut

Jahkásaččat almmuhuvvo raporta dan birra movt Gonagaslaš hoavva (Civillista) ja Ruvdnaprinsabára bargoveahka (almmolaš bušeahtas) geavahit Stuoradikki juolludemiid. Stuora oassi juolluduvvon ruđain leat golahuvvon Šloahta, Bygdø Gonagasgárdima váldoviesu ja Oscarshálla divodanbargguide, dasa gullá maid daid báikkiid kultuvrralaš ja historjjálaš árvvuid áimmaguššan. Oscarshálla divodanbarggut loahpahuvvo 2009:s, ja borgemánus beasaiga Gonagas ja Dronnet fas rahpat dien hervvoštallanšloahta gussiide.

Ii almmuhuvvo raporta dan birra movt Gonagasbára ja Ruvdnaprinsabára Apanasje geavahuvvo. Apanasje galgá gokčat priváhta opmodagaid hálddašeami, jođiheami, bearráigeahččama ja ovddideami, dasa gullet maid Mågerø, Sikkilsdalen ja Kongsseteren báikkit, ja dasa lassin vel persovnnalaš golut. Buhtadussan dasa go stáhta ii doala orrunbáikki Ruvdnaprinsabearrašii, de lea apanasjejuolludemiide lasihuvvon doarjja mii galgá gokčat Skaugum váldovistti hálddašeami, jođiheami, bearráigeahččama ja ovddideami. Apanasjejuolludeapmi Ruvdnaprinsabárrii lea oktiibuot 6 536 000 ruvnno. Das geavahuvvo sullii 4 900 000 ruvdno ovdalis namuhuvvon ulbmiliidda.

Gonagaslaš hoavva oaččui 2009:s doaibmadoarjagiid Stuoradikkis mat galge geavahuvvot Skaugum váldovistti olggobeale ođasmahttin-ja divodanbargguide. Dat barggut álggahuvvo maŋŋel beassážiid 2009 ja ledje buoremuddui juo geargan bargguiguin juovlamánnui.

Jahkerehketdoallu

Gonagaslaš civillistta rehketdoallu lea dohkkehuvvon ja das lea 1 373 844 ruvnno vuolláibáza, maid galget gokčat ruđain maid ovddit jagiid leat vurken sierra.

Ruvdnaprinsabára bargoveaga jahkerehketdoallu čájeha 837 920 ruvnno vuolláibáhcaga, maid galget gokčat ruđain maid ovddit jagiid leat vurken sierra.

Rabas Šloahta jahkerehketdoalus lea 206 313 ruvnno vuolláibáza, dan galgá iežaskapitálain gokčat.

Ovdalaš jahkedieđáhusat

Ovddit jagiid jahkerehketdoaluid gávdna PDF-hámis go čuovvu čujuheaddji dás olgešbealde.