Álbmotfeasta Siskkit Østfoldas

Ruvdnaprinsabárra boahtiba Høytorp fortii fylkkamátkkis Vikenis. Govva: Simen Løvberg Sund, Gonagaslaš hoavva

Mátki álggii Trøgstadas muittašeamen doložiid.

Kolbjørnsrud dálus Ruvdnaprinsa beasai gullat jagi 1940 dramáhtalaš giđđabeivviid birra. Trøgstada 10. ceahki nuoraidskuvlla oahppit ja oahpaheaddjit oahpistedje dološ soahtešilljui gos, Trøgstada Forta berošteaddjiid jođiheaddji, Rolf Thomassen muitalii mii doppe earet eará dáhpáhuvai 81 jagi áigge.

Cuoŋománu 13. beaivvi duiskka soahteveahka rohtte dálu guvlui, gos 70 norgga soalddáhat ledje juo ráhkkanan gili suodjalit amas soahteveaga vuostá.

Lea dramáhtalaš historjá, ja lea dárbu ohpihii dan muitalit – juste nu mot Rolf Thomassen nu vuohkkasit dás odne dagai, Ruvdnaprinsa dajai sártnistis Høytorp fortas.

Ruvdnaprinsa váccii báhtareaddjiidruvtto 

Maŋŋel historjjámuitaleami Ruvdnaprinssa dearvvahii 10. ceahki ohppiid Alvilde Balto Myhrvolda ja Jesper Kreppen Tvetera. Skuvlaoappái- ja vieljaiguin, ja Saxe Frøshaug sátnejođiheddjiin sii vázze báhtareaddjiidruvtto vuosttaš oasi – sin luottaid maŋis geat báhtaredje ráji rastá Ruŧŧii, nuppi máilmmi soađi áigge.

Ruvdnaprinsa Haakon vázzá muhtun oasi báhtareaddjiidruvttos Alvhilde Balto Myhrvoldain ja sátnejođiheddjiin Saxe Frøshaugain Trøgstada galledeamis. Govva: Berit Roald / NTB

Vázzit seammá báhtareaddjiidruvtto máŋgasat vácce soađeáigge, bidjá min jurdilit eallima birra. Vásihit luonddu ja eatnamiid – nu mot bállán ja doarrádallan olbmot dalle dahke – ja lihkká vásihit ahte mis lea oadjebas ja friddja demokratiija, ráfi riikka, lea juoidá maid fertet divrrasin atnit, Ruvdnaprinsa Haakon dajai.

Ruvdnaprinsa váccii báhtareaddjiidruvtto friddjavuođa 75 jagi ávvudeami oktavuođas

Olbmuiguin deaivvadit Høytorp fortas

Gonagaslaš Allavuođat Ruvdnaprinsa ja Ruvdnaprinseassa jotkkiiga mátkkiska ovttas – bisáneigga vuos Trøgstadheimen ássan- ja bálvalanguovddážis ja de viidáseappo dan historjjálaš muitomerkii Høytorp fortii.

Ruvdnaprinseassa Mette-Marit hupmá ássiin Trøgstadheimenis. Govva: Simen Løvberg Sund, Gonagaslaš hoavva

Mánát geat liđiid geigiiga, Oskar Danielsen (13) ja Jenny N. Kristoffersen (14) Mortenstua skuvlaoahppit, sávaiga Ruvdnaprinsa Haakona ja Ruvdnaprinseassa Mette-Máreha bures boahtin fortii. Edwin Ruuda mánáidgárdde-mánát čužžo leavggaiguin miehtá luoddaguora gitta lávdii lusa gos artista ja poehta Trygve Skauga ja Indre Østfolda kulturskuvlla bokte ledje sihke sártnit ja musihka.

Sártnistis Ruvdnaprinsa gihtii liekkus bures boahtima ovddas ja deattuhii man hávski lei nu olu olbmuid oktanaga fas oaidnit.

-Mii leat mannan hui erenoamáš áiggi čađa, ja de lea ge hui hávski go ná beassat čoagganit, nu olu olbmot fas čoahkis.

Loga olles sártni

Fortas lei hui ealás. Ruvdnaprinsabárra beasai goahka Gry Hagena máli máistit. Sanitehtanissonat guossuhedje “Sanitehta erenoamáš svelaid”, man dáiggis vel ledje ruotnasat. Ledje deaivvadeamit Husflideniin, veteránaservviin, Ny i Askim:ain, Buorit ránnjážat ja Myseneanu ustibiiguin. Forta luhtte lea Mortenstua skuvla, mánáide geain leat stuora máŋggabeallásaš oahppováttisvuođat. Ruvdnaprinsabára oahpistedje ávnnastan- ja goarrunlánjáide – ja bárra ságastalai sihke ohppiiguin, oahpaheaddjiiguin ja eaktodáhtolaččaiguin.

Otto Danielsen lea eaktodáhtolažžan Mortenstua skuvllas gos Oskar-áddjut lea oahppi. Govva: Simen Løvberg Sund, Gonagaslaš hoavva  

Norgga eappelbeaivi

Čavččamánu maŋemus beaivi lea Norgga eappelbeaivi. Na, mii vel buorebut heivii go presseriijas fitnat? Ruvdnaprinsa Haakonis lei eappelkássa Skaugumis mielde go loahpahii beaivvi prográmma Askima Frukt- og Bærpresseriijas.

Skauguma eappeliin galgá eappelmosta šaddat, ja Ruvdnaprinsa oahpistuvvui eappelvuostáiváldimis, presseriijas, njoarramis, páhkkenstašuvnnas ja gávppis. Askim Frukt- ja Bærpresseri lea Norgga stuorámus gálbmapressejuvvon olivenoljjo buhtadeaddji.

Guossohuvvui eappelváffelat eappelgeleain, ja Ruvdnaprinsa beasai gullat Askima guhkes eappelárbevieru birra. 85 jahkásaš fitnodat álggahuvvui oasussearvin 1936:s, masa aivve olbmot geat ásse Askimas besse searvat.

Ruvdnaprinsa oahpistuvvo Askim Frukt- og Bærpresseriijas mii álggahuvvui 1936:s. Govva: Simen Løvberg Sund, Gonagaslaš hoavva

Gaskavahkku mátki joatká Vålera ja Mossa suohkaniin ovdal go fylkkamátki loahpahuvvo Fredrikstadas čakčamánu 30. beaivvi.