Galledii stáhtaválddiid

Galledemiid fáddán lei fápmojuohku golmma sorjjasmeahttun orgána gaskkas main leat iešguđetge doaimmat: láhkaaddi, mearrideaddji ja dubmejeaddji fápmu. 

Ruvdnaprinsa Haakon maiddái galledii stáhtaválddiid su válddálašvuođabeaivvi oktavuođas jagis 1991.

Stuorradiggi

Stuorradiggepresideanta Masud Gharahkhani sávai bures boahtima Prinseassai go bođii nationálačoahkkimii ovdalgaskabeaivve. Galledeami oktavuođas čilgii stuorradiggepresideanta Stuoradikki barggu birra ja son muitalii vistti historjjá birra.

Stuorradiggepresideanta Masud Gharahkhani čájeha stuoradiggesála Prinseassa Ingrid Alexandrai. Govven: Simen Løvberg Sund, Gonagaslaš hoavva.

Stuorradiggepresideantta kántuvrras dearvvahii Prinseassa vuosttaš várrepresideantta, Svein Harberg ja maiddái nationálčoahkkima nuoramus áirasa,  Maren Grøthe. Svein Harberg muitalii iešguđetge lávdegottiid bargguid birra ja Grøthe muitalii mot lea doaibmat stuorradiggeáirasin.

Alimusriekti

Maŋŋel galledeami Stuorradikkis válddiiga alimusriektejustitiarius Toril Marie Øie ja direktevra Bente Johanne Kraugerud vuostá Prinseassa Ingrid Alexandra. Prinseassa deavvahii njeallje alimusriekteduopmára ovdal go oahpistedje su Alimusrievtti Viesus. Prinseassa finadii guovtti riektelanjas seammás go Øie čilgii mot Norgga riektevuogádat lea huksejuvvon.

Alimusriektejustitiarius Toril Maie Øie čilge duopmostuoluid doaimmaid birra Prinseassai. Govven: Liv Anette Luane, Gonagaslaš hoavva.

Prinseassa oaččui maiddái vejolašvuođa geahččalit Gonagasstuolu nugo maiddái su áhčči – Ruvndaprinsa Haakon – dagai go son galledii Almiusrievtti su válddálašvuođabeaivvi  oktavuođas jagis 1991.

Prinseassa geahččala Gonagasstuolu justitiariusa kántuvrras. Govven: Javad Parsa / NTB

Ráđđehus

Maŋŋelgaskabeaivve sávaiga stáhtaministtar Jonas Gahr Støre ja ráđđehusráđđi Anne Nafstad Lyftingsmo Prinseassai bures boahtima Stáhtaministara kántuvrii. Stáhtaministara kántuvrras lei sunnos ságastallan – seamma ládje go Ruvdnaprinsa Haakonis lei go son galledii dalá stáhtaministara Gro Harlem Brundtland.

Stáhtaministara kántuvrras beasai Prinseassa gullat eanet ráđđehusa ja departemeanttaid barggu birra. Govven: Simen Løvberg Sund, Gonagaslaš hoavva.

Maŋŋel ságastallama Støriin, manaiga ges eará čoahkkinlatnjii gos Prinseassa Ingrid Alexandra deaivvadii stáhtaráđiin Emilie Enger Mehliin ja Stáhtaministara Kántuvrra bargiiguin. Stáhtaministtar čilgii Stáhtaministara Kántuvrra bargguid birra ja stáhtaráđđi Mehl muitalii ges stáhtaráđi doaimmaid birra.