Njuike váldosisdollui

Lihkku beivviin!

Gonagasbearaš ávvudii Našunálabeaivvi sihke Askeris ja Oslos, ja sii čužžo Šloahttabalkoŋggas go buohkat lávlo "Ja, vi elsker" diibmu.

17.05.2020

Šloahtas álggahedje dán beaivi nugo álo lávejit dahkat miessemánu 17.beaivvi: Diibmu 08.00, go Ráđđeviesu diibmu čuodjá, de gesset Gonagasa feastaleavgga stággui. Earret dan, de lei oalle earalágan miessemánu 17.beaivi dál – sihke Gonagasbearrašii ja buot eará olbmuide. Muhto lei liikká hui hávskis beaivi. Virusa njoammunvára geažil eai lean almmuhan Gonagasbearraša prográmma ovdagihtii, ja danin dat šattai vuorddekeahtes illu ollugiidda.

Čalmmustahtte Askeris

Dábálaččat láve Ruvdnaprinsabearaš dearvvahit mánáidtoga Askeris Skaugum tráhppa alde árrat miessemánu 17.beaivvi. Odne sii baicca vázze vulos gitta verráha lusa, gos deaivvadedje ohppiid, lávlunjoavkkuid ja korpsaid ovddasteddjiid.

Ruvdnaprinsabearaš bođii váccii alleas vulos Skaugumis. Govva: Lise Åserud / NTB scanpix

Askera sátnejođiheaddji Lene Conradi deattuhii sártnistis dan movt diet sánit maid mii dávjá gullat miessemánu 17.beaivvi sártnis -  rámádussánit mat gudnijahttet ovttasdoaibmanvuoiŋŋa, oktavuođa ja vuhtiiváldima – movt dat leat ožžon áibbas konkrehtalaš ja áigeguovdilis mearkkašumi dán jagi.

Dáppe oainnát eambbo govaid miessemánu 17.beaivvis

Ruvdnaprinsabearaš beasai maid deaivvadit Asker, Bleiker, Nesbru ja Røyken joatkkaskuvllaid ruoššapresideanttaiguin. Ruvdnaprinsabearrašis lei fárus sierra banner ruoššaide. Dat lei giitus ruoššaide dan ovddas go sii leat čuvvon dearvvašvuođa rávvagiid dán ruoššaáiggi mii šattai áibbas earaláganin go sii ledje máhttán jurddašit.

Ruvdnaprinsabearrašis lei fárus banner ruoššaide – giitun sidjiide dan ovddas go leat čuvvon njoammunsuodjaleami rávvagiid . Govva: Lise Åserud, NTB scanpix

Maŋŋil dien deaivvadeami Skaugumis verráha luhtte, vulggii Ruvdnaprinsabearaš vuorddekeahtes mátkái birra Askera. Ruvdnaprinsa Haakon ja Ruvdnaprinseassa Mette-Marit čohkkedeigga beakkán A1 billii ja Prinseassa Ingrid Alexandra čuovui maŋis biillas maid gohčodit "Headjabiilan" - A5. Mátki manai Solgården ássan- ja fuolahanguovddážii, Borgenbråten ássan – ja doaibmaguovddážii ja Borgen ássanbáikái.

Ruvdnaprinseassa vuorddekeahtes guossemátkis Askeris A1 biillas. Govva: Sara Svanemyr, Gonagaslaš hoavva

"Ja, vi elsker" Šloahttašiljus

Šloahttašiljus dolle 74 Oslo skuvlla skuvlaleavggaid. Eanas leavggat ledje leamaš Šloahtas ija, ja dasto daid gudde Šloahttašilljui Vålerenga ja Grünerløkka skuvllaid oahppit. Goappešat diet skuvllat leat 125 jagi dán jagi, ja livčče galgan vázzit ovddemusas miessemánu 17.beaivvi togas.

  Oslo skuvllaid leavggat čiŋahedje Šloahttašilju. Govva: Lise Åserud, NTB scanpix

Majestehta Gonagasa Garde musihkkakorpsa čuojahii, Norgga Solistajoavku, Silbabárdnelávlut ja Norgga Nieiddaidjoavku ledje maid Šloahttašiljus go diibmu lahkonišgođii 13.00. Jur ovdalaš go diibmu časkkii, de bođii Gonagasbearaš balkoŋgii. De láidestedje lávlunjoavkkut buohkaid lávlut "Ja, vi elsker", oktanaga miehtá riikka.

Gonagasbearaš seavvá Šloahttabalkoŋggas. Govva: Lise Åserud, NTB scanpix

Odne eai beassan Oslo skuvlamánát vázzit togan Šloahttašilljui ja seavvit Gonagasbearrašii. Muhto sátnejođiheaddji Marianne Borgen beasai ovttas Vålerenga ja Grünerløkka skuvllaid ohppiidráđiid jođiheddjiiguin geiget badjel 3 500 sárgumiid ja eará dearvvuođaid maid skuvlamánát leat ráhkadan Gonagassii ja Dronnegii.

Garden guoimmuhii sihke musihkaid ja drillain ovdal go Gonagaslávlla loahpahii prográmma Šloahttašiljus.

Vuorddekeahtes mátki

Dasto besse Oslos maid vásihit vuorddekeahtes gussiid. Go Šloahttašilju seremoniija lei loahpahuvvon, de čohkkedii Gonagasbárra A1 billii. Gonagasa ja Dronnega biila bođii Šloahta váldoverráhis olggos ja dakka maŋábealde čuovui Ruvdnaprinsabárra A5 biillas, ja sii vudje Karl Johan gáhta mielde.

Gonagasbárra jođus vuorddikeahtes mátkái dearvvahit álbmoga A1 biillas. Govva: Øivind Møller Bakken, Gonagaslaš hoavva

Diein rabas biillas mátkkoštii Gonagasbárra álggos Kampen fuolahanguovddážii, dasto Sofienbergruktui Grünerløkkas ja de Ullevål buohccivissui, ja eatnasa várra hirpmahuvve go oidne dán korteše, go  eai lean vuordán ge dan.

Ruvdnaprinsabárra A5 biillas olggobealde Ullevaal Buohcciviesu mánáidossodaga. Govva: Lise Åserud / NTB scanpix

Vuodjinmátki Oslos loahpahii Gonagasbára otná prográmma.

Se flere bilder fra 17. mai

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas