– Buorre leat davvi-Norggas fas

Njeallji beaivvis galleda Gonagasbárra guhtta suohkana Nordlánddas gos ovdal eaba leat leamaš álmmolaš galledeamis  – Hemnes, Árborde, Leirfjord, Vevelstad, Sømna ja Bindal.

Hemnes suohkan lei vuosttaš bisánanbáiki fylkkamátkkis.

 Aiden Patrik Haugli (9) ja Andrea Sørli (10) geigiiga liđiid Gonagas Haraldii ja Dronnet Sonjai go olliiga Hemnes suohkanii. Govven: Liv Anette Luane, Gonagaslaš hoavva

Biebmokultuvra ja fanashuksenárbevierru 

Diibmu 10.00 lávkii Gonagasbárra nannámii Hemnesberget káijas ja váccašeigga das Sjøgatai go lei ceggejuvvon lávdi.

Gárttaiga dattege orustit guktii. Steinar Jørgensen muitalii fanashuksenvieruid birra Hemnes guovllus. Jørgensen lea máŋggaid jagiid juo áŋgiruššan Hemnesberget guovllu  fanashuksenárbevieruid oažžut ovdan. 1970-logu rádjái lei suohkan njunnožis fanashuksemis. Gonagas maiddái guoskkahii fanashuksenárbevieruid su sártnis.

– Lea dehálaš váldit vára dološ giehtaduodjeárbevieruid – beare jeara Dronnegis! Ii leat bálljo vejolaš oba bissehit ge su jus son álgá dáid birra hupmat, dajai Gonagas ja bovttii sihke mojiid ja reaškkasa.

Sártnit

Hemnesas gulai Gonagasbárra guovllu fanashuksenárbevieru birra. Govven: Annika Byrde / NTB

Go nuppes bisáneigga, de beasaiga gullat kamkake-kultuvrra birra. Heidi Fagerbakk ja Olav Mastervik gullaba Bleikvassli gilisearvái ja sidjiide lea dehálaš doalahit dieđuid báikkálaš, árbevirolaš borramuša birra.  Ja “kamkake” lea erenoamáš láibbastat man eai láibbo eará sajiin go Hemnesa báikkiin Korgen, Bleikvassli ja Leirskardalen. Kamkakekultuvra lea dološ vierru. Diktačálli ja báhppa Petter Dass (1647-1707) čálii "Kam-Kager"  birra dovddus divttas Nordlands Trompet.

Heidi Fagerbakk ja Olav Mastervik muitaleigga oanehaččat “kamkake”-kultuvrra birra Gonagasbárrii. Govven: Liv Anette Luane, Gonagaslaš hoavva.

Sámi árbi ja Hemnesjazz

Lávddis čájehuvvui čájálmas mas bođii ovdan Hemnes suohkana historjá ja kultuvra. Hemnes ja Helgelánda lea lullisámi-ja ubmisámiguovlu, ja lávddi prográmma vuosttaš oassi lei dánsun. Ja dát dánsun lei oassi  Klemetspelet-bihtás – mii lea historjjálaš neaktinbihttá  lullisámi dievddu Klemet Persona birra. Ovddit jahkečuohtemolsuma áiggis orui son bearrašiinnis duolba geađggi suoji vuolde Leirskardalena bajimusas.

Gonagasbárra vásihii «Klemetspelet»-dánsuma. Govveno: Annika Byrde / NTB

–Dáppe leat gusto vaikko man olu musihkkalaš taleanttat ja kreatiiva fámut, dajai Gonagas Harald gii ovttas Dronnet Sonjain vásihii čáppa lávluma Onsdagskoret pensionisttain, ovddeš Idol-oasseváldis Astelle (Anna Anita Jaskiv), Bitchy Big Boobies-dálueamit lávlunjoavkkus, skuvlaoahppis Lisbeth Buskli ja jazzlávlus Sigrid Brennhaug.

Jazz lea guovddážis Hemnesas, ja juohke jagi, borgemánu álggus, lágiduvvo Hemnesjazz Hemnesberget mearragáttis.

Maja Standahl (17) Polarsirkelen joatkkaskuvllas ja Adrian Vassdal (15) Korgen guovddáskuvllas leigga láidesteaddjit Hemnesas. Govven: Liv Anette Luane, Gonagaslaš hoavva

Astelle lávllui ukrainalaš gillii Gonagassii ja Dronnegii. Astelle lea Hemnesas eret, muhto sus leat máttut Ukrainas. Govven: Liv Anette Luane, Gonagaslaš hoavva.

Sátnejođiheaddji Paul Asphaug doalai sártni, doppe ledje maiddái dearvvuođat ukrainalaš álbmogis Hemnesas, sii gulle historjjáid nuppi máilmmesoađis ja Lapphella jahkeduhátbáikkis. Maŋŋel čájálmasa deaivvadeigga Gonagas ja Dronnet njealjásiin geat leat ožžon Gonagas ánssumedáljja, ja dasto vel Birgit Sandmo gii lei lieđđenieiddaš dalle go Gonagas Olav ja Prinseassa Astrid finaiga Hemnesas gonagasmátkkis Davvi Norggas 1959.

Hemnesas leat sullii 4400 ássi ja lea dat suohkan gos leat eanemus olbmot daid suohkaniid searvvis gos Gonagasbárra fitná dán fylkkamátkkis. Hemnesas leat vihtta čoahkkebáikki: Hemnesberget, Finneidfjord, Bjerka, Bleikvasslia ja Korgen. Dáppe lea maiddá Davvi-Norgga alimus várri – Oksskolten mii lea  1916 mehtera.

Gonagasbárra seavvá go guođđiba Hemnesa sjaluppain. Fylkkamátki joatká Árborde suohkanii. Govven: Liv Anette Luane, Gonagaslaš hoavva.