Dronnet rabai ođđa Nationálamusea

Rahpanseremoniija lei Museašiljus ovddabeale museavistti, ja Majestehta Gonagas ja Gonagaslaš Allavuođat Ruvdnaprinsa Haakon og Ruvdnaprinseassa Mette-Marit maiddái ledje mielde Davviriikkaid stuorámus dáiddamusea rahpandoaluin.

Dronnet doalai sártni Nationálamusea rahpamis. Govven: Sven Gj. Gjeruldsen, Gonagaslaš hoavva.

Ovttas museadirektevrrain Karin Hindsbo čuohpastii Dronnet bátti ja julggaštii Nationálamusea rahppon.

Dronnet čuohpai bátti rastá ja almmuhii Nationálamusea rahppon. Govven: Sara Svanemyr, Gonagaslaš hoavva.

Ođđa Nationálamuseai leat čohkken dološ ja ođđaáigásaš dáidaga, arkitektuvrra, designa, giehtaduoji ja dálááiggedáidaga seamma dahki vuollái. Klaus Schuwerk Kleihues + Schuwerk arkiteaktakántuvrras lea hábmen vistti ja Statsbygg lea leamaš hukseheaddji.  Visti lea guovddážis ja oidno álkit gávpogis. Čoakkáldat galgá addit ollislaš perspektiiva min nationála dáidda- ja kulturhistorjái.  

Stáhtaministtar Jonas Gahr Støre doalai maiddái sártni rahpanseremoniijas.
Iman Meskini lei láidesteaddji.  Marja Mortensson ja Beharie, ovttas streaŋgačuojanasčuojaheaddjiiguin, guoimmuhedje musihkkalaččat.

Sihke Gonagasbárra ja Ruvdnaprinsabárra oasálaste rahpanseremoniijas Museašiljus ođđa Nationálamusea olggobealde Oslos. Govven: Sven Gj. Gjeruldsen, Gonagaslaš hoavva.

Norgga ođđa nationálamusea

Geassemánu 11. beaivve rabai Nationálamusea uvssaid muđui álbmogii. Dáinna ođđa Nationálamuseain oažžu olles Norgga dáidda-, arktitektuvrra- ja designačoakkáldat oktasaš ruovttu. Sullii 6500 dáidaga/barggu beassá oaidnit čoakkáldatovdanbuktimis 86 lanjas guovtti gearddis. Dás oaidná dáidaga don doložis otnážii. Musea bajimusas lea Čuovgahálla marmorlásiiguin ja dán sáhttá eahketseavdnjadasas čuovggahit siskil.

Stuora lanjat ja hirbmat mihtilmas dáidagatŧ leat ollen Nationálamusai. Govven: Geir Olsen / NTB.

Rahpančájáhus Jeg kaller det kunst / Mun gohčodan dan dáidagin, čájeha 150 dáidaga dálááiggedáiddáriin geain lea doaibma Norggas, ja dát leat dáiddárat geat ovdal dán čájáhusa eai lean ovdalaččas ostojuvvon musea čoahkkáldagaide.

Ođđa Nationálamusa lea Nationálamusea joatkka, mii ásahuvvui Norgga vuosttaš álmmolaš dáiddamusean Stuorradikki bokte jagis 1837. Dát musea ovttas Dáiddaindustriijamuseain, Arkitektamuseain ja Dáláiggeádáidaga museain gárte oktasaš musean jagis 2003,  Nasjonalmuseet for kunst, arkitektur og design.

Bijai vuođđogeađggi jagis 2016

Dronnet ja Ruvdnaprinseassa oasálastiiga goappašagat ođđa Nationálamusea vuođđogeađgeseremoniijas jagis 2016. Ja ovttas bijaiga soai vuođđogeađgedoasa–  mii sistisdoallá ivdnejuvvon deaddileami Norgga riikkamearkkas, vistti sárgumiid, huksendokumeanttaid, poastamearkkaid, vuođđogeađgebidjama doaluid bovdehusa ja guosselisttu.

Dronnet Sonja ja Ruvdnaprinseassa Mette-Marit bijaiga vuođđogeađgedoasa lávkii ja dat biddjui vuođđogeađgii buohta musea huksenšiljui jagis 2016. Govven: Heiko Junge / NTB scanpix.

Dronnet ja Ruvdnaprinsabárra ledje almmolaš rahpanmállásiin bovdejuvvon gussiide. Ovdal mállásiid oahpistedje gussiid muhtun čájáhuslanjain ođđa Nationálamuseas.