Máilmmiárbi Bykles
Ruvndaprinsabárra beasai gaskavateahkeda vásihit Setesdala musihkkaárbbi magihkkalaš konsearttas Bykle boares girkus. Erenoamáš luonddučábbodat lei maiddái Ruvdnaprinsa prográmmas.
Dán geasi deavdiba Gonagaslaš Allavuođat Ruvdnaprinsa ja Ruvdnaprinseassa 50 jagi. Dán čalmmustahttiba viđa mátkki bokte iešguđet osiide riikkas ja juohke mátkkis lea iežas fáddá. Dát lea nubbi mátki, ja ikte galledeigga Vinja suohkana Telemárkkus. Odne ges galledeigga Bykle suohkana Agderis.
Magihkkalaš eahket Bykle boares girkus
Bykle boares girku lea 1620 rájes čužžon, ja ruohttasat leat vel boarraseappot. Vuosttaš girku dán sajis ceggejuvvui árvideames juo 1200-logus. Girku lea boarraseamos Setesdalas ja lea okta dain unnimus girkuin Norggas, dušše 11 mehtera guhku. Jagis 1826 hervejuvvo seainnit girku siste árbevirolaš rosemálemiin, ja rohpi lea dego albmi oktan nástiiguin ja balvvaiguin. Dán erenoamáš girkus vásiheigga Ruvdnaprinsa ja Ruvdnaprinseassa konseartta Setesdala musihkain. Jagis 2019 biddjui dát musihkalaš árbevierru UNESCO máilmmi eahpeávnnaslaš kulturárbbi listui.
Ruvdnaprinsabárra vásihii Setesdala musihkkalaš árbbi Bykle boares girkus, dá Annbjørg Lien ja Daniel Sanden Warg.Govven: Lise Åserud, NTB
Steven, dánsun ja čuojaheapmi lea árbi mii lea mannan buolvvas bulvii 1700-logu rájes Setesdalas. Hardinfidjol ja njálbmehárpe leat dehálaš čuojanasat, ja steven lea ges guovddáš lávlunvuohki erenoamáš jietnageavahemiin ja ritmmain.
Ládjorumbbut bohte Ruvdnaprinsa Haakona ja Ruvdnaprinseassa Mette-Marita ovddal go olliiga girkui, ja girkobiellut čudje viidát go čuovusjoavku čohkkedii. De bohte ges artisttat seammás go «Brureslaget» šuokŋa gullui. Ruvdnaprinsabárra gulai máŋga steva ja šuoŋa, ovdal go lávlut, čuojaheaddjit ja guossit guđđe girku.
Bykle boares girkus. Govven: Lise Åserud, NTB
Randonee ohppiiguin Hovdenis
Ovdal go loahpahedje beaivvi Bykles, de galledii Ruvdnaprinsa Haakon Hovden čuoigangymnása. Dát lea oassin Setesdal joatkkaskuvllas ja lea okta viđa čuoiganjoatkkaskuvllain Norggas. Dáppe lea dábálaš skuvlavázzin ja alladási valaštallan heivehuvvon oktii. Oahppit sáhttet válljet gaskal snowboard, freeski, čuoigama dahje olgunastinsuorggi Flyt, ja buot suorggit čuvvot studerenráhkkanahttinprográmma nu ahte oahppit sáhttet joatkit universitehtai ja allaskuvlii jus háliidit. Ruvdnaprinsa Haakon beasai gullat fálaldaga birra ja dasto mot skuvlaeallin lea doppe. Dan maŋŋel manne Hovden gilivissui gos oahppit guoimmuhedje trampolinenjuikumiin ja čájehedje gizzunseainni.
Ruvdnaprinsa Haakon olggobeal Hovden giliviesu. Govven: Lise Åserud, NTB
Ovttas gávcci ohppiin ja oahpaheddjiin, jođii Ruvdnaprinsa Nos nammasaš várregeahčai stuolloheaissain. Doppe besse dollagáttis humadit ja sii čohkkohalle heaissa boares stuoluin.
Dát oassi lea sullii 1200 mehtera allosis ja lea buorre vuolggasadji fiinna meahccetuvrraide sihke geasset ja dálvet. Dát illudii Ruvdnaprinsa gii ovttas Hovden-ohppiiguin beasai randonee-čierastallamiin dollet vári mielde vulos.
Nos váris. Govven: Simen Løvberg Sund, Gonagaslaš hoavva.
Juogat dán artihkkala Twitteris ja Facebookas:
Juogat dán artihkkala Twitteris Juogat dán artihkkala FacebookasÁigeguovdilis áššit

Miessemánu 17. beaivvi ávvudeapmi
Gonagasbearaš lea badjel 100 jagi juo vuostáiváldán mánáidtogaid Šloahttabalkoŋggas Oslos. Dán árbevieru álggahii Gonagas Haakon 1906:s. Dál lea mánáidtoga ja miessemánu 17. beaivi measta seamma ášši, muhto nu ii leat álo leamaš.

Gonagaslaš hoavva ovdanbuktá 2024 jahkeraportta
2024:s gallededje Gonagasviesu áirasat oktiibuot 42 suohkana ja fylkkamátkkit Agderii, Rogalándii ja Trøndelágii ledje stuorámus mátkkit. Gonagasviessu čađahii maiddái máŋgga olgoriikkamátkki Eurohpas, Amerihkás ja Gaska-Nuorttas. Oktiibuot ledje 743 virggálaš doaimma. Gonagasbárra lágidii maiddái njeallje stáhtaguossástallama ovtta jagis – juoga mii lea historjjálaš.