Dronnet deaivvadii ukrainalaš báhtareddjiiguin

Zakhar (9) ja Solomiia (7) leigga ožžon doaibman geiget fástoláskkášrissiid Dronnegii, ja leigga čiŋadan ukrainalaš mállet hervejuvvon báiddiiguin. Soai leaba álgán skuvlii Norggas, ja hirpmáhuhttiiga Dronnega go máhtiiga suinna dárustit.

Oslo sátnejođiheaddji Marianne Borgen, Norske Kvinners Sanitetsforening váldočálli Malin Stensønes ja Oslo Sanitetsforening beaivválaš jođiheaddji Goke Bressers sávve buresboahtima Dronnet Sonjai.

Beaivelanjas guossohit borsj-máli. Govven: Håkon Mosvold Larsen / NTB

Ukrainalaš lávlun, borramuš ja doaimmat

Dronnet lei guossis beannot diimmu, ja galledeamis beasai Dronnet oasálastit muhtun doaimmain mat lágiduvvojit dáin vahkosaš, rabas deaivvademiin. Dán vuoro ráhkadedje ukrainalaš, árbevirolaš ruksesruohtasmáli – borsj- man Dronnet beasai máistit. Ja dasto beasai son gullat ukrainalaš lávluma.

Dan botta go Dronnet lei guossis, de lávlo ukrainalaš lávlagiid. Govven: Per-Åge Iversen, Norske Kvinners Sanitetsforening

Njeallje nissonolbmo juogadedje sin historjjáid Dronnet Sonjain. Sii muitaledje sin duogáža birra, mot ruovttudilálašvuohta vuorjá sin ja makkár sin ođđa eallin lea Norggas.

Oslo Sanitetsforeninga gávdná boares, čáppa, stuora dálus Smestadas, ja dohko čoahkkanit sii vahkkosačcat deaivvadit earáguin seamma dilis, gulahallat iežaset gillii ja juogadit vásáhusaid. Oslo Sanitetsforening fállá sidjiide gelbbolašvuođa Norgga servodaga birra, doppe ožžot dárogiel giellahárjehallama ja veahki hukset fierpmádaga Norggas.

Gievkkanis málestit ja ráhkadit árbevirolaš, ukrainalaš ruksesruohtasmáli, borsj. Iryna, Svetlana ja Larisa muitalit Dronnegii ukrainalaš borramuša ja biebmoárbevieruid birra. Govven: Liv Anette Luane, Gonagaslaš hoavva

Miehtá riikka

Rabas deaivvadeapmi ukrainalaš báhtareddjiide Oslos, lea lágiduvvon diimmá miessemánu 16. beaivve rájes. Vahkkosaččat čoagganit gaskal 15-30 olbmo de.

Dan rájes go soahti buollái sullii jagi áigi, lea Norske Kvinners Sanitetsforening leamaš daid eaktodáhtolaš organisašuvnnaid searvvis geat leat veahkkin váldit vuostá báhtareddjiid dán riikkas mii nu gillá soađi geažil. Ja sii leat doaimmaid bokte mielde váikkuheame integreremii ja searvadahttiimii.