Ávvudii Sámi álbmotbeaivvi

500 guossi ledje bovdejuvvon Sámi álbmotbeaivve ávvudeapmái Ráđđeviesuhállas. Dat ávvudeapmi lea šaddan juo vierrun Oslos, ja lágiduvvui vuohččan jagis 2003.

Árabut dán ovdalgaskabeaivve lei sámi leavga gessojuvvon leavgastákku bajimussii ráđđeviesu šiljus. Levgenseremoniija oktavuođas čuojahuvvui Sámi soga lávlla ráđđeviesu bielluiguin.

Sii geat sávve buresboahtima Gonagassii, ledje Oslo sátnejođiheaddji Marianne Borgen, Ann Finnbog gii ovddasta sámi álbmotbeaivve lávdegotti ja dasto vel sámediggeáirras ja Oslo Sámi viesu beaivválaš jođiheaddji Aili Guttorm.

Ovttas 500 bovdejuvvon gussiiguin oasálastii Gonagas sámi álbmotbeaivve ávvudeamis Oslo ráđđeviesus. Govven: Sara Svanemyr, Gonagaslaš hoavva.

Sártnit ja musihkka

Oslo ráđđeviesu lávddis láidesteigga Tatjana Kolpus ja Aina Madelen Aslaksen prográmma. Mánát Oslo sámi mánáidgárddis ja Oslo sámi skuvlla oahppit guoimmuhedje sámi lávlagiin. Doaluid váldosártni doalai Dr. Liisà-Ràvna Finbog, gii lea arkeologa ja museologa. Artista Ulla Pirttijàrvi guoimmuhii dáiddalaččat doaluin ráđđeviesus. Gielda- ja guovloministtar Sigbjørn Gjelsvik ja ovddidanministtar Anne Beathe Tvinnereim leigga maiddái searvan ávvudeapmái ja doalaiga sártni Oslo ráđđeviesus.

Mánát Oslo sámi mánáidgárddis guoimmuhedje lávlumiin. Govven: Stian Lysberg Solum / NTB

20 jagi ávvudan sámi álbmotbeaivvi Oslo ráđđeviesus

Vuosttaš geardde go sámi álbmotbeaivi ávvuduvvui Oslo ráđđeviesus, lei. guovvamánu 6. beaivve jagis 2003. Lei sámi birras gii dalle vuolggahii jurdaga ávvudit sierra doaluiguin. Vuosttaš háve go beaivvi čalmmustahtte doppe, de gesse guokte sámi leavgga leavgastákkuide ráđđeviesu šiljus, doppe lei juoigan ja sámisoga lávlla čuojahuvvui bielluiguin. Dasto ožžo 100 bovdejuvvon guossi iđitborramuša Feastagalleriijas.

2003 rájes leat doalut viidánan, sihke sturrodaga ja mearkkašumi dáfus. Dán jagi sáhttef as čađahit doaluid seamma ládje go ovdal pandemiija, ja nu besse 500 bovdejuvvon guossi herskostallat ja vásihit sihke dáiddalaš guoimmuheami ja sártniid Ráđđehushállas.

Lea guoktelogát geardde go sámi álbmotbeaivi ávvuduvvo Oslo ráđđeviesus. Govven: Stian Lysberg Solum / NTB