Hopp til hovedinnhold

Gonagas Harald rabai ovccát Sámedikki

– Mun sávan Sámediggái buresboahtima ovddasvástideaddji daguide ja sávan dan šaddat ávkin sámi álbmogii ja min riiki, Majestehta Gonagas dajai rahpansártnistis odne.

20.10.2021

Gonagaslaš Allavuohta Ruvdnaprinsa maid lei mielde Sámedikki allaáiggalaš rahpamis Kárášjogas.

Sámediggi lea sámi álbmoga álbmotválljejuvvon parlameanta Norggas. Juohke njealját jagi – go lea stuoradiggeválga – 39 áirasa 7 válgabiires galget válljejuvvot Sámediggái.

Ovccát Sámedikki rahpan. Govva: Jan Harald Thomassen, Romssa ja Finnmárkku stáhtahálddašeaddji

– Erenoamáš illu deaivvadit

Gonagas Harald dajai erenoamáš illun beassat deaivvadit ovccát Sámedikki rahpamis – go pandemiija gáržžideamit viimmat nohke.

– Sámiide giddejuvvon riikkarájit leat dagahan váttisin deaivvadit ovttasbargat áššiiguin main livččii seammá beroštupmi. Máŋgasiin leat maid lagaš fuolkkit ja ustibat geaiguin ehpet leat beassan deaivvadit. Lihkkus dál orro mannáme dabálaš dili guvlui, Gonagas dajai.

Ovccát Sámedikki rahpan. Govva: Terje Bendiksby / NTB

Gonagas Harald čujuhii maiddái dálkkádatrievdademiide mat čuhcet árktalaš guovlluide ja earenoamážit eamitálbmogiidda.

Čalmmustahtii nuorra sámi musihkkáriid ja dáiddáriid

Gonagas rámidii nuorra sámi musihkkáriid ja dáiddáriid go čalmmustahttet sámi kultuvrra ja giela máŋggabealatvuođa.

– Nášuvdnan mii fertet guldalit sin vásihusaide, vai dainna lágin oažžut ipmárdusa mot otná beaivve lea nuorra sápmelažžan bajásšaddat. Sii leat ovdagovat mas sihke Sámediggi ja mas mii nu go riikan sáhttet čevllohallat, dajai son sártnistis.

Árbevieru vuođul

Gonagas bivddii Ipmila buressivdnidit Sámedikki barggu ovdal go loahpas gulahii ovccát Sámedikki rahpama.

Tom Sottinen. Govva: Vaino Rensberg/Sámediggi Sametinget

Maŋŋel sártni čuvvo dearvvahansártnit Norgga Stuoradikkis vuostttaš várrepresideantta Svein Harberg bokte, Ruoŧa sámedikkis dievsčoahkkinjođiheaddji Daniel Holsta bokte ja Suoma Sámedikkis sámediggepresideantta Tuomas Aslak Juuso bokte.

Sámi Jienat lávlunjoavku loahpahii seremoniija Sámisoga lávlagiin.

Gonagas Olav rabai dan vuosttaš Sámedikki golggotmánu 9. beaivvi 1989:s.

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas