Kongen delte ut Nasjonalforeningens forskingsprisar

Prisvinnarane vart heidra for det banebrytande arbeidet sitt og sine gode resultat under ein prisseremoni i Det Norske Teatret i Oslo i går.

Kong Harald saman med vinnarane av Nasjonalforeningens forskingsprisar, Evandro Fei Fang og Dan Atar. Foto: Lise Åserud / NTB

Hjarteforskingsprisen

Professor Dan Atar ved Oslo universitetssjukehus fekk Hjarteforskingsprisen for banebrytande forskingsresultat gjennom 30 år innan kardiologi. Han er ein av dei mest framståande forskarane på dette feltet i verda, skriv Nasjonalforeningen for folkehelsen i ei pressemelding.

– Han jobbar både for å forhindre at hjarteinfarkt skjer, for å avgrense skaden ved eit infarkt, og for at pasienten skal ha eit godt liv i etterkant, seier generalsekretær Mina Gerhardsen.

Demensforskingsprisen

Førsteamanuensis Evandro Fei Fang, ved Akershus universitetssjukehus og Universitetet i Oslo, får Demensforskingsprisen for banebrytande forskingsresultat og innsatsen sin for gode fagsamarbeid både nasjonalt og internasjonalt.

– ­Fang får prisen blant anna for forskinga si for å fjerne skadde mitokondrium i hjernen. Dette sporet blir av fleire omtalt som banebrytande i jakta på effektive medisinar mot Alzheimers sjukdom, seier generalsekretær Mina Gerhardsen.

Det var nær 300 til stades under arrangementet, deriblant helseminister Ingvild Kjerkol og ordførar Marianne Borgen i Oslo.

Kongen er beskyttar for Nasjonalforeningen for folkehelsen.

Forskingssjef Anne Rita Øksengard presenterer Nasjonalforeningens nye forskingsstipendiatar. Foto: Liv Anette Luane, Det kongelege hoffet